MENGKAAA 12
12
Beine ka naga
12:1-6
1Ka tengkitaomo aasa petondoni langkai i langi: Aasa beine mesoumbuako mata'oleo, saru wula a ntoto ngkaruno ka aasa ramba-ramba ulu inso a hopulu ka orua anano wula a wawo uluno. 2Onae kontongaano mentia ka a laro pompemapari ka marasaino ta me'ana onae meraali mompemahaki. 3#Dan. 7:7 Ka tengkitaomo aasa petondoni anu susua i langi; ka kitaomo, aasa naga motaha ntu'u anu langkai, me'ulu opitu ka metandu hopulu, ka a wawo uluno hinao opitu ramba-ramba ulu. 4#Dan. 8:10 Ka ikino rumendeo asa ntia otolu inso a luwuno anano wula i langi ka metadiakono i wawontolino.
Ka naga atuu mentade i arono beine anu ta me'ana atuu, ta tumeleo Anano, sa'umarino beine atuu me'anaako Ira. 5#Pud. 2:9; Yes. 66:7 Ka ipe'anaakono aasa Ana ntama, anu ta pakambiako ira tuko labu luwuno tongku; borono Anano atuu rinontu ka winawa ndi Ondae Ue Ala ka a ngkadera poparentaa-Do. 6Beine atuu molai i pada one, i ra'ai Dopatindaomo Ue Ala aasa po'iangano, ka ipinekaria i tu'ai asa nsowu ka rua etu ka nomo pulu oleo tehineno.
Naga pinokontenangi
12:7-9
7 #
Dan. 10:13, 21; 12:1; Yud. 1:9 Ka gagiomo peteaa i suruga. I Mikaeli ka luwuno mala'ekano metea umewaio naga atuu, ka naga atuu dompokowalio mala'ekano, 8sine nahi dompokompekorahako; nahi dompohawe mbo'u po'iangado i suruga. 9#Teg. 3:1; Luk. 10:18 Ka naga langkai atuu, i ule mota'u, anu nineeako i Mosa'o ke i Satani, anu mopo'oo asa wawontolino, pinetadiako i totono; onae pinetadiako i tolino, meronga saru luwuno mala'ekano.
Penani ponangia
12:10-12
10 #
Ayb. 1:9-11; Sak. 3:1 Ka kurongeo suara anu meroku i suruga motae,
”Kanandio-andio haweomo
tekaduduia ka pabawa
ka poparentaa-Do Ue Alato,
ka pabawa-Do anu inurapi-Do,
hangano pinetadiakoomo i totono
anu mosebe ira pepaekompoto,
anu mosebe ira meene ka wongi i aro-Do Ue Alato.
11Ka domenangiakono rea-Do Ana Bimba,
ka hangano pau ponsakosiido.
Hangano nahi dompehohawao penaado hawe a laro matea.
12Onaemo pu'uno po'undemo,
hei suruga ka hei luwumiu anu mpo'ia i larono,
memasola komiumo, hei tolino ka tahi!
Hangano i Mosa'o metiiomo ndi omiu,
a laro bamburuno anu mongkokongiri,
hangano ito'orio, nine tempono rangkuomo.”
Naga lumampuio beine atuu
12:13-18
13Ka tempono ipokonto'orio naga atuu, nine onae pinetadiakoomo i wawontolino, ilampuio beine anu me'anaakono Ana ntama atuu. 14#Dan. 7:25; 12:7 A beine atuu wineeako orua panino singko langkai, ka ipenee lumako a mpo'iangano i pada one, i ra'ai ipinekaria olai inso a mpo'iangano ule atuu i larono aasa tempo ka orua tempo ka entonga tempo. 15Ka i'amba ule atuu mewurosiako uwoi inso a ngangano, kana langkaino korono, te'aro a beine atuu, ka ipolomoo korono atuu. 16Sine tolino hawe tumulungio beine atuu. Onae menganga, ka iteleo korono anu pinewurosiakono naga atuu inso a ngangano. 17Onaemo ka itekuda naga atuu a beine atuu, ka i'amba lumako meteaakono inuleno anu susua, anu mentondao luwuno songka-Do Ue Ala ka me'inio ponsakosii-Do i Yesu. 18Ka onae mentade i wiwi ntahi.
Currently Selected:
MENGKAAA 12: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
