Yunu 3
3
Tepidino Niniwe ka inonini halano
3:1-10
1Haweomo pau-Do i Ue ndi Yunu anu kompenduano, kanandio, 2”Pewangumo, lakomo i Niniwe, kota anu langkai atuu ka pohaweomo ndi onae pe'oliwi anu pinau-Ku ndi omue.” 3Mepatindaomo i Yunu, ka i'amba lumako i Niniwe, menunu kana pau-Do Ue Ala.
Niniwe onaemo asa kota anu tinengiriako langkaino, maluano otolu oleo pelempaa.
4 #
Mat. 12:41; Luk. 11:32 Mompu'uomo i Yunu mewinso a laro ngkota atuu, asa oleo pelempaa olaino, ka i'amba mebooli, ”Pato pulu oleo mbo'u, manasa Niniwe winowangunsule.” 5To Niniwe mpope'ala-ala ndi Ondae Ue Ala, ka do'amba mempaleleo puasa, ka ondae, moiko mia anu sompoomo tinuwuno maupo nana'ote, pompokona sawu po'inombo. 6Mansano hawe lele atuu ndi mokole kota Niniwe, metiiomo inso a ngkadera poparentaano, ilohuo lemba meloeno, ipekukumbuako sawu po'inombo, ka i'amba mentoro a awu. 7Ka i'amba a mpeparentado mokole ka luwuno anu langkai potorono mia mempaleleo ka mempauo i Niniwe kanandio, ”Mia ka pinotuwu, sapi ka bawaano bembe bimba si dompongkaa hapa-hapa, si dompongkaa ewo ka si dompo'inu uwoi. 8Asalakono luwuno mia ka pinotuwu, mpekukumbuako sawu po'inombo ka mpebooli meroku ndi Ondae Ue Ala, saru asalakono singge mia mepokule inso a leluno anu mosa'o ka inso a mpobobarasaia anu wineweuno. 9Ba mansa, bara'ura Ondae Ue Ala Ira mepokule ka me'o'ole saru mewolili inso a ntekuda-Do anu tensila atuu, ranta nahi tomemate.” 10Mansa-Do kumitao Ue Ala wineweudo atuu, onaemo kana'umpe dompepokule inso a leludo anu mosa'o, me'o'ole Iramo Ue Ala hangano masolaa anu Dopatindaomo tiado ka nahi gagi mbo'u Doweweuo.
Currently Selected:
Yunu 3: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
