Sakaria 4

Pongkita ko'olima: hulu mengkaru wulaa, keu saitu, ka po'anggano i Serubabeli

4:1-14

1Mala'eka anu mepau saru ongkue atuu wali hawe, wangu aku kana asa mia anu winangu inso a mpoturino. 2Ipotae ndi ongkue, ”Hapa anu kinitamu?” Sangkiku, ”Kukitaomo asa hulu mengkaru, luwuno inso a wulaa, saru loea kodei ponaapa lana i wawono. A hulu mengkaru atuu hinao opitu pelita ka opitu po'iangano sumbu a sompo pelita anu i wawono. 3#Meng. 11:4 Orua keu saitu kongko i horino, asa i koanano loea kodei atuu ka asa i manggalino.” 4Ka ku'amba mesikeno a mala'eka anu mepau saru ongkue atuu, ”Hapake pengkonaano luwuno andio, ueku?” 5Sumangki mala'eka anu mepau saru ongkue atuu, ipotae ndi ongkue, ”Nahi uto'orioke hapa pengkonaano luwuno andio?” Sangkiku, ”Naahi, ueku!” 6#Esr. 5:2Onae mepau ndi ongkue, ipotae, ”Ndiomo pau-Do i Ue ndi Serubabeli, kanandio: Komba saru mosia ka komba saru roso, tendeano saru penaa-Ku, pau-Do Ueno luwuakoano. 7Isemake omue, torukuno anu langkai? I arono i Serubabeli omue gagi wita melembo. Onae ta wawao watu moiko ntu'u tinondaako pebooli: Moiko ntu'u! Tedoa moiko!” 8Ka i'amba haweomo pau-Do i Ue ndi ongkue, kanandio, 9”Kaeno i Serubabeli anu weweuomo pondasino Raha andio, ka kaeno mbo'u ta moko'umario.” Ka komiu mento'orio, nine Ondae Ueno luwuakoano anu tumena aku ndi omiu. 10#Meng. 5:6 ”Ondae anu amba-ambano mpe'uru-uruo pompu'uano anu mengkode-kodei, ira mpo'unde mengkitao watu bininiki a ngkaeno i Serubabeli.

Ka opitu hulu atuu, onaemo mata-Do i Ue, anu mensiroio asa wawontolino.” 11#Meng. 11:4 Ka ku'amba motae ndi onae, ”Hapa pengkonaano orua keu saitu anu i koanano ka i manggalino hulu mengkaru andio?” 12Kompenduano kupepau ndi onae, ”Hapa pengkonaano orua sampano keu saitu anu teposombu saru orua pipa wulaa anu mowaao anu me'uwoi kana wulaa inso i wawono atuu?” 13Sangkino ndi ongkue, ”Nahi uto'orioke, hapa pengkonaano luwuno andio?” Sangkiku, ”Naahi, ueku!” 14Ka i'amba motae, ”Ndiomo orua mia anu inurapi anu mentade umpeda ndi Ondae Ueno asa wawontolino!”

Currently Selected:

Sakaria 4: XMZ

Highlight

Compare

Copy