Yosua 18

Petiaa wita Kana'a tiado opitu tongku

18:1-10

1Mentepumpu iramo luwudo to Isaraeli i Silo, ka dompoweweu kema tepumpua i ra'ai, nde wita atuu mpetuundu iramo ndi ondae. 2I tempo atuu da opitu tongku i olodo to Isaraeli, napi dompohawe tia pusaka. 3Onaemo ka ipotae i Yosua a nto Isaraeli, ”Ba da ta tehine mbo'u impeluweki, ka nahi melako mpo'ia ia inia anu Doweeako miu i Ue, Ue Alado uempu'u miu? 4Impobiniki otolu mia te'inso ndi omiu sompo-sompo tongku. Aku tumena ira, ka dompepatinda mpelempa memparesao wita atuu, imeburio ta'ano wita, mengkitao pusakado sompo mia, umari atuu ka dompepokule ndi ongkue. 5Umari atuu ka dompetiao gagi opitu ntia. Tongku Yehuda ira mpo'ia mpiha ia witado i selata ka inuleno i Yusupu ira mpo'ia mpiha i wita utara. 6Imeburio ta'ano wita atuu a opitu ntia ka imewawao ndi ongkue; ka ku'amba umundiakomiu ndi'ai i aro-Do i Ue, Ue Alato. 7Nde to Lewi nahi dompohawe tia i olomiu, nde potoro gagi sando mpesomba-Do i Ue onae gagi pusakado, ka tongku Gadi, tongku Rube ka tongku Manase anu asantia atuu mpohawe iramo pusakado i sabaano oleo Koro Yarade, anu doweeako ira i Musa, tetenaa-Do i Ue.”

8Ka do'amba mpompakale mia atuudo ka domelako. Itena ira i Yosua melako ka domeburio ta'ano wita atuu, ipotae, ”Imelakomo mpelempa memparesao wita atuu imeburio ta'ano, ka i'amba mpekule ndi Ongkue; ka i ndi'ai i Silo aku umundiakomiu i aro-Do i Ue.” 9Mia atuudo melako ka mpelempa telalo ia witado. Domeburio ta'ano a wunta, sompo-sompo kota, a opitu ntia ka dompekule ndi Yosua ia kemado i Silo. 10I Yosua umundiako ira i Silo, i aro-Do i Ue, ka i ra'aimo dotiaako ira i Yosua wita atuu a nto Isaraeli, menunu ka petiaado.

Pusakado tongku Benami

18:11-28

11Meluarakoomo undia tongku inuleno i Benami montonda pepe'etuado, ka wita anu dome'inundiako mo'ia i olono witado inuleno i Yehuda ka wita inuleno i Yusupu. 12Tida i utara, mompu'u inso i Koro Yarade, ka i'amba tida atuu mewuatako i korimbino torukuno i utara Yeriko, morake i sumooano oleo lako ia mentorukuno, ka te'aro i pada one Beti-Awe. 13Inso i ra'ai tida atuu motilalo i Lusi, i selata, te'aro i korimbino torukuno umpeda i Lusi, onaemo Beteli; ka i'amba tida atuu montindulu ke Ataro-Adari a mentorukuno anu i selata itotono Beti-Horoni. 14Ka i'amba tida atuu melengkuako, pansia inso a mentorukuno anu i asambalino Beti-Horoni selata tetutu barata daya ka poko'ariano i Kiriati-Baali, onaemo Kiriati-Yearimi, asa kota inuleno Yehuda. Onaemo atuu sumoano oleo. 15I Selata mompu'u inso ia untuno Kiriati-Yearimi, ka i'amba tida atuu lumako a sumooano oleo, ka te'aro mbo'u a mata uwoi Me-Nepatoa. 16Ka i'amba tida atuu montindulu i untuno mentorukuno anu i asambalino limbo Beni-Hinomi, i utarano lembono to Repai; ka i'amba montindulu te'aro a limbo Hinomi, tumondao korimbino Yebusi, iselata, ka i'amba montindulu lumako i Eni-Roge. 17Ka i'amba melengkuako i utara, te'aro i Eni-Semesi ka te'aro mbo'u i Gelilo i asambalino porakea Adumi, montindulu a watu Bohani anano i Rube, 18motilalo lumako i korimbino torukuno i asambalino Beti-Araba i utara, ka montindulu i Araba-Yarade. 19Ka i'amba tida atuu motilalo te'aro a korimbino torukuno umpeda i Beti-Hogola i utara ka tida atuu pokotompaano i kolono utara Tahi Mate, lako i ngangano koro Yarade i selata. Onaemo tuu tida i selata. 20Koro Yarade onaemo tidano i sabaano oleo. Onaemo atuu pusaka inuleno i Benami ka tidano a somposiuno montonda pepe'etuado. 21Luwuno kota tongku inuleno i Benami montonda pepe'etuado onaemo Yeriko, Beti-Hogola, Eme-Kesi, 22Beti-Araba, Semaraimi, Beteli, 23Haawi, Para, Opara, 24Kepa-Haamonai, Opini, ka Geba; hopulu ka orua kota saru luwuno iniano. 25Gibeo, Rama, Beero, 26Misipa, Kepira, Mosa, 27Reke, Yiripeeli, Tarala, 28Sela, Elepa, ka Yebusi, onaemo Yerusale, Gibea ka Kiriati-Yeari; hopulu ka opaa kota saru luwuno inia. Onaemo pusakado inuleno i Benami montonda pepe'etuado.

Currently Selected:

Yosua 18: XMZ

Highlight

Compare

Copy