Ponsabangi 3
3
Pontarero a laro marasaia
3:1-66
1Ongkuemo anu kumitao marasaia
hangano ponsepi tekuda-Do.
2Dosaari aku ka weweu aku melempa
a laro wongi-wongi nahina mewine.
3Menteeano, Dopopotundu-tunduhiakune
kae-Do asa oleo.
4Doweweuo ihi ka kuliku tengkuru,
wukuku Dopudu ira,
5Ondae mowangu rere watu lumimbu aku,
lumimbuakune masusaa.
6Doweweu aku mo'ia a laro wongi-wongi
kana mia anu tehineomo mate.
7Dowanguo wala lumimbu aku, ranta nahi kupokompeluarako;
ranteku Dopokomobeao.
8Maupo kupebooli ka meraali mepetulungi,
Dokominoakono pekakaiku.
9Salaku Do'onsoiakono poleno watu,
ka mokogagio sala kodeiku nahi pinesalai.
10Kana berua Dotowoki aku,
kana singa a mpewuniano.
11Dopelengkuakono salaku, beri-beri aku
ka weweu aku tededengke.
12Dopadiio pana-Do, ongkue gagi
tetutuano mata mpana.
13Dopepahoakono a laro aroaku
ana mpana inso a mponaapa-Do.
14Ongkue gagi pengingisiado luwuno tongkuku,
gagi penani pompopodeu-deudo asa oleo.
15Dopokomowohiakune masukaraa,
mopo'inuakune rasu mopa'i.
16Ngisiku Dopuroakono one;
Dodanso aku a laro pampawu.
17Omiu lumiahakono penaaku inso a rodoa,
kukolupeo me'uraa.
18Kupewowoloo: tampulaomo marambaku
ka pomperorohiaku ndi Ondae i Ue.
19”Pewowoloomo marasaiku ka pelakopiku,
a ipo ka rasu atuu.”
20Sumangaku wela rumambeo mongkona atuu
ka me'isei a loro ngkoroiku.
21Sine ndiomo anu kupekokoongakono,
hangano atuu kupomperorohi:
22Menteeano nahi otu-otu pompehohawa-Do i Ue
pompowee-Do nahi hori pingko,
23wo'ohu mpiha sompo mo'oru;
langkai petenunu-Miu!
24”Ondaemo i Ue tiaku,” ipotae sumangaku,
onaemo pu'uno ka kupomperorohi ndi Ondae.
25Ondae i Ue atuu moiko a mia anu momperorohi ndi Ondae,
sumangano anu umungke Ira.
26Moikoomo mesikori saru menoro-noro
pontulungi-Do i Ue.
27Moikoomo asa mia tama tumembio
pasanga tempono imongura.
28Po'ineeomo ka ipentoro asa-asano ka menoro-noro
tewala Ondae i Ue monaakono pasanga.
29Po'ineeomo ipebangkuako saru rupano a laro pampawu,
bara'ura hinao pomperorohia.
30Po'ineeomo ipeweengakono kombisi a mia anu tumampeleo,
po'ineeomo imowohiako pepaukia.
31Hangano komba nahina tampulaano
nahi Dotarimao i Ue.
32Maupo Dopompotii masusaa, me'aroa Ira koa mbo'u
montonda langkaino pompehohawa-Do.
33Hangano komba inso i aroa-Do mompokonsii
ka mokomasusa ira anano mia.
34Tewala linolandaako karu
luwuno tinawa a wita,
35tewala tiano mia pinelengkuako
i aro-Do Anu Tedoa Mantande,
36ke mia wineweu nahi moleo a laro kara-karano,
nahike Ira kumitao i Ue?
37Isemake Ondae anu mepau, ka luwuno gagi?
Kombake Ondae i Ue anu meparentaakono?
38Kombake inso a nganga-Do Anu Tedoa Mantande
meluarako hapa anu mosa'o ka anu moiko?
39Tembio mia anu tuwu me'anaiki?
Sompo mia anu nahi pompesompo hangano halano!
40Aiwamo tompempenteeo ka memparesao tuwuto,
ka tompepokule ndi Ondae i Ue.
41Aiwamo tomentandeo aroa ka kaeto
ndi Ondae Ue Ala i suruga:
42Tehala kamimo ka me'ewa,
nahi oniniakami halamami.
43Omiu mesoumbuako tekuda, lumulu kami
ka mepate kami nahina pompehohawa.
44Omiu mesoumbuako seru,
ranta nahina pekakai anu haweako.
45Ipokogagi kami rompo ka mokoburua
i olodo tongku.
46Ndi omami, luwuno iwalimami
mpongangao ngangado.
47Tededengke ka oho kumona kami,
ropua ka terawoa
48Mataku mompo'iti waaano uwoi,
hangano terawoano ana beineno tongkuku.
49Uwoi mataku waa mpiha
nahi penaa-naa,
50ranta ka Dokitao i Ue inso i wawono ka mensiro
inso i suruga.
51Mataku mokomopoeo sumangaku
hangano luwuno ana beineno kotaku.
52Kana manu-manu linulu aku mpiha
hangano ondae anu gagi iwaliku nahina pu'uno.
53Ondae mpepate aku a laro aa,
mewunoakune watu.
54Uwoi mowo a wawo uluku,
kupewowoloo, ”Mate akumo!”
55”Oo, Ue, kupoboio nee-Miu inso
a laro aa anu ondalo.
56Irongeo suaraku!
Sii tompoo biri-Miu a pe'anaikiku ka pebooliku!
57Omiu umpeda tempono kupoboi-Komiu,
Omiu mepau, Sii doito!”
58”Oo Ue, Iteahakonomo kara-karaku,
Ikaduduiomo tuwuku.
59Ikitaomo nahi moleoa ndi ongkue, oo Ue;
Iweeakunemo moleoa!
60Ikitaomo luwuno pombalodo,
luwuno tinoodo ndi ongkue.”
61”Irongeomo pepaukido, oo Ue,
luwuno tinoodo ndi ongkue,
62wua wiwido mia anu me'ewai aku,
ka tinoodo ndi ongkue asa oleo.
63Ipekokoongakono pentoro pentadedo!
Ongkue pinokogagi penani pompopodeu-deudo.”
64”Omiu moweweu pombaloa ndi ondae, oo Ue,
menunu saru wineweuno kaedo.
65Omiu mokomoteao aroado;
po'ineeomo i'alu ira pontotonaa-Miu!
66Omiu lumuluako ira tekuda
ka rumopu ira inso i totono langi, oo Ue!”
Currently Selected:
Ponsabangi 3: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
