Powadi 27
27
1 #
Yak. 4:13-16
Si unde-undeo koroimu mongkona tisomo,
hangano nahi uto'orio hapa anu ta gagi oleo atuu.
2Po'ineeomo mia susua umunde-undeko ka komba ngangamu,
mia anu nahi uto'orio ka komba wiwimu omuemu.
3Watu atuu mobea ka maupo one mobea,
sine mobeaopo sekonopo oruano onaemo mahaki aroa a mia benge-benge.
4Mokula aroa lambaha ka tekuda umaluo,
sine isema mokompopetea a monsiri?
5Moikoopo pekuahako i arono
sekonopo pompehohawa anu tewuni.
6Asa mia wali-wali mobelai saru tinoo moiko,
sine asa iwali mewoo-woo laloomo lahi.
7Mia anu mowohi mololanda siu hoani,
sine a mia anu mokoninggo maupo luwuno anu mopa'i mo'ahi namino.
8Kana manu-manu anu molai inso a nsenono,
kanatuumo mia molai inso a mpo'iangano.
9Lana ka anu mana mo'ahi ineheno aroa,
sine marasaia moberi sumanga.
10Si bintao walimu ka walino amamu.
Si aiwa a rahano pepaekompomu i tempono omue urasa'o.
Moikoopo pehori raha anu umpeda
sekonopo pepaekompo anu olai.
11Anaku, omue asalakono pande mosongka, pokonsanaaomo aroaku,
ka kupokosangkio mia anu tumata aku.
12Tewala mia pande mo'ungke akala kumitao masolaa, onae mewuni,
sine mia anu napi hina pinembasaino melempa mpiha, ka i'amba masola.
13Alaomo sangkano mia anu tumanggumio mia susua,
ka ontoomo atuu gagi pe'iniano mia hawe.
14Isema mo'o-mo'oru ntu'u metabeako suara meroku a mpe'asa miano,
ta pinotaeako kontongaano montotonaa.
15Asa mia beineno anu ineheno me'u'ua mengkena saru
matiti anu nahi penaa-naa mompo'iti i tempono usa.
16Isema umontoo mo'onto angi,
ka kae ngkoanano mokungku lana.
17Labu mokomontasoo labu,
mia mokomontasoo pe'asa miano.
18Isema mompekaria keu ara ta mongkaa wuano,
ka isema modagai ueno ta pinelangkai.
19Kana uwoi montami rupa,
kanatuumo aroano mia tumamio mia atuu.
20Tolinodo mia mate ka matea nahi hori tende,
kanatuumo matano mia nahi hori tende.
21Kawali kodei atuu pompokolonoa salaka ka pompotuwua api pompokolonoa wulaa,
ka mia kinita montonda po'unde-unde anu iwineeako.
22Maupo u'isaakono po'isa mia benge-benge,
a laro nohu saru gandu, benge-bengeno nahi ta tetadi inso ndi onae.
23To'oriomo temoi-moiko teweweudo bawaano bembe bimbamu,
pepentee iramo bawaano pinotuwumu.
24Hangano, arataa nahi ta mo'ia mpiha
ka ramba-ramba ulu nahi ta mapa'api-api inule.
25Tewala ewo moliu ka tumba mongura tengkita,
ka luwuno pinopaho a ntorukuno pinumpu,
26ka omue hinao luwuno bimba mongura wuluno ta pesangkamu
ka luwuno bembe lakino po'oli lere,
27soompo uwoi uono bembe ta kaangamu ka kaangado somborimu,
saru pepotuwudo beine anu mpekakaakomu.
Currently Selected:
Powadi 27: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
