Ayubi 24
24
Wineweu-Do Ue Ala a mosa'oa
24:1-25
1”Tembio Ondae Anu Tedoa Pabawa nahi Dopatindao tempo pohukua
ka ondae anu tumo'ori Ira nahi domengkitao oleo pobitaraa-Do?
2Hinao mia mompahe tida wita,
anu morontu bawaano pinotuwu, ka i'amba pakambio.
3Kalideno elu-elu ipolaisakono,
ka sapi waino pine'ueno asa tuwu beine itarimao gagi pe'inia,
4mia mongkokolaro iliahakono inso a nsala,
mia marasai i laro inia luwuno mansa mpewuni.
5Menteeano, kana kalide mo'ila i pada one
dompeluarako ira mpo'angga mpo'ungke mpongkaa;
pada malua mompatindaako ira kaangado ka luwuno anado.
6Ondae mpo'ala kaangano pinotuwu a lere,
ka mpopumpu wua anu tebinta inso a lere anggorodo mia mosa'o gaudo.
7Ondae mpewongi mengkolambe-lambe hangano nahina sangkado,
ka nahina hawu petutuwido i tempono morini.
8Hangano usa marombo i mentorukuno ondae memobaho-baho,
ka hangano nahina pe'engoa, ondae mpehidi-hidi a ntorukuno watu.
9Nana'ote nahina amano inala inso a uono ineno
ka nana'otedo mia mongkokolaro tinarima gagi pe'inia.
10Mengkolambe-lambe dompelakopi hangano nahina sangkado,
ka a laro mokoninggo dompontembi te'uno gandu.
11Ondae mpoweweu lana i olono orua ntia lere,
ondae melolandao ponsesaa a laro mokoranga.
12Inso a laro ngkota teronge pompemahakido mia anu tamo ronga mate
ka peraalikido mia anu pompemahaki mobela,
sine Ondae Ue Ala nahi Doperioo pekakaido.
13Hinao mbo'u mia anu umewaio mewine,
anu nahi to'orio pesalaano
ka nahi po'ia mpiha a ntelaloano.
14Umpeda meene puu mpompepate mewangu,
mepateo mia marasai ka mongkokolaro,
ka i tempono wongi onae moweweu kana puu mponako.
15Matano mia monsosabo monsikori tekamburi,
pinewowolono: Si hina maupo te'asa mia kumita aku;
ka i'amba mokonao borungino rupa.
16A laro wongi-wongi ondae mporongka raha,
tempono meene ondae mpewuni;
nahi doponto'ori mewine,
17hangano wongi-wongia atuu ondae mpemo'oruo,
ka domeleleoakonomo mongkokongirino wongi-wongia.
18Ondae memolomo a wawo uwoi,
tiado tetotonaa i tolino;
ondae nahi domelako mbo'u a lere anggoro.
19Motu'i-tu'i ka mokula mokopingkoo uwoino seru baku,
kanatuu koa mbo'u po'iangado mia mate ndi ondae anu mpoweweu hala.
20Pe'anakaa kumolupeo,
wingo mpemo'ahio,
onae nahi rinambe mbo'u;
molengkua pinudu kana pu'uno keu.
21Onae mompokonsii beine bita, anu nahi pe'ana,
ka nahi poweweu moiko a asa tuwu beine.
22Sine Ondae Ue Ala saru roso-Do wawa ira mia memosia;
maupo moleo tuwuno nahi manasa.
23Ondae Ue Ala moweeakono rodoa anu gagi pomperorohiano,
ka dumagaio luwuno pesalaano.
24Butu sarai dompompelangka-langkai ka i'amba nami hina mbo'u;
ondae meronta ka do'amba ntengkuru kana luwuakoano,
ondae mentinotopi kana pu'uno tonggino gandu.
25Tewala nahi kanatuu, isema mosia umewai aku
ka humapuo pinauku?”
Currently Selected:
Ayubi 24: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
