Podoaa 8
8
Hulu mekaru
8:1-4
1 #
Pel. 25:31-40; 37:17-24 Mepau Ira i Ue ndi Musa, 2”Pepaumo ndi Haruni ka potaeakono: Mansano upasao luwuno hulu, opitu hulu atuu asalakono wantahio te'alaako i arono hulu mekaru.” 3Kanandiomo iweweuo i Haruni. Te'alaako i arono hulu mekaru ipasao luwu huluno, kana peparenta-Do i Ue ndi Musa. 4Kanandiomo iwineweu hulu mekaru atuu: inso a wulaa pinalu; moiko karuno maupo bungano, hulu mekaru atuu pinalu. Menunu saru hapa anu Dopopokitaomo i Ue ndi Musa, kanandiomo hulu mekaru atuu iweweuo.
Poronsoa to Lewi
8:5-22
5Mepau Ira i Ue ndi Musa, 6”Ala iramo to Lewi inso i olodo to Isaraeli ka pokomorina iramo. 7Kanandiomo asalakono uweweuo ndi ondae mokomorina ira: tawisiako iramo uwoi po'onini hala, ka i'amba ondae asalakono mengkeruo asa ngkoroido ka melomboo sangkado. Kanandiomo dompokomorinao koroido. 8Umarino atuu asalakono dome'alao asa sapi lakino mongura saru pesomba kaangano inso a ntarigu moiko ntu'u, sinaloako lana. Omue mbo'u asalakono mo'ala asa sapi lakino mongura anu susua weweua pesomba po'onini hala. 9Umarino atuu asalakono tena ira to Lewi me'umpeda i arono Kema Tepotowoa, ka pumpu iramo luwuno bawaa Isaraeli. 10Umarimu tumena ira to Lewi me'umpeda i aro-Do i Ue, to Isaraeli asalakono numaao kaeno a nto Lewi atuu, 11i Haruni asalakono mopokita ira to Lewi gagi pesomba pinopokita i aro-Do i Ue inso i olodo to Isaraeli, ka dompepatinda me'anggao anggaa tia-Do i Ue. 12Mansano domenaao to Lewi kaedo a wawo uludo sapi mongura atuu, asalakono anu asa wineweu gagi pesomba po'onini hala ka anu susua gagi pesomba tinunu tia-Do i Ue moweweu pesintuwua tiado to Lewi. 13Omue asalakono mopo'aro ira to Lewi ndi Haruni ka a luwuno anano ka mopokita ira gagi pesomba pinopokita tia-Do i Ue.
14Asalakono kai kanandiomo upesusua ira inso i olodo to Isaraeli, ka to Lewi atuu gagi tia-Ku. 15Umarino atuu moikoomo to Lewi dompewinso me'anggao anggaado i Kema Tepotowoa, tewala umariomo upokomorina ira ka mopokita ira gagi pesomba pinopokita. 16Hangano, ondae asalakono pineweengako luwu ndi Ongkue inso i olodo to Isaraeli. Gagi eudo luwuno anu pine'anaako amba-ambano, luwuno ana amba-ambano inso a nto Isaraeli, Ku'ala iramo tia-Ku. 17#Pel. 13:2Menteeano luwuno anu hina amba-ambano i olodo to Isaraeli, moiko inso a mia maupo pinotuwu, luwuno tia-Ku. I tempono Kupepate ira luwuno anu hina amba-ambano i wita Masiri, Kupokomempori iramo tia-Ku. 18Ku'ala ira mbo'u to Lewi gagi euno luwuno ana amba-ambano i olodo to Isaraeli. 19Kupeweengako ira to Lewi inso i tonga-tongado to Isaraeli gagi pompowee ndi Haruni ka luwuno anano ka domeweweuo luwuno anggaa tiado to Isaraeli i Kema Tepotowoa ka dompoweweu pesintuwua tiado to Isaraeli, kasihina pohuku i olodo to Isaraeli tempono dome'umpeda a mpo'ianga mempori.”
20Ka i'amba i Musa, i Haruni ka luwuno bawaa Isaraeli meweweuo mongkona atuu a nto Lewi. Kona ntu'u kana parenta-Do i Ue ndi Musa mongkona to Lewi, kanatuumo domeweweuo to Isaraeli ndi ondae. 21To Lewi mpokomorinao koroido inso a hala ka melomboo sangkado. Ka i'amba i Haruni mopokita ira gagi pesomba pinopokita i aro-Do i Ue, ka moweweuako ira pesintuwua mokomorina ira. 22Umarino atuu mpewinso iramo to Lewi ka dome'anggao anggaado a Ngkema Tepotowoa, i Haruni ka luwuno anano anu dumagai ira. Kana parenta-Do i Ue ndi Musa mongkona to Lewi, kanandiomo domeweweuo.
Pompu'uano ka pokotampulaano tempo po'anggaado to Lewi
8:23-26
23Mepau Ira i Ue ndi Musa, 24”Ndiomo anu ira mentondao to Lewi: sompo mia anu tinuwuno rua pulu ka olima nta'u ka torea asalakono mo'angga, kai po'angga a Ngkema Tepotowoa. 25Sine mansano tinuwuno lima pulu nta'u, onae asalakono tepotola inso a anggaa atuu, ka siimo ipo'angga mbo'u. 26Onae moiko ipokowali ira pepaekomono a Ngkema Tepotowoa i larono dome'anggao anggaado, sine nami anggao mbo'u anggaano se'eluno. Asalakono kanandiomo uweweu ira to Lewi mongkona anggaado.”
Currently Selected:
Podoaa 8: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
