Puu Mpobitara 21
21
Suku Benami anu da mentuwu
21:1-25
1To Isaraeli mpesumpa iramo i Misipa, kanandio, ”Maupo te'asa mia inso ndi ontae nahi ta hina meweengakano anano beine a nto Benami gagi kombiano.” 2Itempono tongku atuu hawe i Beteli, ka mpo'ia i ra'ai i aro-Do i Ue, Ue Ala ranta ngkiniwia, mpengese ira tedoa meroku, 3dompotae, ”Tembio, O Ue, Ue Alado to Isaraeli, ka igagi kanandio i olono tongku Isaraeli, onaemo oleo andio asa suku inso ia tongku Isaraeli tetadi?” 4Tisomono da mo'oru tongku atuu mpowangu iramo meda mpotunua pesomba i tu'ai, ka dompompesombaako pesomba tinunu ka pesombaa tetolosia.
5Ia tempo atuu mpontae iramo to Isaraeli, ”Isemake anu te'inso ia luwuno to Isaraeli anu nahi pontonda bawaa andio mesomba ndi Ondae i Ue?” Nde mpesumpa iramo a menteano ntu'u mongkona mia anu nahi petonda mesomba ndi Ondae i Ue i Misipa, kanandio, ”Asalakono ta hinuku mate.” 6To Isaraeli anu mehohawa ira to Benami, pepaekompodo atuu, dompotae, ”Oleo andio hinao asa suku tetadiomo inso a nto Isaraeli. 7Hapake anu ta wineweuto a mia anu tebinta atuu ba tompo'ungkeako ira kombiado, nde ontae mpesumpa kitamo a nee-Do i Ue nine nahi kita mpoweeako ira maupo te'asa ana beineto gagi kombiado?” 8Onae ka dompotae, ”Inso ia luwuno suku Isaraeli hinaoke anu nahi hawe mesomba ndi Ondae i Ue i Misipa?” Tengkitaomo nine anu te'inso a palili Yabesi-Gilea nahina maupo te'asa mia anu hawe ia pekemaado bawaa atuu. 9Pinaresaomo hadiono tongku atuu, mengkaaomo nahina maupo te'asa mia anu hawe te'inso ia palili Yabesi-Gilea. 10Onaemo inso a tepumpua atuu, mpontena ira hopulu ka orua nsowu mia anu moroso ntu'u mentinena ira kanandio, ”Imelakomo, mpeteaako ira palili Yabesi-Gilea mompake mponai, kanatuu koa mbo'u luwuno beine ka nanaote. 11Weweuomo kanandio: Butu luwuno tama ka luwuno beine anu horiomo moturi saru tama i ropu ira.” 12Mpohawe ira i olodo to Yabesi-Gilea pato etu anu da ana beine, anu napi dohori mpoturi saru tama. Onaemo ka luwuno ana beine atuu dowawa ira ia mpekemaado i Silo, wita Kana'a.
13Umari atuu luwudo bawaa atuu mpontena mia mpowawa pe'oliwi a inuleno i Benami anu mo'ia i torukuno watu Rimoni, ka ipauako ira manangai ndi ondae. 14Itempo atuu mpekule iramo suku Benami ka domewineeako luwuno beine anu mempino'inee tuwu inso i olodo beine Yabesi-Gilea, sine napi sompo hadiono. 15Nde tongku atuu dopehohawa iramo suku Benami, hangano Ondae i Ue moweweu teposisalaa i olodo luwuno suku Isaraeli.
16Ka do'amba mpotae mia memota'udo bawaa atuu, ”Hapake anu kita mpokoweweuako ira anu da tebinta andio kai hina koa kombiado? Nde luwuno beine pingkoomo a nsuku Benami.” 17Ka dompotae mbo'u, ”Tia pusakado mia anu da mentuwu asalakono kongko mpiha mo'ia a nsuku Benami, ka sihina suku anu tetadi i olono to Isaraeli. 18Sine ontae andio nahi kita mpoweeako ira kombiado inso a luwuno ana beineto.” Nde to Isaraeli mpesumpa iramo kanandio, ”Tetotonaaomo mia anu mompopokombiaako anano beine ia nsuku Benami!” 19Ka dompotae mbo'u, ”Sompo ta'u hinao pompelangkai ndi Ondae i Ue i Silo i utarano Beteli, i sabaano oleo sala langkai anu tetutu inso i Beteli lumako i Sikemi ka te'alaako i selata Lebona.” 20Mpe'oliwi iramo a inuleno i Benami, kanandio, lakomo mpontowoki a luwuno lere anggoro. 21Pepenteeo temoiko; tewala ana beine i Silo meluarako menari, peluarakomo inso ia lere anggoro atuu, ka nte'o'asa mia mompolaiako asa ana beine i Silo atuu gagi kombiano ka ilako i wita Benami. 22Tewala hinao ama ke pepaekompono anu tama hawe ta motuntu ndi omami, kami mpotaeako ira: Impeweengako iramo ndi omami temoiko, nde a larono peteaa nahi to mpokomporako te'asa ana beine ta gagi kombiado nte'o'asa mia. Lano omiu nahi komba komiu mompoweengako ana beinemiu ndi ondae, nde ba kanandio mensala komiu. 23Mpo'ala ira kombiado inso a luwuno ana beine menari anu rinontudo. Hadiono mengkena kana hadiodo. Ka Do'amba mpekule ia ntia pusakado ka dowali mewanguo luwuno kotado mpekule ka mpo'ia i ra'ai.
24I tempono atuu melako iramo to Isaraeli inso i ra'ai, sompo mia montonda suku ka pepe'etuado mpekule ia tia pusakado.
25 #
Mpo. 17:6
Ia tempo atuu nahina mokole i olodo to Isaraeli. Sompo mia moweweu hapa anu mentee montonda po'eheno onaeno.
Currently Selected:
Puu Mpobitara 21: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
