1 Corinthien 4
4
Paul adikize bana ba Nzambe bwe, badyale ko bapôtre bona na bachangana o cha makambi tonga na Christ.
1Kobona tika bato batange banga ko bachali ba Christ bona, na ko babateli ba beka ba Nzambe ba yiche bona.
2Tonga badi oyenga eyeka akbwi na babateli ka eyeka yango bango taye takana n’ètungu phencha.
3O ma nga nyò beni bochambe nga botote, nyò miyeko ma bato, nga kacha o myango twa, na nga di ochamba nchoto a ngi koncha botote ka.
4Nga di oyeba eyeka nyò yò o ebati a ngi koncha ka, ko, echw’a nga edi odyala tonga n’èdyalele yango ka, koncha wango echambe nga botote edi Mokonchi.
5Echoko beni todyala ochamba eyeka nyò yò botote kokoko ncho Mokonchi toya yango, koncha wango tetubiza beka ba yiche o phololo, byango bibèki bibombiba o boyi na mwango totubiza kuku a mitemo o phololo, o bobiko bwango moto ikika tayamba botochibe ba Nzambe.
6Banyango ba baphele ba nga b’èbati a Nzambe, beka bichò bi nga bichekola ekoko a nga n’Apollos tonga na beni; tonga nga dinge beni boyekole bwe, ”tolekizake beka bakbwi na mawo mango makòtibaki”, echoko beni tikondizi manchoto moto ikika na modikichi a wango yango.
7Elobe bwe, k’òdi na ndombo o bocho ba moninga nda? Na beka byango bidi na kò bibophèba na kò ka? Mo k’òbiyamba byango na k’òtoche nchoto a kò koncha ko k’òboyamba byango ka bona, mbekende?
8Beni bochil’owute, beni bochil’ochekwe bamandi, beni bochekwaki bakomandi ko, odya na banga ka, ebèki enyòngò mo beni bochekwaki bakomandi, echoko banga bobichangana na beni o ch’a bokomandi yango.
9Nga chimunye bwe, Nzambe atikaki banga b’Apôtre o chima bato bachò, ko bato bango babichambiba botote ba bowe bona, bachekolaki banga ko beka ba motali a che bona o bocho ba bangelo n’o bocho ba bato.
10Banga bodi na mangè tonga na Christ, ko, beni bodi bokièngu o ch’a Christ, banga bodi na lèlèkè, ko beni bodi na nguli, batoche beni, ko, badyanchole banga.
11Kokoko ncho bobiko bu banga bodi na nchala na banga bodi na phocha mè, banga bodi bolumbu na banga bophèbe maphakata, na banga bodi odyala o mandako n’ichimbo ka,
12banga bokiele mochalo na mabòkò ma banga kot’èkielele. O bango bakindele banga, banga bochangize bango, o bango baluphachane na banga banga obutiza eba ka,
13o babèche banga, banga bobutize mawò manyòngò, banga buchekwa mawulu ma che, na banga buchekwa dyolo ibwakiba o dyalaka kokoko nchò kinòwa ye.
14Ngo kotè mawò ma tonga n’ikana beni choni ka, nga kòtèki mango ko beni bodi bana ba nga bakonde bango nga teye bona.
15Tonga mo beni bodyale na bachebichi o ch’a Christ dix mille, beni bodi odyala na bachango bakama ka. Tonga nga bibota beni o ch’a Christ Jésus na mina minyòngò.
16Echoko nga teye beni bwe, bokielaka ko nga kiele bona yango.
17Echoko nga tindaki beni Timothée yango, wango adi mwan’a bole a nga n’ètungu o ch’a Mokonchi, wango tabatiza beni manè ma nga o ch’a Jésus Christ, ko nga dikize a binongo bichò n’o bibuliki bicho bona.
18Bana baninga babitonda na nganga, bango bachimunye bwe, nga tipholi o ma beni.
19Ko, mo Mokonchi modinge nga taya o ma beni dyolo, na nga tamèchènè na nguli a bato bango badi na nganga, odya mawò ma bango ka.
20Tonga bokonchi ba Nzambe bodi odyala o mawò ka, ko, na nguli.
21Beni boyenge nde? Nga taya o ma beni na ngiekèkè, nyo n’èlumba n’Eyaye a ndèphè?
Currently Selected:
1 Corinthien 4: BUI1947
Highlight
Share
Copy
Want to have your highlights saved across all your devices? Sign up or sign in
Published in 1947, by Örebromissionen, now part of the Evangelical Free Church of Sweden (Evangeliska Frikyrkan).
