Ezequiel 3
3
1Jech laj yalbun: “Vo'ot xnich'on cristiano, lo'an li vun li'i; ja'o xbat ac'opan ta ora li achi'iltac ta israelale”, xiyutun.
2La jach' li quee; laj yac'bun jlo' li balbil vune. 3Jech laj yalbun: “Xnich'on cristiano, bic'an batel li vun li'i; nojeso o lec ach'ut”,#Jer 15.16; Ap 10.9-11. xiyutun.
Jech la jlo', toj lec chi' laj ca'ay jech chac c'u cha'al pom. 4Jech laj yalbun noxtoc: “Batan, ochan batel yo' bu nacalic li achi'iltaque; bat albo ya'yic li c'usi ta jc'an chcalbee. 5Mu ja'uc te ta jtacot batel ta stojol cristianoetic ti toj vocol, ti toj tsots ta a'ibel sc'opique. Ja' te ta jtacot batel ta stojol li achi'iltaque. 6Muc ja'uc te ta jtacot batel ta stojol epal lumetic ti toj yan o sc'opique, ti mu xava'ibe smelole. Ti ja'uc te ta jtacot batele, ja' chaya'ibot ac'op ti jechuque. 7Yan li achi'iltac ta israelale mu sc'an xa'yic ac'op, yu'un mu ono'ox sc'an xiya'ibicun jc'op ec li vu'une. Scotol li achi'iltac ta israelale toj tsots yo'ntonic, mu x'och c'op ta xchiquinic. 8Pero li vu'une ech'em to tsots avo'nton ta jpas jech chac c'u cha'al li stuquique. 9Tsots avo'nton chac'ot jech chac c'u cha'al tsatsal ton, xchi'uc xjelov atsatsal chac'ot jech chac c'u cha'al tsatsal ton. Ja' yu'un mu me xaxi' yu'un ti c'u x'elan tspas sbaic chavile, yu'un ja' mero jbajmantaletic o”, xiyutun.
10Jech laj yalbun noxtoc: “Tuc'ulano lec ava'ay li c'usi chacalbote; comtsano lec ta ajol. 11Batan, bat chi'ino ta lo'il li achi'iltac ti li' chucbilic tal ta yan banamile, ac'o me xayich'icot ta muc', o me mu xayich'icot ta muc. Jech xavalbe: ‘Ja' jech chayalboxuc li Muc'ul Diose, ja' li Cajvaltique’, uto”, xiyutun.
12Litots liquel ta stsatsal svu'el li Diose. Laj ca'ay oy boch'o chc'opoj ta jpat, tsots xc'ulet jech chac c'u cha'al niquel, jech chal: “Ich'biluc ta muc' yutsilal slequilal li Muc'ul Dios te yo' bu nacale”, xi. 13Laj ca'ay chbac' xic' li chanib c'usi cuxajtique, ja' li xic' ti snupanoj sba sni'e xchi'uc li yacan caretaetique; toj tsots xvo'et laj ca'ay. 14La stotsun liquel stsatsal svu'el li Diose; la xchechun batel. Li vu'une ta vocol, ta at-o'nton libat, pero li Muc'ul Diose stsacojun batel lec ta sc'ob. 15Te lic'ot ta Tel-abib ta ti' uc'um Quebar yo' bu nacajtic li jchi'iltac ta israelal ti chucbilic batele. Vucub c'ac'al te jchi'inojic. Ch'ayem co'nton laj ca'ay; mu jna' c'usi ta jpas; mu jna' c'usi ta xcalbeic.
I'ac'bat yabtel ta stojol xchi'iltac li Ezequiele
(Ez 33.1-9)
16C'alal its'aqui li vucub c'ac'ale, ital sc'opanun yan velta li Muc'ul Diose jech laj yalbun: 17“Vo'ot xnich'on cristiano, laj xa cac'ot ta toyol q'uelub osil ya'yel#Is 21.6,11; Jer 6.17; Os 9.8. ta sventa li israeletique. Ja' yu'un a'yo lec ava'ay li c'usi chcale yu'un jech chbat avalbe, chbat ataq'ui ta jventa li achi'iltaque. 18C'alal me jech chcalbe li jpasmulile: ‘Li vo'ote ta xacham’, me xcute, pero me vo'ot mu'yuc ataq'uioj, mu'yuc avalojbe ti ac'o sutes yo'nton yu'un jech xu' chcuxie, ta ono'ox xcham ta scoj li smule. Pero li xch'ich'ale vo'ot chcom ta aba. 19Pero me laj avac'be lec sna' li jpasmulile, me ja' stuc mu scomtsan li c'usi chopol tspase, me mu sutes yo'ntone, ta xcham ta scoj xchopolil stuc. Li vo'ote colem chacom. 20Jech noxtoc, li boch'o tuc' yo'ntone, me oy chc'ot ta pasel chlic scomtsan li c'usi tuq'ue, me ja' chlic spas li c'usi chopole, me laj cac'be svocol ta sventa ti jech tspase, me te icham oe, ta scoj smul ta xcham. Li c'usitic lec to'ox la spase chch'ay ta alel o. Pero li xch'ich'ale vo'ot chcom ta aba noxtoc, yu'un muc xacolta. 21Pero me laj avalbe ti mu me sa' smule, ta to xcuxi, yu'un laj yich' ta muc' li taq'uiele. Li vo'ote colem chacom”, xi.
I'albat ti tspas ta uma' li Ezequiele
22Li Muc'ul Diose laj yac' tal sc'ob ta jtojol yan velta, jech laj yalbun: “Lican, batan ta stenlejaltic, te ta jchi'inot ta lo'il”, xiyutun. 23Jech lilic, liloc' batel. Laj quil te oy yutsilal slequilal noxtoc li Muc'ul Diose, ja' jech chac c'u cha'al laj quil te ta ti' uc'um Quebare jech te la jpatan jba ta banamil. 24Te ivul ta jtojol stsatsal svu'el li Diose jech la sva'anun, lic sc'opanun jech laj yalbun: “Batan, bat maco aba ta yut ana. 25A'yo ava'ay, ta xlic xchuquicot ta ch'ojon, jech mu xa xu' chaloc'; mu xa xu' chachi'in li achi'iltaque. 26Ta xcac' ti ac'o spac' sba ta apac'o li avoq'ue, jech uma' chacom, jech mu'yuc xa c'usi xu' chavalbe li achi'iltaque, yu'un ja' mero jbajmantaletic o. 27Pero c'alal oy c'usi ta jc'an chacalbote, ta xcac' c'opojan, jech chlic avalbe li achi'iltaque: ‘Ja' jech chal li Muc'ul Diose, ja' li Cajvaltique’, xavut. Li boch'o tsc'an cha'ye, ta xa'ay; yan li boch'o mu ono'ox sc'an xa'ye, mu xa'ay o, yu'un ja' bats'i jbajmantaletic o”, xiyutun li Diose.
Currently Selected:
Ezequiel 3: TZE97
Highlight
Copy
Compare
Share
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
