Powadi 21
21
1Aroano mokole kana waaano uwoi a laro ngkae-Do i Ue,
Dopowaao isuamo koa inehe-Do.
2Sompo pesalaano mia moleo montonda pohaweno onaeno,
sine Ondae koa i Ue anu paresao aroa.
3Moweweu menteea ka moleoa
Dopemoikoopo i Ue sekonopo pesomba.
4Mata mompelangka-langkai ka aroa konangi-nangi,
anu gagi huluno mia mosa'o gauno, onaemo hala.
5Sinongkano mia mokua manasa mohawe hadio ntu'u,
sine sompo mia anu madara manasa mompembasai makuraa.
6Arataa hinaweako elo megaupi
onaemo laho anu moliu inso a mia anu mo'ungke matea.
7Mia mosa'o gauno irendeo pobobarasaido,
hangano nahi domebehe mpoweweu moleoa.
8Melengku-lengkuako pesalaano mia anu sala,
sine mia nahina tataano moleo wineweuno.
9Moikoopo mo'ia a nsiuno atono raha
sekonopo me'asa raha saru beine ineheno me'u'ua.
10Aroano mia mosa'o gauno mosisiriakono wineweu mosa'o
ka nahi ipe'aroa a mpe'asa miano.
11Tewala anu mompasinggiri hinuku, mia anu napi hina pinembasaino gagi pande mosongka,
ka tewala mia pande mosongka pinoweeako pompaguru, onae ta mohawe ponto'ori.
12Anu Tedoa Moleo mekokoongakono rahano mia mosa'o gauno,
ka dumontaio mia mosa'o gauno a laro masolaa.
13Isema umonsoo birino a mperaalikino mia molema,
nahi ta montarima sangkino, tewala onaeno meboo-booli.
14Pompowee mewuni-wuni mepateo mosa'ono aroa,
ka pompowee anu nahi pototono menoro-noroako mokomolusao bamburu anu lansara.
15Moweweu moleoa onaemo po'undeno mia mentee,
sine mokodoitoo mia anu moweweu mosa'o.
16Mia anu pansia inso a nsala pinewowolo molino
ta mo'ia a mpo'ianga pepumpuado onituno mia mate.
17Mia anu ineheno mesana-sanaa ta mompemakura,
mia anu ineheno lana ka anggoro nahi ta gagi kaea.
18Mia mosa'o gauno pinake gagi tolosino mia mentee,
ka anu mohapu pedandia gagi euno mia moleo.
19Moikoopo mo'ia i pada one
sekonopo mo'ia saru beine anu ineheno me'u'ua ka mara ntekuda.
20Arataa anu tekosi ka lana hinao a mpo'iangano mia pande mosongka,
sine mia monge-monge nahi ponto'ori umu'uri-urio.
21Isema umungkeo menteea ka pompehohawa
ta mohawe tuwua, menteea, ka pompelangkai.
22Mia pande mosongka polio monsapoi kotado sorodadu,
ka mobangkuo bente anu pinerorohido.
23Isema dumagaio ngangano ka elono,
mekariao koroino inso a masukaraa.
24Mia mompelangka-langkai ka konangi-nangi ”Anu mompasinggiri” neeno,
onae meleluako pompelangka-langkai anu laloomo lahi.
25Anu moluwe ipepateo ineheno,
hangano kaeno mo'ondaha mo'angga.
26Po'eheno tesingka asa oleo,
sine mia mentee mompowee nahina tompaano.
27Pesombano mia mosa'o gauno atuu mokoburu,
tamoako mbo'u tewala pinesombaako a ntinoo anu mosa'o.
28Sakosii megaupi ta mate,
sine posakosiino mia anu rumongeo ta tumantuio.
29Mia mosa'o gauno mokapa rupano,
sine mia moleo umatorao pesalaano.
30Nahina ponto'ori anu mentee ka ponto'ori,
ka nahina pontimbanga anu mokompengkenaako Ira i Ue.
31Ngara pinatinda tiano oleo peteaa,
sine ponangia kongko a ngkae-Do i Ue.
Currently Selected:
Powadi 21: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
