Yosua 11

Tedontano Kana'a Utara

11:1-15

1Mansano anu teweweu atuu teronge ndi Yabi mokoledo to Hasori, montenaomo mia lako ndi Yoba, mokoledo to Madoni, ka a mokole wita Simoroni, ndi mokole Akasa, 2ka ia luwuno mokole i Utara, a mentorukuno, i Araba-Yarade, ka i selatano Kinero, Sepela, Dore i sumooano oleo, 3onaemo mokoledo to Kana'a ia sabaano oleo ka i sumooano oleo, to Amori, to Heti, to Perisi, to Yebusi a mentorukuno, ka to Hewi ia mpu'uno torukuno Heremoni, i wita Misipa. 4Ka do'amba mpeluarako luwu mokole andio mperonga-ronga saru luwuno sorodadu, tedoa hadio palili, kana one i wiwi ntahi hadiono, ka tedoa hadio ngara ka kareta. 5Mokole andiodo ntepo'asa, aiwa mpekema mperonga-ronga umpeda mata uwoi Meromi, mpeteaako ira to Isaraeli.

6Mepau Iramo i Ue ndi Yosua, ”Sii doito umaropi ira, nde tisomo bara'ura kana langku kanandio, Aku meweengako ira memate luwu a nto Isaraeli. Ngarado asalakono impepate ira, karetado asalakono imentunuo.” 7I Yosua ka luwudo sorodaduno tepohaweako ira nahi domengkokooo umpeda a mata uwoi Meromi, ka domensapoi ira. 8Ka Ondae i Ue meweengako ira a nto Isaraeli. Donangi ira, ka dolulu ira hawe i Sidoni-Langkai ka hawe i Mesirepo-Maimi, ka hawe i lembono Misipa anu i sabaano oleo. Kanandiomo domempinepate, nahina maupo te'asa mia anu tepotola. 9Iweweu ira i Yosua kana anu Dopauakono i Ue: Ngarado mensinolangi ka karetado mentinunu.

10Itempono atuu, pekuleno i Yosua irontuo mbo'u Hasori, ka mokoleno ipepateakono ponai. Nde hangano i Hasori se'eluno anu tedoa moroso i olono luwuno poparentaa i wita atuu. 11Luwuakoano anu menaa ilarono pinepateako ponai ka dopokoropu ira mia atuudo. Nahina anu tepo'ia tuwu, ka luwuno anu hinao penaano ka Hasori domesongkoo. 12Ka luwuno kota ka anu mokoledo inangio i Yosua ka ipepateako ira ponai, kana petenano i Musa, tinena-Do i Ue. 13Sine, to Isaraeli nahi domentunuo kota tuudo, anu wunangu i wawoni howuno kota se'eluno, tendeano Hasori anu tinununo i Yosua. 14Luwuno sangka ka pinotuwu anu laro kota atuu, dompomuru iramo to Isaraeli. Sine luwuno mia dompepateako ira ponai, nahina anu tepo'ia tuwu, inso ia luwuakoano anu hinao penaano. 15Kana tinena-Do i Ue ndi Musa, tetenaa-Do atuu, kanatuumo petenano i Musa ndi Yosua ka kanatuumo i weweuo i Yosua: Nahina te'asa anu kinolupeno kana tinena-Do i Ue ndi Musa.

Poponangido to Isaraeli

11:16-23

16Kanandiomo inangi ira i Yosua luwuno wita atuu, moiko a mentorukunono, luwuno Wita Nege, wita Gose, Sepela, ka Araba-Yarade, ka a mentorukuno i Isaraeli saru wita lembono; 17mompu'u inso ia ntorukuno Gundu, anu morake lumako i Seiri, hawe i Baala-Gadi i lembono torukuno Libano, ia pu'uno torukuno Heremoni. Irako ira luwu mokoledo ka ipepate ira. 18Tehine ipeteaako ira i Yosua luwuno mokole atuu. 19Nahina maupo te'asa kota anu mesambe'eako ira to Isaraeli, sangkadio to Hewi anu mpo'ia i Gibeo. Luwuno atuu domerontuo a mpeteaa. 20#Win. 7:16Hangano Ondae i Ue anu mokomoteao aroado, onaemo ka dompeteaako ira to Isaraeli, ka domempinokoropu kasi domempinehohawa, sine merinopu, kana anu petena-Do i Ue ndi Musa.

21Itempo atuu hawe i Yosua, ka ipokopingko ira luwu to Ena inso a mentorukuno, inso i Hebero, i Debiri ka i Anaba, inso a luwuno torukuno i Yehuda ka inso a luwuno mentorukuno Isaraeli. Ondae ka luwuno kotado ipokoropuo i Yosua. 22Nami hina mbo'u mia to Ena anu pinoinee tuwu i witado to Isaraeli; butu i Gasa, i Gati, ka i Asido da hinao tebinta. 23Kanandiomo irontu ira luwu i Yosua wita atuu, kana pau-Do i Ue ndi Musa. Ka i Yosua meweengakono wita atuu ia nto Isaraeli gagi pusakado, montonda petiaado tongkudo. Rodoomo wita atuu, mpenaa-naa iramo mpetea.

Currently Selected:

Yosua 11: XMZ

Highlight

Compare

Copy