Po'unde-unde 94
94
Ondae i Ue Puu Mpobitara anu moleo
94:1-23
1 #
Win. 32:35; Rom. 12:19 Oo Ue Ala anu mombalo, oo Ue,
oo Ue Ala anu mombalo, Ipepopokitamo!
2Ipewangumo, oo Puu Mpobitarano tolino,
Ipombalomo wineweuno mia mompelangka-langkai!
3Opia mbo'u tehineno mia mosa'o gauno, oo Ue,
opia mbo'u tehineno mia mosa'o gauno ipesana-sanaa?
4Ondae mpoluarako luwuno pau anu mosa'o,
luwuno mia anu mpoweweu mosa'o mpompelangka-langkai.
5Bawaa-Miu, oo Ue, domempirego ira,
mia-Miu isa'a dompokonsiio;
6tuwu beine ka mia hawe domensumbeleo,
nana'ote nahina amado dompepate ira;
7ka dompotae, ”Nahi Dokitao i Ue,
Ondae Ue Alano i Yako nahi Doperioo.”
8Pekokoongakono, hei omiu anu lalu benge-benge i olodo palili!
Hei luwuno mia monge-monge, te'ipiake ka igagi mempande mposongka?
9Ondae anu pasao biri, nde kana'umpe nahi Ira rumongeo?
Ondae anu weweuo mata, nde kana'umpe nahi Ira kumitao?
10Ondae anu paguru ira tongku, nde kana'umpe nahi Ira mohuku?
Ondae anu paguruako ira mia ponto'ori.
11 #
1Kor. 3:20
Ondae i Ue tumo'orio luwuno sinongkano mia;
menteeano luwuno nahina tuduno.
12Me'uraomo mia anu pinaguru-Miu, oo Ue,
ka anu Ipaguruakono Songka-Miu.
13Komiu mokorodoo a luwuno oleo masolaa,
hawe ka ikineke aa tiano mia mosa'o gauno.
14Hangano Ondae i Ue nahi Ira mebungkuio bawaa-Do,
mia-Do isa'a nahi Ira bintao;
15Mentee ntu'u, songka ta wali moroso menunu saru moleoa,
luwuno mia anu bobotoli aroano ta tumondao.
16Isemake anu ta mentade umala-alaakune i arodo mia melambaha,
isemake anu ta aiwa mokowali aku i arodo anu mpoweweu mosa'o?
17Tewala komba Ondae i Ue anu tumulungi aku,
ilawu kupo'ia a mpo'ianga boni-boni.
18Mansaku mewowoloo, ”Karuku nami moroso,”
pompehohawa-Miu, oo Ue, mokoroso aku.
19Tempono laro aroaku tesawuregoako luwuno pinewowolo,
pontarero-Miu mokonsanaao sumangaku.
20Nde kana'umpe ka Ipedandi tepo'asa mpobitaraa anu mosa'o,
anu mowawa masolaa me'empehiako atora?
21Ondae mpedandi tepo'asa mpoweweu mosa'o umewaio mia mentee,
ka mehuku mateo mia nahina salano.
22Sine Ondae i Ue onaemo kota benteku,
Ue Alaku torukuno watu pepekaduduiaku.
23Ira mombalo a mpoweweudo anu mosa'o,
ka hangano poweweudo anu mosa'o Ira mepate ira;
Ondae i Ue, Ue Alato, Ira mepate ira.
Currently Selected:
Po'unde-unde 94: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
