Po'unde-unde 135
135
Butu Ondae i Ue anu tekona pinesombai
135:1-21
1Haleluya!
Unde-undeomo nee-Do i Ue,
unde-undeomo, hei luwuno tetenaa-Do i Ue,
2hei luwuno mia anu mpopekakaako a Raha-Do i Ue,
a kintalano Raha-Do Ue Alato!
3Unde-unde Iramo i Ue, hangano Ondae i Ue atuu moiko Ira,
Penanimo po'unde-unde tiano nee-Do, hangano nee atuu tekosi!
4Hangano, Ondae i Ue Dobinikiomo i Yako tia-Do,
to Isaraeli gagi mia-Do anu pinehohawa-Do.
5Kuto'orio nine Ondae i Ue atuu tedoa langkai pabawa-Do
ka Ondae Ueto lumaloio luwuno pinesombai.
6Ondae i Ue Doweweuo hapa anu inehe-Do,
i langi ka i tolino,
a ntahi ka a luwuno wingke ondalo;
7Dowuatakono gawu inso i tompano tolino,
mepansariako koliki tumondao usa,
Dowawao angi meluarako inso a mponaapa-Do.
8Ondaemo anu tumunduhi ira ka domemate ana aka i Masiri,
moiko mia maupo pinotuwu,
9ka mokohina ira petondoni ka luwuno kinohali-haliako
i tonga-tongamu, hei Masiri,
umewaio i Pirao ka luwuno pegawaino.
10Ondaemo anu numangi ira hadio tongku,
ka mepate ira luwuno mokole anu moroso:
11I Sihoni, mokoledo to Amori,
ka i Ogo, mokole i wita Basani,
saru luwuno poparentaa i Kana'a.
12Doweeako ira witado gagi tia pusaka,
tia pusaka a nto Isaraeli, bawaa-Do.
13Oo Ue, nee-Miu nahi bali ranta nahina tampulaano;
oo Ue, Omiu rinambe mapa'api-api inule.
14Hangano, Ondae i Ue moweeako ira moleoa a bawaa-Do,
ka mehohawa ira tetenaa-Do.
15 #
Pud. 115:4-8; Meng. 9:20 Lahumoado luwuno tongku butu koa salaka ka wulaa,
wineweuno kaeno mia,
16hinao ngangano, sine nahi pokompepau,
hinao matano, sine nahi pokompongkita,
17hinao birino, sine nahi pokomporonge,
penaa mbo'u nahina a laro ngangado.
18Ondae anu meweweuo ira megagi mpengkena kanatuu,
kanatuu koa mbo'u luwuno mia anu mpe'ala-alao.
19Hei suku Isaraeli, unde-unde Iramo i Ue!
Hei suku Haruni, unde-unde Iramo i Ue!
20Hei suku Lewi, unde-unde Iramo i Ue!
Hei luwuno mia anu doitoako Ira i Ue, ime'unde-unde Iramo i Ue!
21Unde-unde Iramo i Ue inso i Sioni,
Ondae anu mo'ia i Yerusale!
Haleluya!
Currently Selected:
Po'unde-unde 135: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
