2 Macabeos 3
3
Sc'oplal tsc'an ox spoj c'usitic lequic chtunan te ta ch'ulna li Heliodoroe
1C'alal ja'o ochem ta banquilal pale li Oniase, te ta ch'ul lum Jerusalén toj lec jun yo'ntonic xchi'uc lec xch'unojic scotol li mantaletique, yu'un ja' jun lequil vinic, mu sc'an li c'usitic chopole. 2Ja' no'ox jech ec li muc'ta ajvaliletique lec chich'ic ta muc' li ch'ulnae xchi'uc la smuq'uibtasic sc'oplal ta lequic matanaletic ti ven c'upilic sbae. 3Ja' no'ox jech ec li Seleucoe, ja' li muc'ta ajvalil ta Asia banamile, te laj yac' staq'uin ec ta sventa c'usitic chtun ta sventa milbil matanal.
4Oy jun vinic Simón sbi, ja' pale, liquem ta jchop sts'unubal Bilga, ja' yich'oj ta venta sq'uelel ch'ulna. Mu'yuc lec chil li banquilal pale Oniase ta scoj ti ja' yich'oj ta venta sq'uelel scotol li mantaletic sventa ch'ivit te ta lume. 5C'alal laj yil Simón ti mu xu' yu'un stsalel li Oniase, bat sc'opan li Apolonio ta Tarsoe, yu'un ja'o ochem ta banquilal soldado te ta lum Celesiria xchi'uc ta Fenicia banamil. 6Laj yalbe ti oy epal taq'uin ta ch'ulna ta Jerusalene ti te oy ep c'ulejalil, ti ep taq'uin te nac'bil ti mu stac' atele, ti mu ja'uc chtun ta sventa li milbil matanaletique, ja' yu'un ja' xu' ac'o yu'unin li ajvalile. 7Li Apolonioe bat sq'uel li muc'ta ajvalile yu'un bat yalbe ti oy taq'uin te ta ch'ulnae. Jech yu'un li muc'ta ajvalile la stac batel li Heliodoroe, yu'un ja' li boch'o yac'ojbe sventain scotole, yu'un ac'o bat yich' tal li taq'uin te ta ch'ulnae.
8Li Heliodoroe ibat ta anil ta sbelal Celesiria xchi'uc Fenicia, ta vu'lal no'ox ibat yilel, ja' xa bat spas li c'usi i'albat batel yu'un li muc'ta ajvalile. 9C'alal ic'ot ta Jerusalene, lec i'ich'at ta muc' yu'un li jnaclumetique xchi'uc li banquilal palee. Jech te lic xcholbe ya'ay li c'usi albil ta sventa li taq'uin te ta ch'ulnae. Te lic yal c'usi smelol ti ibate, te lic sjac' me melel li c'usi albile. 10Li banquilal palee lic yal ti te tsobbil li taq'uine, ti ja' chtun yu'unic li me'on antsetique xchi'uc li me'on ololetique. 11Te oy j'o'lol yu'un ec li Hircano xnich'on Tobiase, ja' li jun vinic ti yich'oj lec tsots yabtele. Li Simone i'epalc'opoj ta sventa li taq'uine. Laj yal ti oy oxlajunmil xchi'uc chib ciento (13,200) kilo li saquil taq'uine, ja' vacmil xchi'uc vaquib ciento (6,600) li c'anal taq'uine. 12Jech yu'un li Oniase laj yal ti mu boch'o xu' stic' sba ta yelc'anbel staq'uinic li boch'otic jech yo'ntonic la snaq'uic comel te ta ch'ulnae, yu'un sna'ojic ti mu c'usi stac' pasbel li ch'ulnae, yu'un lec ich'bil ta muc' ta sbejel banamil. 13Jech yu'un li Heliodoroe la spas ti c'u x'elan yich'oj mantal yu'un li ajvalile, ti ac'o yac'be ta sc'ulejal ajvalil li sc'ulejal ch'ulnae.
14Jech te laj yac'be sc'ac'alil c'usi ora xu' ta x'och ta sq'uelel c'u yepal li taq'uin te ta ch'ulnae. Scotol li cristianoetic te ta lume ep lic lo'ilajuc yo'ntonic yu'un. 15Li paleetique te lic slap sc'u'ic sventa paleal. La squejan spatan sbaic ta stuq'uil scajleb matanal, la sc'anbeic vocol Dios ti ja' yaloj mantal ta sventa li c'usitic te chich' naq'uel ta ch'ulnae, laj yalbeic ti ac'o xchabi stuc li c'usitic te laj yaq'uic li boch'otic la snaq'uic comel staq'uinique. 16C'alal tsq'uelbeic sat li banquilal palee, toj ch'ayel chc'ot yo'ntonic, yu'un solel saclich'an ta scoj ti ep chlo'ilaj yo'ntone. 17Tsots tsacbil ta xi'el, ta xnic scotlijil, chvinaj ta q'uelel ti oy c'usi toj tsots c'ux cha'ay ta yo'ntone.
18Li cristianoetique iloq'uic tal ta snaic, te stsobetic tsnet'ilan sbaic tal ta xoraltic yu'un chtal scoman c'opanic Dios ta sventa ti ta soquesat xa li ch'ulnae. 19Li antsetique la stsequinic coxtal poc' sventa me'nal ti toj ch'ixlajan ta lapele, nojem yu'unic li xorale. Li tsebetique mu to stac' xloq'uic ta xoraltic, oy batic ta anil ta sti' snaic; li yane muyic ta coralton xchi'uc bat nach'iicuc ta sventanail snaic. 20Scotolic la xbech sc'obic ta vinajel, la snaban sbaic ta vocoletel ec c'alal la sc'opanic Dios scotolique. 21C'alal laj yilic li viniquetique, tal xc'uxul ta yo'ntonic ti buyuc xa no'ox tanpuc quejajtique, xchi'uc li banquilal pale ti toj ep c'ux cha'ay ta yo'nton li vocoliletique.
22C'alal la svocoletanic li Cajvaltic ti scotol xu' yu'un ti ac'o xchabibe, li c'usitic la snaq'uic comel sventa te ta ch'ulnae, 23li Heliodoroe ja'o laj yac' persa li c'usi snopoje. 24C'alal te xa oyic ta yavil taq'uin xchi'uc jchabivanejetic yu'un li Heliodoroe, li Cajvaltic ti ja' spasoj ta mantal li yaj'almantaltaque xchi'uc ti scotol xu' yu'une, laj yac' ta q'uelel smuc'ul stsatsal. Ja' yu'un li boch'otic jmoj ochemic batel xchi'uc Heliodoroe, solel ixi'ic, aluben icomic, xchi'uc mu xa xbaq'uic c'alal laj yilbeic stsatsal li Diose. 25Te laj yac' sba ta q'uelel jcot ca', lec t'ujum smontura yich'oj, te cajal jun vinic ven xi'bal sba. Iva'i li ca'e, tsots ilubiat li Heliodoroe. Li boch'o te cajale oy smac pasbil ta c'anal taq'uin yilel. 26Jech noxtoc te ivinaj chib queremetic ven t'ujumic xchi'uc toj tsots yipalic, toj c'upil sba li sc'u' spoq'uique. Ta jujujot xocon laj yac' sbaic ti bu oy li Heliodoroe. Laj yac'beic nucul xchi'uc la xbalch'unic ta majel, mu'yuc spajebal laj yac'beic. 27Li Heliodoroe ta ora ibalch'uj ta banamil, bats'i ic'al ac'ubal icom laj ya'ay. Ta ora laj yiq'uic batel laj yaq'uic ta q'uechubte'. 28Ja' jech laj yotquinbeic lec c'u x'elan smuc'ul li Diose. Yu'un jutuc xa'ox sc'an x'ochic batel ta snail taq'uin ta stoyobbail li Heliodoro xchi'uc li jchabivanejetic yu'une, yu'un mu'yuc c'usi xu' yu'un ta spas stuc.
29Jech yu'un ta stsatsal Dios ti balch'uj ta banamile, xchi'uc ti macal ye icome ti solel mu'yuc xa c'usi xu' yu'un oe. 30Li israeletique la stojbeic ta vocol li Cajvaltique, yu'un laj yac' ta q'uelel slequilal te ta xch'ul yavil stuc ta ch'ulna ti bu to'ox i'ayin muc'ta jal li xi'ele. Pero c'alal laj yac' sba ta q'uelel li Cajvaltic ti scotol xu' yu'une, laj xa sta lec xcuxetel yo'ntonic.
31Li xchi'iltac Heliodoroe te ibatic ta anil ta stojol li Oniase, yu'un bat sc'anbeic ti ac'o sc'opan li Dios ta vinajele, ti ac'o to cuxiuc li Heliodoroe, yu'un ta xa xcham. 32Li banquilal palee la snop me chopol c'usi tsnop muc'ta ajvalil ta sventa li israeletique, me tscuy ti ja' la sa'beic svocol li Heliodoroe, ja' yu'un laj yac'be milbil matanal li Diose yu'un ac'o coluc. 33C'alal laj yac' chic'bil matanal banquilal pale ta sventa li mulile, ivinajic yan velta li chib queremetic ta stojol li Heliodoroe. Ja' ono'ox jech slapojic li sc'u'ic ti c'u x'elan slapojic ta ba'yuque. Te iva'iic ta stojol jech laj yalbeic: “Tojbo xa ta vocol li banquilal pale Oniase; yu'un la sc'opan Cajvaltic ti jech lacuxi toe. 34Jech yu'un li' ta orae laj xa avich' stojol amul yu'un li Diose. Albo me batel scotol cristianoetic c'u x'elan stsatsal svu'el li Diose”, xutic. C'alal laj yalic jeche, te isacch'ayic batel.
35Li Heliodoroe laj yac' lec milbil matanal ta stojol li Cajvaltique. La sc'opan ti boch'o i'ac'bat to xcuxlejale. La sc'opan comel li Oniase jech isut batel ta stojol muc'ta ajvalil xchi'uc li yajsoldadotaque. 36Laj yalbe batel scotol cristianoetic ti c'u x'elan i'ac'bat sq'uel stuc li sq'uelubil stsatsal Muc'ul Diose.
37Li muc'ta ajvalile la sjac'be Heliodoro boch'o xu' tstac batel yan velta te ta Jerusalene, jech itac'ov: 38“Me oy boch'o junucal chopol chayilote, xchi'uc me oy boch'o tscontrain li jlumaltique, ja' taco batel ya'ay. Te chavil ti chopol xa tsut tale, te chvinaj me cuxul to tsut tale; jamal chacalbot ta melel li lum le'e, setubil ta stsatsal Dios. 39Li Dios ta vinajele ja' ta sq'uel ta xchabi li lum le'e. Me oy boch'o te chbat, me chopol c'usi chbat spase, te ta xcham, jech ta stoj smul o”, xi.
40Ja' jech ilaj sc'oplal li Heliodoroe xchi'uc li c'u x'elan muc xbat ta pojel li sc'ulejal ch'ulnae.
Currently Selected:
2 Macabeos 3: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.