Podoaa 13
13
Hopulu ka orua puu pompadaso
13:1-33
1 #
Win. 1:19-33
Mepau Ira i Ue ndi Musa, 2”Pontenamo ba te'opia mia padasoo wita Kana'a, anu Aku weeako ira to Isaraeli. Inso a sompo sukuno uempu'udo, omue asalakono montena asa mia, luwuno petewawa i olodo.” 3Ka i'amba i Musa tumena ira inso i pada one Parani, menunu saru petena-Do i Ue. Luwudo mia atuu onaemo petewawa i olodo to Isaraeli. 4Ndiomo luwuno needo: Inso a nsuku Rube: i Siamua anano i Sakuri; 5inso a nsuku Simeo: i Sapati anano i Hori; 6inso a nsuku Yehuda: i Kalebi anano i Yepune; 7inso a nsuku Isakari: i Yigali anano i Yusupu; 8inso a nsuku Eparai: i Hosea anano i Nuni; 9inso a nsuku Benami: i Paliti anano i Rapu; 10inso a nsuku Sebulo: i Gadieli anano i Sodi; 11inso a nsuku Yusupu, onaemo inso a nsuku Manase: i Gadi anano i Susi; 12inso a nsuku Dani: i Amieli anano i Gemali; 13inso a nsuku Asere: i Seturi anano i Mikaeli; 14inso a nsuku Napatali: i Nahibi anano i Wopisi; 15inso a nsuku Gadi: i Gueli anano i Makihi; 16Onaemo needo luwuno mia anu tinenano i Musa padasoo wita atuu. I Hosea anano i Nuni neeno i Yosua pinoponeeno i Musa.
17I Musa tumena ira mempadasoo wita Kana'a, ”Imelakomo inso i ndi'ai i wita Nege ka impewuatakomo a mentorukuno, 18Impepenteeomo kana'umpe pongkitamiu wita atuu, tongku anu mpo'iangario moroso ira ke molema, tedei ira ke hadio. 19Kana'umpe mbo'u wita anu pino'iangarido, ba moiko ke mosa'o; kana'umpe luwuno kota po'iangaado, mebente ke naahi. 20Ka i'amba kana'umpe wita atuu, ba mewalo ke morungku, i ra'ai ba hadio koa keu ke naahi. Impedatoo aroamiu ka impowawamo tedei inso a hasilino wita atuu.” Tempo atuu kontongaano tempo po'opua wua anggoro anu amba-ambano.
21Melako iramo mempadasoo wita atuu mompu'u inso i pada one Sini hawe i Rehobo, a nsala lumako i Hamati. 22Mpelempa ira melaloo wita Nege ka mehawe i Heberoni. I ra'ai rau i Ahimani, i Sesai ka i Talumai, inuledo to Enaki. Heberoni winangu tese'elu opitu nta'u sekono Soani i Masiri. 23Mansado mehawe i Lembono Esikoli, i ra'ai dompompole asa sampa saru asa doa wua anggoro, ka i'amba orua mia sumelaakono asa mpole keu. Mpowawa ira mbo'u ba'opia wua delima ka wua ara. 24Po'ianga atuu domeneeakono mia Lembono Esikoli, hangano doano wua anggoro anu pompoledo to Isaraeli i ra'ai.
25Umarino pato pulu oleo, mpekule ira inso a mpopadasoa wita atuu. 26Melako ira ntepohaweakono i Musa, i Haruni ka luwuno bawaa Isaraeli i Kadesi, i pada one Parani. Mpowawa ira lele ndi ondae ka a luwuno bawaa saru mopokitao hasilino wita atuu ndi ondae luwudo. 27Domentutuluakono, ”Mpewinso kamimo i wita, isua itena kami. Lano wita atuu hadio ntu'u susu ka siu hoanino, ndiomo hasilino. 28Butu koa, tongku anu mpo'ia i wita atuu memoroso ira, luwuno kotano mebente ka langkai ntu'u. Inuledo mbo'u to Enaki kimengkita iramo i ra'ai. 29To Amale mpo'ia i Wita Nege, to Heti, to Yebusi ka to Amori mpo'ia i mentorukuno, to Kana'a mpo'ia i asa ngkeu wiwi ntahi ka i asa ngkeu wiwi ngkoro Yarade.” 30Ka i'amba i Kalebi mo'arahako mokorodoo aroado tongku atuu i arono i Musa, ipotae, ”Naahi! Kita koa melako ka mpetorokio wita atuu, hangano manasa kita koa menangio!” 31Sine luwuno mia anu perongano lumako i ra'ai mpotae, ”Nahi kita mpokomelako sumapoio tongku atuu, hangano memoroso irapo sekono ontae.” 32Dompohaweako ira mbo'u to Isaraeli lele mosa'o mongkona wita anu domempadasoo, dompotae, ”Wita anu kimelaloomo mempadasoo, onaemo asa wita anu mongkaa palilino. Luwuno mia anu kinita mami i ra'ai onaemo luwuno mia anu me'o'ondau tinadedo. 33Kimengkitao mbo'u i ra'ai mia melolangkai, inuleno i Enaki te'inso a mia melolangkai. Kimengkitao koroi mami kana kosume, kanatuu koa mbo'u domengkita kami.”
Currently Selected:
Podoaa 13: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
