Po'unde-unde 22
22
Ue Alaku, tembio ka Ibinta aku?
22:1-32
1Tiano petewawado anu mpenani. Montonda unino penani: Rusa i Tempono tamo Saba Oleo. Penani po'unde-undeno i Daudi.
2 #
Mat. 27:46; Mrk. 15:34 Ue Alaku, Ue Alaku, tembio ka Ibinta aku?
Mebooli aku, sine Omiu olai mpiha
ka nahi tulungi aku.
3Ue Alaku, ongkue meboo-booli i tempono meene, sine nahi Isangki,
ka i tempono wongi, sine nahi kurodo koa mbo'u.
4Kahinaano Omiumo Anu Mempori,
anu mo'ia i wawono po'unde-undedo to Isaraeli.
5Ndi Omiu uempu'umami dompompe'ala-ala;
ondae mpompe'ala-ala, ka Omiu motola ira.
6Ndi Omiu ondae mpeboo-booli, ka ondae mempinotola;
ndi Omiu dompompe'ala-ala, ka nahi domemokoko'ii.
7Sine ongkue andio ule-ule ka komba mia,
tataado mia, dompokongkodeio mia hadio.
8 #
Mat. 27:39; Mrk. 15:29; Luk. 23:35 Luwuno anu kumita aku menggari-nggari aku,
ondae mebiuo wiwido, mebitu-bituo uludo,
9 #
Mat. 27:43
”Onae mehonda ndi Ondae i Ue, po'ineemo Ondae anu motolao,
po'ineeomo Ondae anu motolao,
hangano onae Dopemoikoo.”
10Omiumo anu lumuarako aku inso a mpe'anakaa;
Omiumo anu weweu aku rodo a radado ineku.
11A mpo'awia-Miu ongkue pineweengakoomo mompu'u kuhina,
mompu'u a laro mpe'anakaado ineku Omiumo Ue Alaku.
12Si olai inso ndi ongkue,
hangano masusaa umpedaomo
ka nahina montulungi.
13Hadio sapi lakino melimbu aku;
hadio bante inso i Basani kumadu aku;
14ondae mpongangao ngangado ndi ongkue
kana singa anu mingki momperangkami ka mengaoli.
15Kana uwoi ongkue te'uwu,
ka luwuno pesombuano wukuku kana tepotola;
aroaku gagi kana gomo,
loono a laro radaku;
16rosoku mokari kana siba ntami,
eloku metako a langiraku;
ka a laro pampawu Inaa aku.
17Hangano dahu melimbu aku,
gerombolano mia mpoweweu mosa'o mengkadu aku,
domeduhuo kae ka karuku.
18Luwuno wukuku kupokodoao;
ondae mpengkikita, domengkikita aku.
19 #
Mat. 27:35; Mrk. 15:24; Luk. 23:34; Yoh. 19:24 Dompetia-tiao sangkaku i olodo,
ka ondae mentendeo undi a lemba meloeku.
20Sine Omiu, Ue, si olai;
oo rosoku, rongamo Itulungi aku!
21Ipotola akumo inso a mponai, ka penaaku inso mperorontuado dahu.
22Ikadudui akumo inso a ngangano singa,
ka inso a ntaduno bante. Sumangki Komiumo ndi ongkue!
23 #
Ibr. 2:12
Ka ineheku tumutuluo nee-Miu a luwuno pepaekompoku
ka umunde-unde Komiu i tonga-tongano bawaa:
24omiu anu doitoako Ira i Ue, unde-unde Iramo,
luwuno ana'ueno i Yako, unde-unde Iramo,
ka imedoitoako Iramo, hei luwuno ana'ueno i Isaraeli!
25Hangano komba Dopokongkuramao ke meruanahio
marasaino mia anu tepokonsii,
komba Dowunio rupa-Do a mia atuu,
ka Dorongeo peboolino mepetulungi.
26Hangano Omiu ongkue menaniako po'unde-unde a laro bawaa anu langkai;
tinangaku aku umowahio i arodo anu doitoako Ira.
27Mia anu marasai ta mongkaa ka mowohi,
mia anu umungke Ira i Ue ta umunde-unde Ira;
po'ineeomo aroamu ka imawongko mpiha!
28Luwuno tompano tolino ta mokonto'orio
ka mepokule ndi Ondae i Ue;
ka luwuno suku inso a luwuno tongku
ira mpenggolontu mpesomba i aro-Miu.
29Hangano Ondaemo i Ue anu pabawa gagi mokole,
Ondae moparenta a luwuno tongku.
30Oo, ndi Ondae ira mpenggolontu mpesomba luwuno mia mompelangka-langkai i tolino,
i aro-Do ira mpenggolontu luwuno mia anu mpetii a laro pampawu,
ka mia anu nahi pokotuwu mpiha.
31Ka ana'ue ta mesomba ndi Ondae,
a inule lembuino ira mentinutuluako mongkona Ondae i Ue.
32Ira mempaleleo moleo-Do
a tongku anu hina lembuino,
hapa anu Doweweuomo i Ue.
Currently Selected:
Po'unde-unde 22: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
