2 Macabeos 2
2
Li Jeremiase la snac' li c'usitic chtun ta sventa yich'el ta muc' Diose
1Te ts'ibabil comel ta smuc'ta vunal, li j'alc'op Jeremiase laj yalbe li boch'otic chucbilic batel ti ac'o yich'ic tal li c'oc', jech chac c'u cha'al laj xa ca'aytique. 2Xchi'uc c'alal laj yac'be ta sc'obic li svunal mantaletique, laj yalbe comel li boch'otic chucbilic batel ti mu me xch'ay ta yo'ntonic li mantaletic yu'un Cajvaltique, ti mu me xbatic ta lo'lael ta sq'uelel li sloc'obal diosetic ti pasbilic ta c'anal taq'uin, ta saquil taq'uin ti t'ujumtasbilic ta xpixe. 3Oy to ep yan c'usitic i'albatic noxtoc ti c'u cha'al mu me scomtsanic xch'unel li smantaltac Diose:
4“Ta vun le'e te chal noxtoc ti i'albat yu'un Dios li j'alc'op ti ac'o yich'ic muyel ta jol vits li ch'ulna pasbil ta nucule xchi'uc li xcaxail smantal Diose, ja' li jol vits yo' bu i'ac'bat sq'uel Moisés li banamil ti ta x'ac'batic yu'un Diose.#Dt 32.48-52. 5C'alal ic'ot ta jol vits li Jeremiase, te la sta jun nailch'en, ja' te la stic' ochel li nuculetic sventa ch'ulnae xchi'uc li xcaxail smantal Diose, xchi'uc li scajleb xchic'ubil pome, ts'acal la smac comel li nailch'ene. 6Oy jayibuc xchi'iltac isutic batel ta xchaq'uelel sbelal ti bu stuq'uil xcome, pero mu'yuc xa staic ta t'unel bu xcom. 7C'alal laj ya'ay li Jeremiase, jech laj yal: ‘Li banamile mu'yuc otquinbil ta xcom, ja' to me la xcha'tsob steclumal li Diose. 8Jech yu'un li Cajvaltique ja' ta xlic yac' ta q'uelel scotol. Ta xlic vinajuc slequilal yutsilal li Cajvaltique xchi'uc li toc jech chac c'u cha'al li toc ti laj yac' sba ta q'uelel ta yorail li Moisese, xchi'uc ta yorail li Salomón c'alal la sc'anbe Cajvaltic ti ac'o ts'u'iltasbiluc ta slequilal chcom li ch'ulnae’, xi.
9“Te ts'ibabil noxtoc c'u x'elan laj yac' milbil matanal ta sbijil#Cf. 1 R 3.3-28; 4.29; 8.62-64. li Salomón c'alal yich' ts'u'iltasel li ch'ulna c'alal ivu' ta pasele. 10Xchi'uc te chal noxtoc ti la sc'opan Cajvaltic li Moisese, jech iyal tal c'oc' ta vinajel, la xchic' li milbil matanale.#Lv 9.24. Xchi'uc te chal noxtoc c'u x'elan la sc'opan Dios li Salomone, jech iyal tal c'oc' ta vinajel, la xchic' scotol li chic'bil matanale.#Cf. 1 R 8.62-64; 2 Cr 7.1-5. 11Li Moisés ta vo'onee jech laj yal: ‘Li milbil matanal sventa xch'ayubil mulile ic'ac' ta c'oc' ta sventa ti mu'yuc chich' ti'ele’, xi. 12Ja' jech co'ol la spas ec li Salomón c'alal la spas vaxquib (8) c'ac'al q'uine.#Cf. 1 R 8.65; 2 Cr 7.9.
13“Jech noxtoc te ts'ibabil comel ta vunetic yu'un Nehemías ti c'u x'elan la stsob ta jbej snail li epal vunetique, ja' li svunal yabtel ajvaliletique, xchi'uc li c'usitic ts'ibabil comel yu'un li j'alc'opetique, xchi'uc li Davide, xchi'uc svunic li ajvaliletic c'u x'elan sc'oplal matanale. 14Ja' jech la spas ec li Judase, la stsob scotol li vunetic ti laj yich' puclinel batel ta scoj li tsots pleito la jtatique, ja' li vunetic li' oy ta jc'obtic ta orae.#Cf. 1 Mac 1.56-57. 15Ja' yu'un me oy bu chtun avu'unique, taquic tal jayibuc boch'otic ac'o tal yich'ic.
16“Li' ta orae jutuc xa sc'an xich' pasel jun q'uin sventa ta xich' lecubtasel li ch'ulnae. Ja' yu'un ta jts'ibabotcutic tal ti ac'o apasic ec li q'uin ta sc'ac'alil ta jpascutique. 17Li Dios ti la scolta scotol li steclumale, ti laj yac'be sutel scotol li c'usi ac'bilic ono'ox comele, li ajvalil yu'unique, li paleetique, xchi'uc li lecubtasel,#Cf. Ex 19.6. 18jech chac c'u cha'al yaloj ta mantaletique, ta jna'tic ti mu xa jaluc sc'an xlic c'uxubajcutic ta yo'ntone, xchi'uc ti ja' chlic stsobutic batel ta xch'ulna ti buyuc no'ox oyutic batel ta yolon li vinajele,#Dt 30.3-5. yu'un laj xa scoltautic loq'uel ta scotol li tsatsal vocoliletique, xchi'uc laj xa slecubtasbutic li ch'ulnae.”
Ja' li c'u x'elan chich' ts'ibael li vune
19Li Jasón liquem ta lum Cirenee la sts'iba ta vo'poc vunetic li sc'oplal Judas Macabeo xchi'uc xchi'iltac ta voq'uele, xchi'uc ti c'u x'elan laj yich' lecubtasel li ch'ulnae,#2 Mac 10.1-8. xchi'uc ti laj yich' ts'u'iltasel li scajleb matanaletique, 20xchi'uc c'u x'elan la spasic pleito xchi'uc li muc'ta ajvalil Antíoco Epifanese, xchi'uc li xnich'on Eupátor#2 Mac 10.9—13.26. sbie, 21xchi'uc c'u x'elan laj yac' ta q'uelel stsatsal Dios ta stojol li tsatsal viniquetic ti la scoltaic ta paspleito li judioetique. Lec ivu' yu'unic stsalel manchuc me mu'yuc epic, ivu' yu'unic la spojbeic scotol c'usitic oy yu'un scotol li lumetique. La snutsic batel li yanlum soldadoetique. 22Ivu' yu'unic, laj yu'uninic yan velta li ch'ulna ti vinajem sc'oplal ta scotol banamile. Xchi'uc la spojic li lum Jerusalene, xchi'uc la xcha'cuxesic li mantaletic yu'unic ti c'an xa'ox ch'ayuque. Yu'un li Cajvaltique laj yac' ta q'uelel slequil yo'nton ta stojolic. 23Jech li vu'utique ta jpoc xa no'ox svunal ta xcom cu'untic ti bu vo'poc svunal la sts'iba comel li Jasón liquem ta Cirenee.
24Laj xa jq'ueltic ti toj ep otoletic, ti toj tsotsic c'usitic te ts'ibabile. Li boch'otic ta sc'an ta xchan ta ach' li c'usitic ic'ot ta pasele, mu xcom yu'un scotol. 25Ja' yu'un ep la jnopcutic c'u cha'al c'un ta alel cha'yic li boch'otic jech yo'nton tsc'an tsq'uelique, yu'un jech xu' ta xcom ta yo'ntonic li boch'ouc no'ox tsc'an xchanique, xchi'uc c'u x'elan xu' chtun yu'unic li boch'otic ta sq'uelique. 26Ja' yu'un li vu'uncutique toj tsots ta liquesel laj ca'aycutic li abtele. Ja' jun tsatsal abtel, mu c'unuc ta pasel, ta chiq'uinajel xchi'uc viq'uiluc no'ox jsatic tsc'an ya'yel. 27Li abtele toj tsots, ja' jech chac c'u cha'al boch'o ta xchapan ve'lil ti tsc'an chac'be lec sve'elic ti c'u cha'al lec mu cha'yic li yantique. Li vu'une ta jc'an ja'uc jech chicom ta jpasve'lil ya'yel ti ac'o tunuc yu'un scotolique, ac'o me toj vocol chca'ay li abtele. 28Ja' yu'un ta xcac'becutic sventain li boch'otic ta sts'ibaic li c'usitic ic'ot ta pasele, ti ac'o sts'iba lec ta scojol-cojole. Ta xcac'becutic yipal sts'ibael ti butic lec tsotsic sc'oplale. 29Li vu'uncutique ja' co'oluncutic jech chac c'u cha'al jq'uel abtelal ti bu chich' pasel ach' nae, ti ja' yabtel tsventain lec c'u x'elan lec chbate. Yan li boch'o ja' no'ox ta sbone xchi'uc li boch'o ja' yabtel st'ujumtasele ja' no'ox ta sventainic li jujuchop yabtelique. 30Li boch'o ja' yabtel o sts'ibael li a'yej lo'ile, ja' yabtel ta snop lec ti c'usitic ic'otan ta pasele, ta scojolcoj ta xchapan comel. 31Pero me oy boch'o tsc'an ta sbic'tajes li lo'il li c'usitic ic'otan ta pasele, xu' ti mu biq'uiticuc sts'iba comel scotole. 32Ja' lec jliquestic xa xcholel li c'usitic ic'otan ta pasele. Mu persauc toj nat chcac'tic li sliquebe, yu'un altic toj nat chcac'betic sliqueb me ja' comcom no'ox chcac'betic li ya'yejale. Ti c'u x'elan calojcutic xae yu'un naca me ta x'epaj batel li sliqueb slo'ilale, naca me te motol chcom li bu tsots sc'oplal li poco' lo'ile. Ti c'u x'elan calojcutic xae, naca me te soc, o me te i'epaj li slo'ilale, naca me te chlic yich' cholel yan velta ti c'u x'elan albil xa li poco' lo'ile.
Currently Selected:
2 Macabeos 2: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.