Powadi 25
25
Luwuno powadino i Salomo anu pinumpudo pegawaino i Hisikia
25:1–29:27
1Tudano mbo'u andio luwuno powadino i Salomo anu pinumpudo pegawaino i Hisikia, mokoledo to Yehuda.
2Maramba-Do Ue Ala onaemo hinao anu tewuni,
sine marambano luwuno mokole hinao pinepentee.
3Kana mantandeno langi ka ondalono tolino,
kanatuumo aroano luwuno mokole nahi pinokopepentee.
4Tadiomo rege inso a nsalaka,
ka hasilino weweuano puu mpo'angga salaka.
5Tadiomo mia mosa'o gauno inso i arono mokole,
ka morosoomo kadera poparentaano hangano moleoa.
6 #
Luk. 14:8-10
Si pompelangka-langkai i arono mokole,
ke mentade a mpo'iangado anu langkai potorono.
7Hangano moikoopo mia mepau ndi omue, ”Pewuatakomo i ndi'ai,”
sekonopo omue pine'uru-uru i arono mia pinelangkai.
Hapa anu kinitano matamu,
8si madara pekara-karaakono.
Hangano a mpoko'ariano, hapake anu pinokoweweumu,
tewala pe'asa miamu mokoko'iiko?
9Korahakonomo kara-karamu a mpe'asa miamu atuu,
sine si posabao rahasiano mia susua,
10ka si domempasinggiriko mia anu rumongeko,
ka pompepauikiako ndi omue nahi tetadi.
11Kana apeli wulaa a sempe salaka,
kanatuumo pau anu pinau a tempo anu kona ntu'u.
12Kana sinsi wulaa ka peramba-ramba wulaa,
kanatuumo pekuahakono mia pande mosongka a biri anu moronge.
13Kana morinino seru baku i tempono konsowia,
kanatuumo mia tinena anu metenunu a mia anu tumenao;
onae mokorosoo aroado luwuno ueno.
14Kana seru ka angi nahina usa,
kanatuumo mia mompelangka-langkaiako pompowee anu nahi hori meweengakono.
15Saru sabara ka ipokompe'alao asa mia anu pabawa
ka pau molusa-lusa mompudu wuku.
16Tewala omue mohawe siu hoani, pongkaamo sompoano,
ka si mansa umowohiako lahi atuu, ka u'amba lumuao.
17Si mararu aiwa a rahano pe'asa miamu,
ka si te'osa, ka i'amba umo'aliaakomu.
18Kanamo tuko, ke ponai, ke ana mpana anu montaso,
kanandiomo mia anu mesakosii megaupi a mpe'asa miano.
19Kanamo ngisi anu motopu ka karu anu telelu,
kanandiomo pompe'ala-ala a mia mohapu pedandia a tempo ma'isoa.
20Kanamo mia anu lumohuo lembano i tempono morini,
ka kanamo olo a mobela,
kanandiomo mia anu menaniako penani tiano aroa anu masusa.
21 #
Rom. 12:20
Tewala iwalimu mokoninggo, poweeakono roti ka ipongkaa,
ka tewala onae mokoranga, poweeakono uwoi ka ipo'inu.
22Hangano omue komohowu waro api a wawo uluno,
ka Ondae i Ue Ira sumuloo moikoa atuu ndi omue.
23Angi utara mowawa usa marombo,
mepau mewuni-wuni mowawa rupa tekuda.
24Moikoopo mo'ia a nsiuno atono raha
sekonopo me'asa raha saru beine anu ineheno me'u'ua.
25Kanamo uwoi morini a mia anu mokoranga,
kanatuumo lele moiko inso i wita anu olai.
26Kanamo mata uwoi anu mowewu ka insoano anu merege,
kanatuumo mia mentee anu tedonta i arono mia mosa'o gauno.
27Mongkaa hadio siu hoani nahi moiko,
kanatuu koa mbo'u mo'ungke luwuno pau po'unde-unde.
28Kanamo kota anu tebangku rere watuno,
kanatuumo mia anu nahi pokompabawaio koroino.
Currently Selected:
Powadi 25: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
