Roma 5
5
“At Allah en pobuk emin togolik hwedik taknenebesimu welege o,” oluk moʼgulentesi wene
1Yogodak e, nis nenede Allah ebam heʼberik pege ai en, wene nenebam aʼge noʼgorlogo wokholuk emin togolik hwedik taknenebesimu, nonue ʼgain Onuk Logo aʼge Yesus Kristus tegei ai pam Allah emin laʼbulik welege. 2Nis nenede Yesus ebam heʼberik pege ai pamat, at en Allah ebabut op ano en obapnenebiso ai eragam nenebesi ai en nenede eberak poluk welege. Welat, Allah erliktogwi modok welagai ai ʼgelaʼge, nis asogoat erliknonobua o, oluk nonogola nenagai hogu lege. 3Ai paget nak nonogola nenagai hogu lege puk. Di obotut yu obotut hogu lege ai pam, nenede hurle ago ai en e, asogo wiagapnonobogukhwe, nonogola nenagai hogu legeat o. 4Nenede hurle agalat ologun pam e, Allah en nenebabut ʼbalogo re, op oso. Asogo oso ano pam, pobuk demat op ema o, oluk nonogola nenagai opogu lege. 5Op ema oluk nonogola nenagai opogu lege ai pam, Allah en Arogun woknentesimu nonogola welat, ik naʼgogwi ʼgelaʼge, Allah en edeapnenebiso aʼge ai nonogola loksogo nenebasu ai pam nonogorlok erlaksogo welege o.
6Nis e, Allah ebe ukpoluk walek lai legerik, nenebe miayat oruakma, at Allah en e,
“Is asogo oruak ai paget, Kristus ai erlige waremak o,” oluk epesi ano pamat, ebe werigisema waraga ai o. 7Ap mesik en e,
“An nebe at ebabut hegit aʼge ai paget, ebalema wareik,” oluk u re, eʼginat o. Eʼginat aʼgeat de, ap mesik ogorlok erlak aʼge en e,
“An nebe ap ebabut op aʼge ai paget ebalema wareik o,” oluk opoat hwi a. 8Asogo aʼgeat de, at Allah nenebe ede en tago ai enagat emagoluk, nis wiak togwi oruakma, Kristus ebe woknentesimu nenebalema waraga ai o. 9At Kristus mep enamogo waraga ai pam, wene nenebam aʼge noʼgorlogo wokholuk Allah emin pobuk togolik hwedik taknenebesirikmu no oluk e, pobuk Allah olot het nenebam pasuam delnonobua erlak no? Delnonobuayat o. 10Nis naduk e, Allah emin hwerlirak oruakma re, pobuk at omlogo waragalat, Allah nenemin laʼbulogo nenebesimu welege o. Asogo oruakma, at ebe elaluk welat e, delnonobua erlak no? Naduk delnonobu erlakma delnenebegeitik e, yogodak nenemin hwedik welat delnonobuayat o. 11Aʼge re, ai nak puk. Nonue ʼgain Onuk Logo aʼge Yesus Kristus tegei ai pam, Allah emin pobuk togolik hwedik taknenebesimu emin op welege ai en e, nonogola nenagai hogu lege o.
Adam en wiak tegeimu re, Kristus en op tegei wene
12Wene ai re, disogo ʼgelaʼge. Ap mesigat aʼge wiak tegeimu re, wiak edip at ebam en aphwami ʼberlegat wiak nenebam aga. Asogo nenebam agama re, nenebe ʼberlegat wiak til wagaimu, ologun pam e, nenebe ʼberlegat waretil waga lege ai o. 13Wene Allah en nenesaʼgo weregei wene ano owan nenesaʼgo werak erlak oruakhwe re, aphwami wiak togu legesa. Aʼge re, enesaʼgo owan werak erlakma re, Allah en,
“Is wiak tigisa o,” oluk wene enebam ogo po erlagat welaga. 14Wene enebam po erlak aʼgeat de, ap Adam welaga hwerli en, ʼbekhit Musa welaga eria hwerli re, waragai edip aphwami ʼberlek enebam anniat agarik e, waretil wegesa ai. Aphwami logon en, at Adam Allah en esaʼgo weregei wene sagalogo wiak tegei ʼgelaʼge, asogo tu erlakmayat de, waragai edip ai enebam agama re, waretil wegesayat o. Ye, at Adam tegei ai, at pobuk waga aʼge ai wemarik e, ebe tua aʼge paget elitsogo ʼgelaʼge tegei.
15Asogo aʼgeat de, eʼbirek enebabut mesigat puk. Ebe re, Allah ebabut op en weat woknentesi aʼge ai modok lokma re, at Adam Allah iak sagalogo wiak tegei ai eʼbirek walhoma re, eʼbirek hegit erlak o. At mesigat aʼge en wiak tegeimu, ologun pam e, enebe aʼbigat waretil wagai o. Aʼgeat de, Allah ebabut op en Yesus Kristus weat woknentesimu, ap ebe mesigat aʼge en op tegei pam, op edip aphwami aʼbigat nenebam wiyalagama welege. 16Ap mesigat en Allah iak sagalogo wiak tegei pam, Allah en e, wene ebam poluk wiagap pesi ai o. Asogo wiagap pesimu re, pobuk aphwami wiak modok til wegesa aʼgeat de, at Allah ebabut op en weat oʼgo erlak moʼgulnentasulat e,
“Wene henebam erlak o,” oluk noʼgorlogo wokhesi. 17Ap mesigat en Allah iak sagalogo wiak tegeitik, waragama re, waragai edip at ebam en anni agarik e, wiyalaga ai. Asogo aʼgeat de, Allah ebabut op en, Yesus Kristus weat woknentesimu, at ebe mesigat aʼge en, op tegei ai nak e, lok logo modogat o. Asogo tagalat, wene nenebam aʼge weat noʼgorlogo wokholuk Allah emin togolik hwedik taknenebesimu, at emin hwedik nenelaluk welat nenannisogoat op wolomul o.
18Wene egi ai re, disogo egi epegi. Ap mesik en Allah iak sagalogo wiak mesik erligeat tegei ano, ologun pam e, aphwami ʼberlegat wene enebam poluk wiagabenebegei ai ʼgelaʼge, ap mesik en Allah iak hwelak poluk hegitsogo mesik erlige tegei ano pam, wene aphwami ʼberlegat enebam aʼge noʼgorlogo wokhasulat, enelalugap enebasulat, tegei. 19Ap mesigat en Allah iak hwelak poluk tu erlakma en wiak tegei ai pam e, aphwami enebe aʼbigat wiak til wagai ai ʼgelaʼge, ap mesigat en, Allah iak hwelak poluk tegei ai pam e, aphwami nenebe aʼbigat wene nenebam aʼge noʼgorlogo wokhesimu Allah ogola agai aʼge ʼbekhit togu lema ai o.
20Aʼge re, at mesik wiak tegeitikmu Allah iak sagalogo wiak togwi aʼge eʼgin emagoluk, Allah en wene nenesaʼgo weregei wene pobuk woknentesi. Wiak togwi ai wiyalagarik lasukhwe re, Allah ebabut op en edeapnenebiso ai, di aʼge yu aʼge ebam en hialogo noʼgwi ʼgelaʼge, edeapnenebisoam loksogo wiyalagarik lasu ai o. 21Wiak toluk waragai ai pam, wiak togwi aʼge anni aga ai ʼgelaʼge, nonue ʼgain Onuk Logo aʼge en wene nenebam aʼge noʼgorlogo wokholuk, Allah emin hwedik taknenebesi ai pam, Allah ebabut op en edeapnenebasu aʼge ai anni agama re, nenelaluk modok wolomul ai o.
Currently Selected:
Roma 5: WUL
Highlight
Share
Compare
Copy
Want to have your highlights saved across all your devices? Sign up or sign in
