Gálatas 6
6
Tsc'an talbat ta jcolta jbatic
1Quermanotac, me oy boch'o ich'ay ta bee, vo'oxuc ti ventainbil avo'ntonic yu'un Ch'ul Espiritue, bat coltaic ta smuc'ul avo'ntonic. Q'uelo me abaic jujunoxuc, yu'un xu' jech chtal preva ta atojolic ec. 2Tsc'an talbat chacolta abaic ta xcuchel li avocolique, yu'un jech chach'unbeic o smantal li Cristoe.
3Yu'un li boch'o tsnop lec xu' yu'un, pero me mu meleluque, tslo'la sba stuc. 4Ja' yu'un, jujunoxuc tsc'an chaq'uelic lec c'u x'elan avabtel atuquic. Jech xu' chanop ti lec xu' avu'unique; mu me ja'uc no'ox xaq'uelbe yabtel yan. 5Yu'un jujunutic ja' cu'un jtuctic li c'usi ta jpastique.
6Li boch'o ta xchanubtasat ta sc'op Diose, ac'o me yac'be scotol c'usitic chtun yu'un li jchanubtasvanej yu'une.
7Mu me xalo'la abaic. Yu'un li Diose mu xu' chlabanat. Li c'usi tsts'un jujun cristianoe ja' chc'ot sc'aj.#Pr 22.8; Os 8.7. 8Li boch'o ja' no'ox ta sts'un c'usi tsc'an sbec'tale, ja' chc'ot sc'ajbe sat li c'usi tsc'an sbec'tale, ja' li ch'ayele. Yan li boch'o ja' tsts'un c'usi tsc'an Ch'ul Espiritue, ja' chc'ot sc'ajbe sat li yabtel Ch'ul Espiritue, ja' li cuxlejal sbatel osile. 9Ja' yu'un mu me xijlubtsajutic ta spasel li c'usitic leque.#2 Ts 3.13. Yu'un tsta yorail chc'ot jc'ajbetic sat, me muc xchibaj co'ntontic ta spasele. 10Ja' yu'un jpastic c'usi lec ta stojol scotol cristianoetic ti c'alal ja' yoraile. Pero ja' ech'em to tsc'an ta jpastic ta stojol li boch'o co'ol jch'unojtic Dios jchi'uctique.
Ja' tsots sc'oplal cha'ay Pablo ti icham ta cruz li Cristoe
11Q'uelavilic c'u to smuc'tiquil li jts'ib li'i, yu'un vu'un ta jc'ob jtuc la jts'ibaboxuc tal li juteb li'i. 12Li boch'otic tsujvanic ta yich'el circuncisione, ja' no'ox tsc'anic ti lec ch-ilatique, yu'un mu sc'an xich'ic uts'intael ta xcholel ti icham ta cruz li Cristoe. 13Li boch'o tsots sc'oplal cha'yic circuncisione, mu yu'unuc ja' ch'unem xa yu'unic scotol li mantaletique. Ja' no'ox tsc'anic ti ac'o avich'ic circuncisión li vo'oxuque, yu'un jech ac'o lecuc sc'oplalic ta sventa li sbec'talique. 14Pero li vu'une mu ja'uc tsots sc'oplal chca'ay ti ac'o ich'atcun ta muq'ue. Ja' tsots sc'oplal chca'ay ti ac'o ich'atuc ta muc' li Cajvaltic Jesucristo ti icham ta cruze. Yu'un ja' ta sventa ti chamen xa ic'ot ta jventa li c'usitic oy li' ta banamile, jech chamenun xa lic'ot ta sventa ec. 15Yu'un ta stojol Cristoe, ma'uc tsots sc'oplal me quich'ojtic circuncisión, o me mu quich'ojticuc circuncisión. Ja' tsots sc'oplal ti ac'o ach'ubuc jtaleltique.#Jn 3.3-7; 2 Co 5.17. 16Scotol li boch'otic jech xch'unojic jech chac cha'al laj cale, ac'o junuc yo'ntonic o, xchi'uc ac'o c'uxubinaticuc o yu'un li Diose. Jech ac'o c'otuc ta stojol li boch'otic mero Israel chc'otic ta sventa Diose.#Sal 125.5; 128.6.
17Slajeb xa chacalboxuc. Li' ta ora xchi'uc le' to batele mu xa me boch'o xac'bun jvocol avu'unic. Yu'un li vu'une quich'ojbe lec senyail ta jbec'tal ti vu'un yajtunelun Jesuse.
18Quermanotac, te ac'o oyuc o ta atojolic li c'uxubinel yu'un Cajvaltic Jesucristoe. Jechuc.
Currently Selected:
Gálatas 6: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.