Yosua 2

Mia mpopadaso i Yeriko

2:1-24

1Menongkoakoomo i Yosua anano i Nunu montena inso i Sitimi orua mia pompadaso, ipotae, ”Ilakomo poporoo inia atuu, ka kota Yeriko.” Lumako iramo mia atuu, ka hawe i rahano aasa beine belesu anu meneeako i Rahabu, ka doperato i tu'ai.#Ibr. 11:31; Yak. 2:25 2Ka i'amba pinauako ira mokole Yeriko, motae, ”Hieno wongi, hinao mia to Isaraeli anu hawe padasoo inia andio.” 3Montenaomo mokole Yeriko lumako pauakono i Rahabu, ”Wawa iramo meluarako mia anu hawe ndi omue atuu, anu mewinso i rahamu nde hawe ira padasoo luwuno inia andio.” 4Sine beine atuu se'eluno iwawa iramo orua mia atuu ka iwuni ira. Ka ipotae, ”Lano mia atuudo hawe ira ndi ongkue, sine nahi kuto'orio insoado, 5i tempono pewowa inia tamo tinondo rangku wongi, meluarako iramo mia atuu; nahi kuto'orio, ba isua dolako. Laluopo impodadu lumulu ira, asalakono da komiu humawe ira.” 6Sine beine atuu se'eluno itena ira mewuatako idunsi ka iwuni ira itotono howuno seami anu lano hinaomo i tu'ai. 7Melako iramo mia atuu, mpepolulu tumutuio koro Yarade, hawe ia mpesakiakoa, ka pewowano inia tinondo, mansado mia mpepolulu mpeluarako.

8Sine ka napi dopoturi mia atuu, mewuatakoomo beine atuu tepohaweako ira 9ka motaeako ira, ”Kuto'orio, nine Ondae i Ue Dopeweengakonomo inia andio ndi omiu ka medoito kamimo saru luwuno palili inia andio. 10Nde kimerongeo, nine Ondae i Ue moko'areo Tahi Teberau i aromiu, tempono impelempa mpeluarako inso i wita Masiri, ka hapa anu wineweumiu ia orua ira Mokoledo to Amori i asatowano koro Yarade, ndi Sihoni ka ndi Ogo, anu pinepatemiumo.#Pel. 14:21; Pod. 21:21-35 11I tempono kimerongeo lele atuu molusaomo aroamami ka namihina sumangano sompo mia umewai komiu, nde Ondae Ue, Ue Alamiu, Ue Ala anu iwawono langi, ka i totono langi. 12Kanandio, ipesumpamo, ia nee-Do i Ue, nde melelu akumo mauru ndi omiu, ka komiu mpelelu moiko ia pepaekompoku; ka ipowee aku petondoni anu gagi pe'iniaku, 13nine komiukoa mo'inee ira ka dotuwu amaku ka ineku, pepaekompoku anu tama ka beine ka luwuno miado, ka komiukoa tumolosio penaa mami inso a matea.” 14Sumangki ira mia atuu ndi onae, ”Penaamami gagi pe'inia ndi omiu, polomokoa kasi popauo hapa ki'aiwaako andio; nde ba Dopewengakonomo i Ue inia andio ndi omami, kamimo mopokitaakomu pontarimakasi ka petenunumami ndi omue.” 15Ka i'amba beine atuu motii ira mepowuluako ula mesala ia pentangoa, nde rahano mentade ia rerewatu kota, i tu'aimo ipo'ia. 16Ipotaeako ira ndi ondae, ”Lakomo a mentorukuno, kasi ntepotowoako ira mia lumulu komiu, ka ipewuni te'otolu oleo tehineno, ranta ka dompekule anu mpepolulu; ka i'amba motilalo.” 17Dopotae mia orua ira atuu ndi onae, ”Kamimo tepotola inso ia sumpamami ndi omue, anu inemamu gagi pedandimami 18menteeano ba kimpewinsokio inia andio, asalakono ula kirimisi andio upetanggoakono ia pentangoa itempono upotii kami, ka amamu saru inemu, pepaekompomu, saru luwuno pe'etumu, ka upumpu ira i rahamu. 19Ba isema anu meluarako inso ia pewowano rahamu onaeno ta sumusuruo ba te'uwu reano, komba hangano omami; sine isemamokoa anu ilaro rahamu pinokomasola, omamimo anu sumusuruo te'uwuno reano. 20Sine tewala upopauo mongkona hawemami andio tepotola kamimo inso ia sumpa mami atuu, anu utenaa kami pauo ndi omue.” 21Motaeomo beine atuu, ”Kanamo anu pinaumiu, kanatuumo anu ta gagi.” Umari atuu ipo'inee iramo ka dolako. Ka i'amba beine atuu metanggoakono ula kirimisi ia pentangoa. 22Lumako iramo ranta ka dohawe ia mentorukuno. Mo'ia iramo i tu'ai otolu oleo tehineno, ranta ka dompekule mia anu lumulu ira. Mia mpepolulu atuu pepo'ungke iramo isuamokoa, asa ngkeu sala, sine nahi dohawe ira. 23Mepokule iramo mia orua ira atuu, montindulu inso ia mentorukuno, ka do'amba me'asatowaako hawe ndi Yosua anano i Nunu, ka do'amba tumutuluo luwuno pinembasaido. 24Dompotae ndi Yosua, ”Ondae i Ue dopewengakonomo luwuno inia ndi'ai a ngkaeto, ka luwuno palili i inia atuu medoito ira umaropi kita.”

Currently Selected:

Yosua 2: XMZ

Highlight

Compare

Copy