Po'unde-unde 96
96
Ondae Ue Ala, Ue ka Puu Mpobitarano asa wawontolino
96:1-13
1 #
1Taw. 16:23-33
Penaniakonomo penani wo'ohu tia-Do i Ue,
penanimo tia-Do i Ue, hei asa wawontolino!
2Penanimo tia-Do i Ue, unde-undeomo nee-Do,
paleleomo tekaduduia inso ndi Ondae sompo-sompo oleo.
3Tutuluomo maramba-Do i olodo tongku
ka luwuno wineweu-Do anu kinohali-haliako i olodo luwuno suku tongku.
4Hangano Ondae i Ue tedoa langkai ka tedoa inunde-unde,
mongkokongiri Irapo sekono luwuno pinesombai.
5Hangano luwuno pinesombaido tongku butu lahumoa nahina pengkonaano,
sine Ondaemo i Ue anu mokogagio langi.
6Pompelangkai ka marambaa kongko i aro-Do,
roso ka ponangia kongko a mpo'ianga mempori-Do.
7 #
Pud. 29:1-2
Weeako Iramo i Ue, hei luwuno suku tongku,
weeako Iramo i Ue marambaa ka roso!
8Weeako Iramo i Ue marambano nee-Do,
wawaomo pesomba ka pewinsomo a kintala-Do!
9Penggolontuumo pesomba ndi Ondae i Ue saru marambano memporia,
pondidi-ndidimo i aro-Do, hei asa wawontolino!
10Pepaumo i olodo luwuno tongku, ”Ondaemo i Ue Mokole!
Mentee ntu'u, tolino mentade, nahi ta telelu.
Ira bitarao luwuno tongku a laro menteea.”
11Po'ineeomo langi mawongko ka tolino kokora-kora,
po'ineeomo tahi saru ihino umu'uru,
12po'ineeomo pada ka luwuno anu mpo'ia i larono memawongko,
oo, po'ineeomo luwuno keu a ntobu mengkokora-kora mpo'unde
13i aroDo i Ue, hangano hawe Ira,
hangano Ondae hawe Ira bitarao tolino.
Ira bitarao wawontolino a laro menteea,
ka luwuno tongku a laro menteea-Do.
Currently Selected:
Po'unde-unde 96: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
