Po'unde-unde 116
116
Montarimakasi hangano tola inso a mponguno matea
116:1-19
1Aku mehohawa Ira i Ue, hangano Dorongeo
pebooliku ka po'emaku.
2Hangano Dopo'aroo biri-Do ndi ongkue,
onaemo pu'uno asa ntinuwuku aku mebooli ndi Ondae.
3Ohono matea wewesi aku,
doitoakono tolinodo mia mate umalu aku,
masusa aku ka me'i'isei.
4Sine kupebooliakono mpiha nee-Miu,
”Oo Ue, po'ineeomo ka Ipotola aku!”
5Ondae i Ue atuu mompehohawa ka moleo,
Ondae Ue Alato me'aroa.
6Ondae i Ue mekaria ira mia anu nahi dompompelangka-langkai;
nahina rosoku, sine Ondae kumadudui aku.
7Walimo pomperodo, hei sumangaku,
hangano Ondae i Ue moweweu Iramo moiko ndi omue.
8Oo, Ipotola akumo inso a matea,
ka mataku inso a mpowerano uwoi mata,
ka dumagaio karuku onaemo ka nahi tetidu.
9Moiko kupelempa i aro-Do i Ue,
a witado mia mentuwu.
10 #
2Kor. 4:13
Kupe'ala-ala Ira mpiha, maupo komotae,
”Ongkue andio tedoa tepokonsii.”
11A laro bulalingoku kupotae,
”Luwuno mia megaupi.”
12Kana'umpe aku sumuloo ndi Ondae i Ue
luwuno poweweu-Do anu moiko ndi ongkue?
13Aku tumandeo piala tekaduduia,
ka mebooliakono nee-Do i Ue,
14aku umowahio pontangaku ndi Ondae i Ue
i arodo luwuno bawaa-Do.
15Tedoa Dopemobeao i Ue
mateno mia anu pinehohawa-Do.
16Oo Ue, ongkue andio tetenaa-Miu!
Ongkue tetenaa-Miu, anano tetenaa-Miu beine!
Ilohuomo luwuno onggoku!
17Aku mompesombaako pontarimakasi ndi Omiu,
ka aku mebooliakono nee-Do i Ue,
18aku umowahio pontangaku ndi Ondae i Ue
i arodo luwuno bawaa-Do,
19a kintalano Raha-Do i Ue,
i tonga-tongamu, hei Yerusale!
Haleluya!
Currently Selected:
Po'unde-unde 116: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
