Powadi 20
20
1Anggoro atuu pasinggiri, inua mokora atuu mompokogagi pohohoi,
nahi komba pande mosongka mia anu kobangku-bangku hangano onae.
2Doitoa inso ndi mokole kana pengaolino singa mongura,
isema mokotesingkao tekudano sumolangio koroino onaeno.
3Pinelangkaiomo asa mia anu olaiakono pe'u'uaa,
sine sompo mia benge-benge pu'uo pengengea.
4A pompu'uano wula usa anu moluwe nahi pompadeko;
onae mo'ungke i tempo konsowia, sine nahi pohawe hapa-hapa.
5Sinongka i laro aroano mia atuu kana uwoi anu ondalo,
sine mia anu hinao ponto'orino mokotambuo.
6Hadio mia pauo koroino me'aroa,
sine mia anu metenunu, isema mokohaweo?
7Mia anu mentee nahina tataano peleluno,
me'uraomo inuleno.
8Mokole anu mentoro a wawo ngkadera pobitaraa
mokonto'oriakono matano luwuno anu mosa'o.
9Isemake polio motae, ”Kupokomorinaomo aroaku,
mempori aku inso a halaku?”
10Orua rupa watu pontimba, orua rupa ponsa'u,
oruano Domokoburuakono i Ue.
11Nana'ote mbo'u pinokonto'oriomo inso a wineweuno,
ba nahina tataano ka moleo peleluno.
12Biri anu moronge ka mata anu mongkita,
oruano Doweweuo i Ue.
13Si butu poturi ka si utendonta mongkokolaro,
wileomo matamu ka komowohiako kaanga.
14”Nahi moiko! Nahi moiko!”, ipotae anu mo'oli,
sine mansano lumako, i'unde-undeo koroino.
15Maupo hinao wulaa ka hadio paramata,
sine peramba-ramba masuli olino onaemo wiwi anu hinao ponto'orino.
16Alaomo sangkano mia anu tumanggumio mia susua,
ka onae si potolao gagi mia tinawa euno mia hawe.
17Roti hasilino pompopo'oo mo'ahi namino,
sine lembuino ngangano bukeako one.
18Sinongka pinakosiako pontimbanga,
onaemo pu'uno peteamo saru akala.
19Isema mompau nahi mentee, momposaba rahasia,
onaemo pu'uno si pebawaako mia anu hadio pauno.
20Isema montotonaa ama ke ineno,
huluno ta mate i tempono wongi-wongi.
21Pine'ue anu magasi ihinawe a pompu'uano,
poko'ariano nahi rinonso.
22Si potae, ”Aku sumuloo wineweu mosa'o,”
sikori Iramo i Ue, Ira kumaduduiko.
23Orua rupa watu pontimba Domokoburuakono i Ue,
ka ponsa'u anu molengku atuu nahi moiko.
24Pelempano mia inso ndi Ondae i Ue,
ka i'amba kana'umpe mia ka ipokonto'orio sala ntumuwuno?
25Asa oho tiano mia tewala nahi pompewowolo ka ipotae, ”Mempori,”
ka i'amba montimbanga umarino montanga.
26Mokole anu pande mosongka mokonto'ori ira mia mosa'o gaudo,
ka ileloako ira roda ponsesaa.
27Penaano mia onaemo hulu-Do i Ue,
anu mepenteeo luwuno laro aroa.
28Pompehohawa ka petenunu kumaduduio mokole,
ka saru pompehohawa ipokorosoakono kadera poparentaano.
29Peramba-rambano mia mongura onaemo rosono,
ka tekosino mia mota'u onaemo uwa.
30Luwuno hanga mpesepia anu merea mokomorinao mosa'oa,
ka petunduhi mokomorinao laro aroa.
Currently Selected:
Powadi 20: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
