Peragenebesi 12
12
Allah eiyagai di obotut yu obotut loksogo tagonobogu legesa wene
1Asogo togu legesa eria hegit e, ap ʼgain onuk logo aʼge Herodes en Allah eiyagai aʼge logon wiagabenebiogoluk tegei. 2Asogo tegeitik, at Yohanes ue Yakobus woruagoluk osi moʼgulentesimu ʼgarok pam ebe modogat werigisa. 3Asogo werigisema, at Herodes ogola en e,
“An asogo taga legi ai pam, is ap Yahudi aʼge onogola enagai modok aʼbik hegesa o,” oluk, pobuk Petrus eʼgik herle woruagoluk osi moʼgulentesimu, seni roti periso erlak aʼge noʼgukhwe re, at eʼgik herle werigisa. 4Asogo werigisarik e, o aphwami eneʼgik herle wusogo onobogumu eba pei legesa. Pei legesarik e, ap tentara aʼge enebe 16 en welat e, naduk enebe ugan en tenakho welat, pobuk nin enebe ugan en tenakho welat, togu lemagoluk yoʼgo onoboluk e, at ʼgain Herodes ogola en e, disogo epesi,
“Seni onuk Paskah, nul aʼge ano arat noluk e, Petrus wik-wok aphwami enilem wene ebam poluk woruok en, eʼgik herle weragat welemak o,” oluk ogola epesi. 5At Petrus eʼgik herle wusogo ʼgwelakpoluk oruakhwe re, is Allah eiyagai en seʼban at ebaget mo u erlakma en, hwedik-hwadigat enedemu enat modok ogu legesa.
Allah en Petrus eʼgik herle hebilogo lebikpesi wene
6Seʼban asogo ogukhwe re, at ʼgain Herodes en hubet ʼgelaʼge Petrus ebe wik-wok aphwami eneʼgik pam paiogoluk ede epesirik, owan oruakhwe re, o ai erlige hup, ap tentara aʼge ebano, is enebe pema ʼgodukmu ʼgagalak oruakhwe, enebe ʼbiren mesik Petrus eʼgik pema pema herle wusogo nogo osokhwe re, is abel pema pema welat herle ologun eneʼgik pam erlilogo welegesa. 7Asogo oruakma re, malaikat nonue ʼgain Onuk Logo aʼge en yoʼgo ʼbelagonobou wago aʼge ebano mesik ʼga en ʼgelaʼgeat eba inagoam e, o holu ogorlitakma ebano modok atia aga. Asogo atia agama, at malaikat ano en e, Petrus elaluk emagoluk eʼgik en abel akhit dunghasulat, disogo moʼgulesi.
“Perlene inemen,” oluk moʼgulesimu inagoam e, ʼbesimeʼgen ano eʼgik pam en ʼgoboksogo ʼbegei. 8ʼBegeimu re, at malaikat ano en e, disogo moʼgulesi,
“ʼBagaluk ʼbuktagalat, hoyuk sum ʼbuktagalat, tin o,” oluk moʼgulesi. Asogo moʼgulosoam ʼbuktegeimu re, at malaikat ano en e,
“Sum oʼborl oʼgwe aʼge ʼbuksogo re, neʼberlik suk o,” oluk moʼgulesimu, 9eʼberligat libaga. Libagalat e, at malaikat ano en demat tegei aʼgeat de, at Petrus ede nalagama welat e,
“Nabi hasu legi hwi a,” oluk ede epesi. 10Ap tentara aʼge enebe ogola oʼborlma ʼgagalak welegesa aʼge ebano oruakhwe, eneragam oʼgwe libegesarik e, ʼgoduk edip akhit o selimu lebagaimu eba ebe ʼbesimeʼgen pam tak oʼgwe libomogoluk tugumu re, ʼgoduk omuat huragama libegesa. Libegesarik ebela lok oʼgwe lagalat, at malaikat ano Petrus ukpoluk ʼga laga ʼgelaʼgeat nalaga.
11Nalagama, at Petrus ede eʼgat agarik e, ogola en e, disogo epesi,
“I. At ʼgain Herodes anni pam tenniarok oruakma, is aphwami Yahudi aʼge ʼberlek en e,
Disogo tua o, oluk nobok ʼbalugukhweat, malaikat nonue ʼgain Onuk Logo aʼge en demat yoʼgo ʼbelakpou wagama herle hebilnebegei hegi,” oluk pobi tegei. 12Asogo pobirak poluk e, ap onuk Yohanes ogulat, Markus ogulat, ogwi aʼge ai ia hwe Maria owi pam eba aphwami enebe esanat odoktigisarik e, seʼban ogumu laga. 13Lagarik e, ʼgoduk pam eʼgik ʼbak-ʼbakhasuam, is ebano en e,
“Sa en ʼbak-ʼbakhasu,” oluk hwele eneragam aʼge mesik onuk Rode ai hau waga. 14Il hau wagarik, Petrus iak enak aʼge pobirak poluk, ogola agai en, ʼgoduk hutho erlakma enat ukpoluk pungtak ʼgwegeitik e,
“Petrus ʼgodukmu wagarik oruak o,” oluk moʼgulentesi. 15Asogo moʼgulentesimu, is en e,
“Eige. Hwele yu, hede ʼbalaga hegi,” oluk moʼgulegisema, at en e,
“Erlak o. Demat o,” oluk iak ningsogoat egei. Asogo egeimu, is en e,
“Holuk e, ai malaikat Allah en yoʼgo ʼbelagonobou wago aʼge ebano, mesik Petrus paget ʼbelakpou waga aʼge hwi a,” oluk egesa. 16Asogo ogukhwe, at Petrus ebe ʼgodukmu welat, ʼgoduk ʼbak-ʼbakhasu modok mo egei. ʼBak-ʼbakhasu modok mo egeimu re, is ebano en ʼgoduk husogo yethai legesa ʼgal e, Petrus oruakma hegesarik erliktigisa. 17Erliktugumu, at en e,
“Heniak ogup o,” oluk eʼgik sebelhesi. Eʼgik sebelholuk e,
“Neʼgik herle werak oruakma, nonue ʼgain Onuk Logo aʼge en hebilogo lebiknobou wagama wegi o,” oluk wene ʼbeliʼgogo moʼgulentesi. Asogo moʼgulentesirik,
“Yakobus emin, narilak norokhwi Allah eiyagai logon enemin, wene yu moʼgulentai lu o,” oluk moʼgulontoluk e, at ebe o momu laga.
18Asogo libagama, nogoluk loruk oʼgwe hubetsogoat, is ap tentara Petrus ʼgagalak welegesa aʼge ebano en e,
“Petrus ano ebe ʼga laga,” oluk eniak logat sagaligisa. 19Eniak asogo sagaligisema re, at ʼgain Herodes ano en Petrus ebe horotuagoluk ap logon moʼgulentesimu horotigisa aʼge, ebe erlagat en e, is ap tentara ʼgagalak welegesa aʼge ebano enemdema wokholuk e, enebe modok waronobuagoluk osi ado yoʼgo enebesi. Yoʼgo enebesimu enebe warenebegisema re, at ʼgain Herodes ebe o Yudea en e, o kota Kaisarea orlu agarik welaga.
At ʼgain Herodes ebe waraga wene
20O eba welat, is aphwami o Tirus emin, Sidon emin, aʼge paget e, at ʼgain Herodes ano olot het aʼbik aga. Olot het aʼbik agama, is ʼberlek enebe laʼbuksogo en e,
“O nis welegema yema re, soʼboru ap ʼgain Herodes oruakma re, oʼgo ʼbalogo obat wogu legerikmu,” oluk ap onuk Blastus, at Herodes eragam aʼge welat di aʼge yu aʼge at owi pam aʼge tenak welaga aʼge ano eʼbek legesarik, is oruak oʼgwe emagoluk, at naduk ede ʼgagaligisa. At naduk ede ʼgagaligisarik e, pobuk Herodes emin laʼboluogoluk eʼbek ʼgwigisarik moʼgulegisa. 21Moʼgulegisema re, at ʼgain Herodes en e,
“Agauwa ai pam en laʼbolul o,” oluk wene weragenebesi. Wene weragenebesi ano pam hegit agama, at en sum ap ʼgaindek ʼbuktogwi aʼge ʼbuktegeitik, wene ologun weriselat aloʼgwe e delak pam hweriogo welagama huragarik, enesaʼgo werigoluk wene edip lebikpesi. 22-23Asogo lebikpesirik enesaʼgo werisoma, is aphwami esan ebano en e,
“Ap yu re, iak aphwami eniak ʼgelaʼge oso erlak o. At e, we, walhebak welago aʼge iak ʼgelaʼge oso yo,” oluk erliktigisa. Asogo erliktigisema erianoat malaikat nonue ʼgain Onuk Logo aʼge en yoʼgo ʼbelagonobou wago aʼge ebano mesik ʼbu agarik e,
“At Allah at erliktu erlakma en de, uʼgwarek erliktegei ai o,” oluk Herodes ebe weregeimu, waʼgo ogola yagaragarik ebe modok waraga.
24Asogo agama re, Allah iagat wiyalegeitik, lok aga. 25Asogo lok agokhwe re, is Barnabas Saulus emin, aphwami Yerusalem aʼge arat lerontoluk e, togolik womogoluk, ap onuk Yohanes ogulat, Markus ogulat, ogu legesa aʼge ano woluk wegesa.
Currently Selected:
Peragenebesi 12: WUL
Highlight
Share
Compare
Copy
Want to have your highlights saved across all your devices? Sign up or sign in
