Dodadi 32
32
O Yakubu wohidingoto ai hidoaka o Esauika
1Ka de ai toroa o Labana wopahaka de o Yakubu de ai nyawa mata-mata onangoo yosobo ho ka yomaketeliporete yokokiloiki. De o Yakubu de ai nyawa yogila-gila manga dumutika. De ma oraha ka de yotagi de naga Ma Jou ai malaekata yamuruono naga o Yakubu iwibuhuku. 2Ka de o Yakubu wamake Ma Jou ai malaekata gea de duru wohidaere de ai heheranga ma demo wato, “O tonaka naa duru Ma Jouoo ai dudulu ma ngi!” Ho gea ma titi hiadono una ahao ma ngi gea wohiromanga, “o Doomu Hinooto ma Ngi,” abe nako to ona manga demo gea o Mahanaimi.#32:2 Abe to ona manga demo ma romanga o Mahanaimi ma titi, “O doomu hinooto ma ngi.”
3De o Yakubu wairiki la ai nyawa yamuruono naga abe ka idadi ai demo yototaka ai riakika o Esauika. Una wogogere o Seiri ma tonaka ma honongaka abe ihiromanga o Edomo. Ho genangika wahidingoto la ai riaka iwitutumu. 4De ai nyawa gea wadotoko onangika wato, “Ho naa niloiki ahi baluhu o Esauika de kiani nihihiromanga unangika niato, ‘Ani gilaongo o Yakubu.’ De hokonaa nia demo unangika niato, ‘Ngohi naa ani gilaongo o Yakubu abe naa ma dekanino de ko homakamakeua ngona de ngohi abe ngohi ma dekanino naa togogere nanga pepeoka o Labanoka de ahao naa tolio. 5De gea tolio de ahi kiahonanga de ahi nyawa manga ngoe abe naga ahi duduono o hapi, o keledai, o domba de o kabingi. De nagau ahi duduhunu onangoo manga ngoe o nau-nauru de o ngo-ngofeka. Ho ahi nyawa naa tahidingoto la initutumu inihingahu abe ngohioo toboa tonitutumu de tonganono la de ani sanangioka de aino nomidafongo. De ngomi naa to ngona ani giama ma hoatoka ngaro ngomi mata-mataika.’ Hokogea niwihingahu ahi riakika.” Hokogea o Yakubu ai hawana ma demo.
6Ho o Yakubu ai nyawa yoiki iwitutumu o Esau ibooto de ahao yolio o Yakubika de iwihingahu ato, “Ani riaka naa wosoboka woboa wonitutumu de ai tentara yaratuhu iata.” 7Ka de gea woihene de o Yakubu duru wohawana. Ho ai nyawa de ai kiahonanga wakokiregu la idadi o doomu hinooto abe ngoi feka-fekata de ai ngofa-ngofaka de ai duduono de ai unta mata-mata wakokiregu hinooto de ahao wahikatingaka o doomu hinooto gea. 8Hokogea waregu ma titi ai hiningaka womademo wato, “Bote wonaparangi o Esau ho ka de o doomu moi waparangi de tonganono o doomu moi ka idadi yoara.”
9De ahao o Yakubu womagahoko Ma Jouiye wato, “Ngona Ma Jou o Yawe abe ahi ete o Abarahaama ai Jou de ahi babaoo o Isaka to unangoo ai Jou. De gea Ngona nohihibehehongo ngohino la tolio ahi dutu manga tonakika. De Ngona nohihibehehongoo nato ahao nohihiowa ngohino. 10De igoungu ngohi tanu ko kiaua ihidaene to Ngona ani himangoka masara Ngona Ma Jou nato ka ihikaika nohipaliara ngohino de ani kuaha. De ani dora nohihimatoko ani gilaongo ngohino naa duru ko itoa-toakua abe Ngona nohihibehehongo ngohino hokogea. Ngohi ka de ahi tauoka tosobo de gea ka ahi tutukunu dika naga ahi giamoka ma oraha o Yorodani ma akere naa totobongino. Masara abeika hokokia nohihiowa naa hiadono ahi doomu ma ago-agomo o gahumu hinooto! 11O ahi Jou o Yawe, duru tomagahoko la nohiduhunu ahi riaka o Esau ai giamino. Ngohi tohawana tato bote ai hiningaka ai hidee la wohitoma ngohi de marai ngohi feka-fekata de ahi ngofa-ngofaka onangoo ka ma moi womihidotoma. 12Masara duru ko tawohangua ani demo ngohino abe nohihibehehongokau ngohino nato nohihiowa de ka hiadono ahi totoforauku nahifaa-faatuku. De Ngona nato ahao manga ngoe imaketero hoka o gahi ma datekoka ma dowongi ho hiadono ko idadiua hohidetongo manga ngoe ahi totoforauku. Ho duru tonganono ahi Jou ani behehongika gea.” Hokogea womaniata o Yakubu ai demo.
13De ahao o Yakubu womaputuhu wato ko yogila-gilauahi de wohidiaiohi abe ai hidoaka ai riaka o Esauika de ahao yomaidu genangoka dika. 14De abe wihidiai gea o kabingi ma beka o ratuhu hinooto de ma nauru monaoko. De nagali o domba ma beka o ratuhu hinooto de ma nauru monaoko. 15De nagali o unta ma beka moruange abe de ma ngofakoka. De nagali o hapi ma beka moruata de ma nauru ngimoi. De nagali o keledai ma beka monaoko de ma nauru ngimoi. 16Ho o aewani ma dofo gea mata-mata wohikokatingakoka to una ai duduonino la idadi ai hidoaka ai riakika. De ahao wahuloko ai duduhunika la ona ihiaturu hokonaa, wato, “Kiani ngini o aewani ma doomu homoi-homoiika nihikatingaka la naga ma hoana hatoli ikurutika o doomu amomoiika.”
17De ahao o doomu ma dodihiraka gea ona wahuloko la wato, “Ngini kiani nihira de nako nimakamake de ahi riaka o Esau de marai kiani una winileha wato, ‘Hobata, ngini naa o kiaika niloiki? De naa ngini onagonaka nikarajaanga? De naa to onagonali manga aewani?’ 18De nako hokogea ahi riaka winileha, ngini kiani nipaluhu hokonaa unangika niato, ‘Ngomi naa abe ma aewani miao gea to ngona ani gilaongo o Yakubino abe wonihidiai la ai hidoaka ai baluhika o Esauika. De unangoo naga womihidoduruino.’ Hokogea kiani nia demo ahi riakika.”
19De ahao o Yakubu wahingahu ai behehongo gea o doomu amomoiikali hiadono ona mata-mata duru wahilati abe hokokia yotagi o doomu imaketemomoi de hokokia manga demo ma oraha yomakamake de o Esau. 20Abe wato, “Ngini kiani nia demo ka moi ma oraha nitemo unangika de ufa niawohanga niato, ‘Ani gilaongo o Yakubu naga womihidoduruino.’” Hokogea o Yakubu ai hininga la wato una de o Esau ko yomakamakeuahi de una ihira wilaruokau de ma ngoe ai hidoaka unangika gea. Una wato, “Tonganono ma ngekomo naa la ka idadi tihisanangi ahi riaka.” 21Ho ai hidoaka gea ai nyawa ihitihira ho yosoboka masara o Yakubu womaiduohi manga dingiioka.
O Yakubu de Ma Jou yomahiketehilolumomiki
22De o Yakubu womaidu masara o futu gorona de womomiki de ngoi fekata idodutu yahinooto de ngoi fekata o hidoakino yahinooto wakokihuloko la yomahihora doka o Yaboko ma akere ma honongaika. De wato ai ngofa-ngofaka o nauru yangimoi de yamoi onangoo yao. 23De yomahihoraka ibooto de ahao ai duduhunika wahuloko la onangoo yomaturuuru doka ma honongaika de ai kiahonanga ka ma moi ihihora. 24Ho o Yakubu ka womatengokahi naga abe manga dingiiokahi. De ahao naga womatengo wingino o Yakubino de yomakataoko yomahiketehilolumomiki hiadono ngade-ngade yahidetebiniye. 25Ka de womatengo gea wamake abe ko wadadiua o Yakubu wihikala de witidingi o Yakubika duru ai gaono ma dekarika ho hiadono ai gaono ma dengo wapahaka. 26Masara o Yakubu ko wipidilua de una wogahoko wato, “Kiani nohipidili angamoi itebinoka abe ngade-ngade o wange ipotoka.”
Masara o Yakubu wowomaha ka wodobi-dobiki de wogahoko wato, “Nako ngona ko nohihiowauahi ko tonihigunoauahi nosobo.”
27Ho una gea wileha wato, “Ho ngona ani romanga onaguna?” De o Yakubu wipaluhu wato, “Ngohi o Yakubu.”
28Ho gea wihingahu wato, “De naa tonihingahu ngona ani romanga ko o Yakubokaua masara naa tonihiromangoli o Isiraele#32:28 Abe to ona manga demo ma romanga o Isiraele gea ma titi, “o nyawa abe iwilawana Ma Jou.” ma titi nimaketeribuutu de Ma Jou angamoi ngona duru noputurungu hiadono ngaro de Ma Jou ma, nimaketeribuutu. De ngaro nimaketeribuutu de o nyawa, ma, mata-mataika ka ngonahi nolaku.” 29Hokogea wotemo ibooto de ahao o Yakuboli wotemo wato, “De ngohi duru togahoko la ngonaoo ani romanga nohihingahu.” De una gea wipaluhu wato, “O kia ma titi ho hiadono ahi romanga nohileha?” Masara ka de hokogea wotemo de ahao ma owa wihibehehongo o Yakubika.
30De ahao o Yakubu wato, “Ma ngi naa tohiromanga, ‘Ma Jou ai Himanga’ angamoi abeika, ngohi naa de Ma Jou mimarihimanga de ngaro hokogea masara ngohi ka towangohi!” O hiromanga Ma Jou ai Himanga, nako to ona manga demo, gea “o Penuele.” 31Ka de gea wotemo ibooto de o wange ipotokaiyeoka de o Penuele ma ngi gea wanoaika masara wotagi-tagika ka wosuga mangale ai gaono.
32De ma titi Ma Jou wipoha o Isiraele ai gaonika ho ngaro ka hiadono ma oraha naa masara o Isiraele ma nyawa nako o aewani ma roehe aolomo de yomahibohono ato ma roehe idateke ma gaono ma dengoika ko yaolomokaua la gea idadi manga hohininga abe Ma Jou wihiowa manga tofora o futu gea.#32:32 Ma titi ma roehe idateke ma gaono ko yaolomokaua la gea idadi manga hohininga abe Ma Jou wihiowa manga tofora o futu gea.
Currently Selected:
Dodadi 32: MJDD
Highlight
Copy
Compare
Share
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman
