Ruti 1
1
I Ruti ka i Naomi
1:1-22
1I tempono puu mpobitara mpoparenta ia nto Isaraeli, i witado to Isaraeli hinao mokoninggoa. Lumakoomo asa mia inso i Beteleme-Yehuda, saru kombiano ka orua ira anado pada tama lumako i wita to Moabi ira mpo'ia i ra'ai kana mia mehawe. 2Neeno mia atuu i Elimele, neeno kombiano i Naomi, ka orua ira anano i Mahaloni ka i Kilioni, luwudo to Eparata inso i Beteleme Yehuda. Hawedo i wita Moabi, mpo'ia iramo i ra'ai. 3Ka i'amba mateomo i Elimele, tamano i Naomi, beine atuu mo'iaomo saru anano orua ira. 4Orua ira anano atuu pada mongkombia beine to Moabi: anu ko'aasa neeno i Oropa, anu ko'orua neeno i Ruti. Ka mpo'ia ira i ra'ai moro ta tehopulu nta'u tehineno. 5Ka mate iramo mbo'u orua ira anano, i Mahaloni ka i Kilioni, onaemo beine atuu nami hina orua ira anano ka tamano. 6Nahi tehine mepatindaomo saru orua ira ponino, ira mpekule inso i wita Moabi, nde irongeo motae dopehohawa iramo i Ue bawaa-Do ka moweeako ira kaanga.
7Lumakoomo inso ia mpo'iangaano, saru orua ira ponino. Ia laansala pekuledo i wita Yehuda, 8mepauomo i Naomi ia orua ira ponino, ipotae, ”I lakomo i pekulemo pada i rahano inemiu; Ondae i Ue, Ira mokomengkaao pompehohawa-Do ndi omiu kana pompehohawamiu ia mia anu memate iramo ka ndi ongkue! 9A pompehohawa-Do i Ue, komiu mohawe mbo'u anu mekaria komiu i rahado tamamiu.” Onaemo ka iwoowoo ira, sine butu ira mengese meroku 10dopotaeakono, ”Naahi, kami tumonda komiu ia tongkumiu.” 11Sine ipotae i Naomi, ”Ipekulemo anaku, tembio ka komiu tumonda aku? Nde da aku mokompe'ana mbo'uke anu ta gagi tamamiu te'ipua? 12Pekulemo anaku lakomo, nde tedoa akumo mota'u ba kupekombia. Bakana pinewowoloku: Hinao tama wongi ndio, aku mekombia, ke bara'ura da aku me'ana ntama, 13Nde da komiu mokosikorio ranta ka domangalitau? Nde tamo onae ka komiu mesikori nahi ipekombia? Sii Kanandio anaku, nde nahi komba laluaopo masukarano anu pinembasaiku sekonopo omiu, hangano kae-Do i Ue Ira humuku aku?” 14Mpengese iramo mbo'u tedoa meroku, ka i Oropa iwoowoo ponino, metompa, sine i Ruti kongkono metenunu ndi onae. 15Mepauomo i Naomi, ”Mekuleomo pe'asa mpo'alamu ia tongkuno, ka ia ue anu pine'ala-alano, pekulemo tondao pe'asa mpo'alamu atuu.” 16Sine ipotae i Ruti, ”Sidadai aku bintakomiu ka kupekule nahi kutonda komiu, nde ba isua ilako i tu'ai kulako, ka ba isua ipoturi i tu'ai kupoturi, tongkumu onae tongkuku, ka Ue Alamiumo, Ondae Ue Alaku; 17Isua imate, i ra'ai kumate, ka i ra'ai kukinaburu. Kanandiomo ba Dohuku aku i Ue, ba laluaopo sekono atuu tabulu hapamokoa monsia kita, sangkadio matea!” 18Mansano kumitao i Naomi motae moroso aroano i Ruti ta tumondao, menaa-naaomo mepauakono. 19Melempa iramo ranta ka dohawe i Beteleme. Mansado mewinso i Beteleme, ntewuka ira luwu asa inia, ka luwuno beine, dompotae, ”Komba i Naomi ke arau?” 20Sine ipotae, ”Si mpoboi aku i Naomi, impoboi aku Mara, nde anu Pabawa mowee aku hadio mopa'ino tumuwu. 21Anu ka kulako buke kaeku, sine ka Dopokule aku i Ue mooa kaeku. Tembio ka komiu mpoboi aku i Naomi, hangano Ondae i Ue anu sakosii umaropi aku, ka Ondae anu pabawa mowee aku urasa'o.” 22Kanandiomo i Naomi mekule merongaakono i Ruti, beine to Moabi. Kohawedo i Beteleme, tekonai ira pompu'u konsowia jelai.
Currently Selected:
Ruti 1: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021