Podoaa 12

Halado i Miriami ka i Haruni

12:1-16

1I Miriami ka i Haruni tumatao i Musa mongkona saru beine to Kusi anu inalano, hangano onae mo'alaomo asa beine to Kusi. 2Dopotae, ”Mentee ntu'u ke Ondae i Ue mepau butu telalo ndi Musa? Kombake Ondae mepau telalo mbo'u ndi ontae?” Mongkona atuu Dorongeo i Ue. 3Kanatuumo i Musa asa mia anu tedoa mauru, laluaopo sekono sompo mia i wawontolino. 4Borono Dopepau i Ue ndi Musa, ndi Haruni ka ndi Miriami, ”Impeluarakomo otolu komiu a ngkema Tepotowoa.” Mpeluarako iramo otolu ira. 5Ka Do'amba i Ue metii a laro nseru-Do ka mentade a mpewowano kema atuu. Dopoboi ira i Haruni ka i Miriami; me'aro iramo orua ira. 6Mepau Ira, ”Irongeomo pau-Ku andio. Tewala i olomiu hinao asa mia nabi, asalakono Ongkue Ue mokomengkaao koroi-Ku ndi onae a laro pongkita. Aku mepau saru onae a laro mo'ipi. 7#Ibr. 3:2Nahi kanatuu saru tetenaa-Ku i Musa, asa mia anu metenunu a laro luwuno raha-Ku. 8Tepo'aro rupa Kupepau saru onae, nahina mo'oloti, komba mesingguru ka ikitao rupa-Do i Ue. Tembio ke nahi imedoito tumatao tetenaa-Ku i Musa?” 9Tesingkaomo tekuda-Do i Ue ndi ondae, ka Do'amba lumako. 10Tempono mewuatakoomo seru inso i wawono kema, tengkitaomo i Miriami kona haki ngkuli anu mesaki, mopute kana seru baku. I Haruni mewolili ndi Miriami ka ikitao i Miriami kona haki ngkuli anu mesaki!

11Ka i'amba motae i Haruni ndi Musa, ”Ipehohawa aku ueku, siimo ipopotembia kami hala mami anu wineweu mami a laro benge-benge mami. 12Si po'ineeo igagi kana ana dalo anu mate tempono ipeluarako inso a laro kompono ineno entonga moboomo ihino.” 13Onaemo ka ipebooli i Musa ndi Ondae i Ue, ”Oo Ue Ala, po'ineeomo Ipokotompao.” 14#Pod. 5:2-3Ka Do'amba mepau i Ue ndi Musa, ”Ande-andeno amano umonuio rupano, nde nahi ta mo'o'anuno ke i larono opitu oleo? Po'ineeomo opitu oleo tehineno ipinonsia i bungkuno pekemaa, ka i'amba moikoomo iwali tinarima.” 15Ka i'amba i Miriami pinonsia i bungkuno pekemaa opitu oleo tehineno, ka tongku atuu nahi dompelungka banapi wali tinarima i Miriami. 16Ka i'amba mpelungka iramo inso i Haseroti ka mpekema i pada one Parani.

Currently Selected:

Podoaa 12: XMZ

Highlight

Compare

Copy