Popular Bible Verses from Dodadi 32

Share

Ho gea wihingahu wato, “De naa tonihingahu ngona ani romanga ko o Yakubokaua masara naa tonihiromangoli o Isiraele ma titi nimaketeribuutu de Ma Jou angamoi ngona duru noputurungu hiadono ngaro de Ma Jou ma, nimaketeribuutu. De ngaro nimaketeribuutu de o nyawa, ma, mata-mataika ka ngonahi nolaku.”

Masara o Yakubu ko wipidilua de una wogahoko wato, “Kiani nohipidili angamoi itebinoka abe ngade-ngade o wange ipotoka.” Masara o Yakubu wowomaha ka wodobi-dobiki de wogahoko wato, “Nako ngona ko nohihiowauahi ko tonihigunoauahi nosobo.”

Ho o Yakubu ka womatengokahi naga abe manga dingiiokahi. De ahao naga womatengo wingino o Yakubino de yomakataoko yomahiketehilolumomiki hiadono ngade-ngade yahidetebiniye.

De ahao o Yakubu wato, “Ma ngi naa tohiromanga, ‘Ma Jou ai Himanga’ angamoi abeika, ngohi naa de Ma Jou mimarihimanga de ngaro hokogea masara ngohi ka towangohi!” O hiromanga Ma Jou ai Himanga, nako to ona manga demo, gea “o Penuele.”

Ka de womatengo gea wamake abe ko wadadiua o Yakubu wihikala de witidingi o Yakubika duru ai gaono ma dekarika ho hiadono ai gaono ma dengo wapahaka.

Ho una gea wileha wato, “Ho ngona ani romanga onaguna?” De o Yakubu wipaluhu wato, “Ngohi o Yakubu.”

Hokogea wotemo ibooto de ahao o Yakuboli wotemo wato, “De ngohi duru togahoko la ngonaoo ani romanga nohihingahu.” De una gea wipaluhu wato, “O kia ma titi ho hiadono ahi romanga nohileha?” Masara ka de hokogea wotemo de ahao ma owa wihibehehongo o Yakubika.

De igoungu ngohi tanu ko kiaua ihidaene to Ngona ani himangoka masara Ngona Ma Jou nato ka ihikaika nohipaliara ngohino de ani kuaha. De ani dora nohihimatoko ani gilaongo ngohino naa duru ko itoa-toakua abe Ngona nohihibehehongo ngohino hokogea. Ngohi ka de ahi tauoka tosobo de gea ka ahi tutukunu dika naga ahi giamoka ma oraha o Yorodani ma akere naa totobongino. Masara abeika hokokia nohihiowa naa hiadono ahi doomu ma ago-agomo o gahumu hinooto!

De ma titi Ma Jou wipoha o Isiraele ai gaonika ho ngaro ka hiadono ma oraha naa masara o Isiraele ma nyawa nako o aewani ma roehe aolomo de yomahibohono ato ma roehe idateke ma gaono ma dengoika ko yaolomokaua la gea idadi manga hohininga abe Ma Jou wihiowa manga tofora o futu gea.

De ahao o Yakubu womagahoko Ma Jouiye wato, “Ngona Ma Jou o Yawe abe ahi ete o Abarahaama ai Jou de ahi babaoo o Isaka to unangoo ai Jou. De gea Ngona nohihibehehongo ngohino la tolio ahi dutu manga tonakika. De Ngona nohihibehehongoo nato ahao nohihiowa ngohino.

O ahi Jou o Yawe, duru tomagahoko la nohiduhunu ahi riaka o Esau ai giamino. Ngohi tohawana tato bote ai hiningaka ai hidee la wohitoma ngohi de marai ngohi feka-fekata de ahi ngofa-ngofaka onangoo ka ma moi womihidotoma.