Esdras 4
4
Ipajesatic ta abtel yu'un yajcontraic li judaetique
1C'alal i'a'yatic yu'un yajcontraic Judá xchi'uc Benjamín ti isutic xa tal ta yosilalique xchi'uc ti te xa sbats'ilic xcha'pasel li xch'ulna Muc'ul Dios yu'un Israele, 2ibat sc'opanic li Zorobabel, li Jesúa, xchi'uc li banquilaletic ta jujuchop sbiique. Jech c'ot yalbeic:
—Ja' lec co'ol ta jpastic li ch'ulnae, yu'un ja' xa quich'ojcutic ta muc' ec li Dios avu'unique. Ja'o no'ox te lic jmilbecutic tal smoton ec ti c'alal la stacuncutic tal ta naclej li' ta avosilalic li ajvalil Esar-hadón ta Asiriae#2 R 17.24-41. —xutic.
3Pero li Zorobabel, li Jesúa, xchi'uc li banquilaletic ta jujuchop sbiique jech itac'ovic:
—Mu xu' co'ol ta jpastic ch'ulna yu'un li Dios cu'uncutique. Ta jcha'pas jtuccutic ta sventa li Muc'ul Diose, ja' li Dios yu'un Israele, yu'un jech albiluncutic tal mantal yu'un li ajvalil Ciro ta Persiae —xutic.
4Ja' yu'un li yanlum cristianoetic te nacalique la sibtasic, la xchibajesbeic yo'nton ta abtel li judaetique. 5Jech noxtoc la slo'labeic ta taq'uin j'abteletic yu'un li ajvalile. Jech te la smaquilanic o abtel ti c'u sjalil tiq'uil ta ajvalilal ta Persia li Ciroe, ja' to c'alal i'och ta ajvalilal li Darioe. 6Jech noxtoc c'alal ja' to no'ox i'och ta ajvalilal li Asueroe,#Est 1.1. la stic'beic batel smul ta stojol ajvalil li Judá xchi'uc Jerusalene. 7Xchi'uc c'alal i'och ta ajvalilal ta Persia li Artajerjese,#Neh 1.1. li Bislam, Mitrídates, Tabeel xchi'uc yantic xchi'iltaque la stacbeic batel carta li ajvalil Artajerjese. Li cartae ts'ibabil ta arameo c'op. 8Li Rehum ja' li banquilal soldadoe, xchi'uc li Simsai ja' li jts'ibajome, ja' la sts'ibabeic batel carta li Artajerjese yu'un tstic'beic smul li jnaclumetic ta Jerusalene. 9Jech la staquic batel carta li Rehum ja' li banquilal soldadoe, li Simsai ja' li jts'ibajome, xchi'uc li yantic xchi'iltaquique, ja' li jchapanvanejetic, jpasmantaletic, xchi'uc li j'abteletic ta Persia, ta Erec, ta Babilonia, xchi'uc ta Susae, ja' li elametique. 10Ja' co'ol la staquic batel xchi'uquic li yanlumetic ti te tacbilic batel yu'un Asnapar ja' li muc'ul ajvalil ti lec ich'bil ta muq'ue, ti te laj yac' naquiicuc ta Samaria xchi'uc ta yantic lum ta smaleb c'ac'al#4.10 C'ac'al - Oy boch'o chalic jtotic. yu'un li uc'um Eufratese. 11Ja' jech chal li carta la staquic batel ta stojol Artajerjese:
“Ajvalil Artajerjes, vu'uncutic li j'abteluncutic avu'une, li' chajc'opanotcutic tal ta jot uc'um Eufratese:
12“Ja' ta xcac'cutic ana' c'usi tspasic li judaetique. C'alal laj atac sutel tal yo' bu oyuncutique, bat xa sliquesic xcha'pasel li Jerusalene, li jtoyba lume, li chopol lume, laj xa sliquesic spasel li coraltone yac'ojbeic xa li snaclebtaque. 13Ja' yu'un ti me te jq'uelojtic ta xcha'va'anic li lume, ta spasbeic li scoraltonale, mu xa sc'an stoj spatanic liquel, jech te ta c'unc'un xu' chch'ay ti c'u yepal taq'uin chavich'e. 14Vu'uncutic li j'abteluncutic avu'une, mu jc'ancutic ti mu'yuc xa ich'bilot ta muc' chac'ote, ja' yu'un chcac'cutic ana' li c'usi chc'ot ta pasele, 15yu'un jech ac'o at'un me oy tsacal comel ta svunaltac yu'un li amoltotaque. C'alal me laj atae, jech chlic ana' o ti ja' jtoyba ono'ox li jun lum le'e, xchi'uc ti jech ono'ox chac'beic svocol li ajvaliletique xchi'uc li yantic banamiletique. Yu'un jechic ono'ox ta vo'one ti toj toybaetique, ja' yu'un ti laj yich'ic vuq'uesbel li slumalique. 16Ja' yu'un ajvalil, me te jq'uelojtic tsva'anic o li lume xchi'uc li coralton yu'une, muc xa me vo'cot aventainoj chcom o li banamil te ta maleb c'ac'al#4.16 C'ac'al - Oy boch'o chalic jtotic. yu'un uc'um Eufratese”, xutic batel.
17Li ajvalil Artajerjese jech la stac' sutel:
“Banquilal soldado Rehum, Simsai jts'ibajom, xchi'uc li achi'iltaquic ti te nacaloxuc ta Samariae, xchi'uc vo'oxuc ti te nacaloxuc ta smaleb c'ac'al#4.17 C'ac'al - Oy boch'o chalic jtotic. yu'un uc'um Eufratese: chabanucoxuc chacalboxuc tal.
18“Li carta laj ataquic tale lec jamal laj yich' aptael li' ta jtojole. 19Jech laj cal mantal ti ac'o yich' t'unbel sc'oplalic li' ta vune. Li' la staic ti yu'un ono'ox la scontrainic ta vo'one li yantic ajvaliletique; laj ono'ox snopilanic c'u x'elan ta sliquesic c'op, ta sbajbeic smantal li ajvaliletique. 20Xchi'uc li' ivinaj noxtoc ti oy ajvaliletic ijelov yu'unic ti toj tsotsique. Jech la sventainic li banamil te ta smaleb c'ac'al#4.20 C'ac'al - Oy boch'o chalic jtotic. yu'un uc'um Eufratese. Laj yac'beic stoj spatanic. 21Ja' yu'un pajesic ta abtel li viniquetic le'e; ac'o xquechanic xcha'pasel li lume, ja' to me laj cal mantal ta ach' li vu'une. 22Mu me teuc no'ox xch'ay ta avo'ntonic li c'usi laj calboxuque, yu'un jech mu xquich' jvocoltic, jech mu xlaj sc'oplal li ajvaliletic cu'untique”, xi batel li ajvalile.
23C'alal laj yich'ic aptabel scarta ajvalil Artajerjes li Rehum, li Simsai, xchi'uc li xchi'iltaquique ta ora no'ox ibatic ta Jerusalén. Ta c'op xa c'ot spajesic ta abtel li judaetique. 24Jech la xquechanic o spasel ch'ulna yu'un Dios te ta Jerusalén li judaetique. Te quechel icom o, ja' to c'alal xchibal xa'ox jabil yochel ta ajvalilal ta Persia li Darioe.
Currently Selected:
Esdras 4: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.