Sakaria 5

Pongkita ko'onoo: paluluno wunta anu menee

5:1-4

1Mengkita aku mbo'u ngkoraane ka kukitaomo asa paluluno wunta anu menee. 2Motae mala'eka atuu ndi ongkue, ”Hapake anu kinitamu?” Sangkiku, ”Kukitao asa paluluno wunta anu menee; ondauno rua pulu hiku ka molueno hopulu hiku.” 3Ka i'amba mepau ndi ongkue, ”Onaemo andio totonaa anu meluarako umaluo luwuno wita. Hangano, sompo mia anu monako i ndi'ai, kana'umpe anu inonto a laro kalulu atuu da bebasi inso a mpohuku; kanatuu koa mbo'u, sompo mia anu mesumpa nahi mentee i ndi'ai da bebasi inso a mpohuku. 4Kutenaomo totonaa atuu meluarako, kanandiomo pau-Do Ueno luwuakoano, ka ipewinso a laro rahano mia monako ka rahano mia anu mesumpa nahi mentee a nee-Ku, ka merato a rahado saru rumopuo, moiko keu maupo luwuno watuno.”

Pongkita ko'opitu: beine a laro ngkusi

5:5-11

5Aiwaomo mala'eka anu mepau saru ongkue atuu, ipotae ndi ongkue, ”Pengkitamo ngkoraane ka kitaomo hapa anu me'umbaako atuu!” 6Ka ku'amba mesikeno, ”Hapa atuu?” Sangkino, ”Onaemo kusi anu meluarako!” Ipotae mbo'u, ”Onaemo andio wineweudo anu mosa'o i asa wawo wita!” 7Kitao, ulono ntimano tetandeomo, ka asa beine mentoro i larono! 8Ka i'amba mala'eka atuu mepau, ”Onaemo atuu wineweu mosa'o.” Ka i'amba dumandao beine atuu mekule a laro ngkusi ka ipepasiakono watu tima atuu a ngangano kusi. 9Ka ku'amba mengkita ngkoraane ka kukitao orua mia beine meluarako melolaromeene meneeako panino. Ka ondae andio, panido kana panino manu-manu timba'u. Dowawao kusi atuu i olono tolino ka langi. 10Mesikeno aku a mala'eka anu mepau saru ongkue atuu, ”Isua dowawao kusi atuu?” 11Sangkino ndi ongkue, ”I wita Sineari, ta powangu raha pelahumoaado beine atuu. Tewala tetindaomo, onae ira menaao i ra'ai a mpentadeano onaeno.”

Currently Selected:

Sakaria 5: XMZ

Highlight

Compare

Copy