MENGKAAA 7
7
Mia anu mentinondoni inso a tongku Isaraeli
7:1-8
1 #
Yer. 49:36; Dan. 7:2; Sak. 6:5 Ka i'amba umarino atuu kukita ira opaa mala'eka pentade a opaa siuno tolino ka dome'ontoo opaa angi i tolino, ka si hina angi mepuuri a ntuwu wita, ke a ntahi ke a luwuno keu. 2Ka kukitao aasa mala'eka susua mesabaako inso a nsabaano oleo. Iwawao pontondoni-Do Ue Ala anu tuwu; ka ipebooli saru suara meroku a opaa mala'eka anu mentinena ka domensolangio tolino ka tahi, 3#Yeh. 9:4, 6 ipotae, ”Si mensolangio tolino ke tahi ke luwuno keu ba napi kimentondoni ira tetenaa-Do Ue Alamami a ra'ido!”
4Ka kurongeo porokodo anu mentinondoni atuu asa etu pato pulu ka opaa nsowu anu tinondoniomo inso a luwuno suku inuleno i Isaraeli.
5Inso a nsuku Yehuda hopulu ka orua nsowu anu tinondoni,
inso a nsuku Rube hopolu ka orua nsowu,
inso a nsuku Gadi hopulu ka orua nsowu,
6inso a nsuku Asere hopulu ka orua nsowu,
inso a nsuku Napatali hopulu ka orua nsowu,
inso a nsuku Manase hopulu ka orua nsowu,
7inso a nsuku Simeo hopulu ka orua nsowu,
inso a nsuku Lewi hopulu ka orua nsowu,
inso a nsuku Isakari hopulu ka orua nsowu,
8inso a nsuku Sebulo hopulu ka orua nsowu,
inso a nsuku Yusupu hopulu ka orua nsowu,
inso a nsuku Benami hopulu ka orua nsowu.
Mia hadio anu nahi pinikodoa hadiono
7:9-17
9Ka i'amba umarino atuu kukitao: menteeano, aasa tepumpua langkai mia hadio anu nahi pinokodoa hadiono, inso a luwuno tongku ka suku ka pepe'etua ka pau, mpentade i arono kadera poparentaa ka i aro-Do Ana Bimba, mpelemba meloe mopute ka mpo'ini lewe palemi a ngkaedo. 10Ka saru suara meroku mpebooli ira,
”Tekaduduia ndi Ondae Ue Alamami anu mentoro a wawo ngkadera poparentaa ka ndi Ondae Ana Bimba!”
11Ka luwuno mala'eka mpentade melimbuo kadera poparentaa ka mia mempinemota'u ka opaa anu tuwu atuu; mpenggolontu ira i arono kadera poparentaa atuu ka mpesombai Ira Ue Ala, 12saru mpotae,
”Ami! Po'unde-unde ka marambaa, ka ponto'ori mentee ka pontarimakasi ka pompelangkai ka pabawa ka roso tia-Do Ue Alato ranta nahina tampulaano! Ami!”
13Ka asa mia inso i olodo mia mempinemota'u atuu motae ndi ongkue, ”Isemake ondae anu mpelemba meloe mopute atuu ka isuake dome'inso?” 14#Dan. 12:1; Mat. 24:21; Mrk. 13:19 Ka kupotaeakono, ”Ueku, omiu ue tumo'orio.” Ka i'amba motae ndi ongkue, ”Ondae andio onaemo luwuno mia anu mpeluarako inso a masusaa anu langkai, ka domelomboomo lemba meloedo ka dompokomoputeo a laro rea-Do Ana Bimba. 15Onaemo pu'uno ka dompentade i arono kadera poparentaa-Do Ue Ala mekakaako Ira meene ka wongi a Raha Mempori-Do. Ka Ondae anu mentoro a wawo ngkadera poparentaa atuu Ira wileo kema-Do i wawodo. 16#Yes. 49:10 Nahi ira memarasaiako mokoninggo ka mokoranga mbo'u, ka mata'oleo ke mokula ntu'u nahi ta umalu ira mbo'u. 17#Pud. 23:1-2; Yes. 25:8; 49:10; Yeh. 34:23 Hangano Ana Bimba anu i tonga-tongano kadera poparentaa atuu, ta pakambi ira ka ta tumaate ira a mata uwoi tuwua. Ka Ondae Ue Ala Ira pahihio luwuno uwoi mata inso a matado.”
Currently Selected:
MENGKAAA 7: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
