I MATIU 11
11
1Mansa-Do umari i Yesu me'oliwi a hopulu ka orua ana guru-Do, lumako Iramo inso i ra'ai ka Dopompaguru ka paleleo moikono tuwua a luwuno kota-Do.
Ondae i Yesu ka i Yohane Puu Mpobaho
11:2-19
(Luk. 7:18-35)
2A laro torungku irongeo i Yohane mongkona inangga-Do i Kerisituu, 3ka i'amba tumena ira ana guruno mpesikeno ndi Ondae, ”Omiumoke anu Ira hawe atuu ke asalakono kami mposikori mia susua?” 4Dosangki ira i Yesu, ”Imelakomo ka imempauakonomo i Yohane hapa anu rinongemiu ka anu kinitamiu: 5#Yes. 35:5-6; 61:1 mia morawu mongkita, mia luuka melempa, mia haki ngkuli mesaki gagi tompa, mia mobongo moronge, mia mate winangu ka a mia memongkokolaro pinalele lele mawongkoa. 6Ka me'uraomo mia anu nahi gagi mosa'o aroano ka tumarima Aku.” 7Mansado melako ana guruno i Yohane, mompu'u Iramo i Yesu mepau a mia hadio atuudo mongkona i Yohane, ”Pombioke ka imelako i pada one? Mpokita intowu anu lineluno angi ngkoraane ngkoramai? 8Ke hapake imelakoako? Mpongkita mia anu mesangka alusu? Mia anu mesangka alusu atuu po'iangano a langkanaeno mokole. 9Gagi hapa imelakoako? Mpongkita nabi? Mentee, ka Kupauakomiu, tendeano lauaopo sekono nabi. 10#Mal. 3:1 Hangano mongkona onae hinao teburi:
Kitaomo, Kutenao tinena-Ku mese'elungi-Ko,
onae ta patindao pesalaa-Mu i aro-Mu.
11Kupauakomiu: Menteeano i olodo anu pine'anaakodo beine nahi hori hina anu lalu langkai sekono i Yohane Puu Mpobaho, sine anu lalu kodei a Poparentaa suruga langkaiopo sekono onae. 12#Luk. 16:16 Mompu'u ipontutulu i Yohane Puu Mpobaho ranta kanandio-andio, Poparentaa Suruga inewai ka anu umewaio mo'arahako pabawaio. 13Hangano luwuno nabi ka wunta Taura mpompau anu ta gagi ranta haweno i Yohane 14#Mal. 4:5; Mat. 17:10-13; Mrk. 9:11-13 ka – tewala imentarimao – onaemo i Elia anu ta hawe atuu. 15Isema anu mebiri, ka iporonge! 16Saru hapake Aku pandiriakono mia tuwu kanandio-andio? Ondae atuu kana nana'ote anu mentoro a olu ka mpebooliako ira wali-walido:
17kimpesiloliakomiu, sine nahi mpo'ense-ense,
kimpenaniako penani pompemasusa, sine nahi mpo'inombo.
18Hangano haweno i Yohane, nahi pongkaa, ka nahi po'inu, ka dompotae: Onae ipewinsokio onitu nsa'o. 19Ka i'amba i Ana Manusia hawe, Ondae mongkaa ka mo'inu, ka dompotae: Kitaomo, Ondae asa mia modoko mongkaa ka mara mpo'inu, sambe'edo puu popumpu sima'ulu ka mia ntehala. Sine ponto'ori mentee inso ndi Ondae Ue Ala pinokomentee hangano wineweuno.”
Ondae i Yesu kumuahakono ba opia kota
11:20-24
(Luk. 10:13-15)
20Ka Do'amba i Yesu mompu'u kumuahako ira kota anu nahi dontepidi, maupo i tu'ai mararu ntu'u Dopoweweu anu kinohali-haliako: 21#Yes. 23:1-18; Yeh. 26:1–28:26; Yoe. 3:4-8; Amo. 1:9-10; Sak. 9:2-4 ”Masolakomo Korasi! Masolakomo Besaida! Hangano tewala i kota Tirusi ka Sidoni gagiano luwuno anu kinohali-haliako anu gagiomo i tonga-tongamiu, tehineomo dontepidi ka mpo'inombo. 22Sine Kupauakomiu: A oleo pobitaraa tembiado Tirusi ka Sidoni ta lalu monongkoopo sekono tembiamiu. 23#Teg. 19:24-28; Yes. 14:13-15 Ka omue Kapenau, nde kowinuatakoke hawe i langi? Naahi, omue kopinotii hawe a mpo'iangado mia mate! Hangano tewala i Sodomo gagi luwuno anu kinohali-haliako anu gagiomo i tonga-tongamiu, kota atuu manasa da mentade hawe oleo andio. 24#Mat. 10:15; Luk. 10:12 Sine Kupauakomiu: A oleo pobitaraa, tembiano wita Sodomo ta lalu monongko sekono tembiamiu.”
Po'oluako-Do Puu Pongkadudui
11:25-30
(Luk. 10:21-22)
25I tempo atuu mepau Iramo i Yesu, ”Ku'unde-unde Komiu, Ama, Ueno langi ka tolino, hangano luwuno atuu Iwuniako ira mia mpande mposongka ka mia mempande, sine Ipokomengkaao a mia kodei. 26Oo Ama, onaemo anu pinemoiko-Miu. 27#Yoh. 1:18; 3:35; 10:15 Luwuno Dowee Akumo Ama-Ku ka nahina maupo te'asa mia tumo'ori Ira Ana sangkadio Ondae i Ama, ka nahina maupo te'asa mia tumo'ori ira i Ama sangkadio Ana ka mia anu ndi onae Dopemoikoo Ana atuu mopoto'oriakono.
28Ime'aiwamo ndi Ongkue, luwuno anu memokendo ka ntelusa ka mpopemobea, Aku mowee komiu penaa-naaa. 29#Yer. 6:16 Imentembiomo tinembi anu Kupopotembia komiu ka impepagurumo ndi Ongkue, hangano Ongkue mauru ka me'urumako ka sumangamiu ta mohawe rodoa. 30Hangano tinembi anu Kupopotembiakomiu atuu monongko.”
Currently Selected:
I MATIU 11: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
