1 Corinthien 5
5
Paul achakole ebuliki a Nzambe ekielele n’ènyèzèlè yango bango tanyèzama bakoncha bango badi o cha machuma.
1Chango edi bwe, bochembi bodi o phanyak’a beni, bochembi bwango bato bango bach’owoka mawò ma Nzambe ka badi ekumba ikiela twa, koncha ekwaki mwachi a chango a wango.
2Na beni bodi na nganga. Ebèki enyòngò mo beni bolelaki, tika koncha wango ekielaki botoma bwango amichibe o phanyak’a beni.
3Nga di odyala na beni na nchoto ka, ko, nga di na beni n’èyaye, na nga chil’ochòchò ko nga bèki na beni ondo bona bwe,
4koncha wango ekielaki botoma bwango, o kombo a Mokonchi Jésus o bèni bachò bokokane na beni, na biyaye ba bèni bichanganaki,
5moto wo tayiliba o mabòkò ma Satana na nguli a Mokonchi ma bèni Jésus, tonga n’ichèbiza nchoto a wango, echoko eyaye a wango techungiba o bucha ba Mokonchi Jésus yango.
6Botochibe ba beni bodi odyala bonyòngò ka. Beni bodi oyeba ka levain iki ichekole mapha machò na bokè?
7Bomichaka levain ikale, echoko beni todyala mapha matemu yango, kobona beni bodi levain twa, tonga Mwan’a Gbata a Pâque abichil’obomibe, wango adi Christ.
8Tika bèni bodye beka ba yenga monè ma Nzambe edi odya mapha ma levain mokale ka, nyò mapha ma levain m’èyubi n’ibèli ka, ko, o ch’a mapha mango madi levain twa, madi mapha ma chèchè na nènè.
9Nga bikòtè o ma beni o ch’a mokanda bwe, todyalake kophay mò na baphele ba bochembi,
10nga boloba tonga na baphele ba bochembi ba che ka, nyò bato banyimi, nyò bachangoli ba beka, nyò babinichi ba machana, tonga kobona ebèki kokomo beni bolangwaki o che.
11Ko, nga bikòtè ma beni bwe, todyalake kophay mò na moto wango atangibe mwan’a Nzambe, ko, wango adi moto a bochembi, nyò monyimi, nyò mobinichi a machana, nyò koncha wango edi na mbechi, nyò monywe a malèku, nyò mochangoli a beka, na todyake enongo yò na wango.
12Nga di n’iwò ichamba bato bango badi odyala bana ba Nzambe ka botote iphe? Beni bodi ochamba bato ba Nzambe botote ka?
13Ko bakoncha bango badi odyala bana ba Nzambe ka, Nzambe tachamba bango botòtè. ”Bomichaka koncha wango edi n’ibèli o phanyak’a beni.”
Currently Selected:
1 Corinthien 5: BUI1947
Highlight
Share
Copy
Want to have your highlights saved across all your devices? Sign up or sign in
Published in 1947, by Örebromissionen, now part of the Evangelical Free Church of Sweden (Evangeliska Frikyrkan).
