Yeremia 48
48
Mongkona Moabi
48:1-47
1 #
Yes. 15:1–16:14; 25:10-12; Yeh. 25:8-11; Amo. 2:1-3; Sep. 2:8-11 Mongkona Moabi.
Kanandiomo pau-Do Ueno luwuakoano, Ue Alado to Isaraeli,
”Masolaomo ntu'u Nebo, hangano kota atuu rinawo-rawoomo!
Kota Kiriataimi pinokoko'iiomo ka pinongko'ala!
Kota bente atuu pinokoko'ii ka rinawo-rawo;
2tampulaomo marambano Moabi!
I Hesiboni mia mpontooakono masolaano:
Aiwa tompokotampulao gagi tongku!
Omue mbo'u, hei Mademeni, kopinokongkomino,
ilolampuiko ponai.
3Rongeo! Pebooli inso i Horonaimi:
Matea ka terawo-rawoa anu mongkokongiri!
4Moabi terawo-rawoomo!
Peboolido nana'oteno teronge meroku.
5Mentee ntu'u, mia morake
a mporakea Luhiti saru mengese.
Mentee ntu'u, a nsala montindulu lumako i Horonaimi
teronge pebooli mompemasusa hangano terawo-rawoa.
6Pelulumo, kaduduiomo penaamu:
gagimo kana kalide mo'ila i pada one!
7Mentee ntu'u, hangano omue momperorohi a mpineko'aniakomu ka ponaapa arataamu,
omue mbo'u kopinongko'ala;
Kamosi ta lumako a laro pontadia,
meronga luwuno sando mpesomba ka mia pinemota'uno.
8Anu mponsolangi ira mehawe a sompo kota,
nahina kota anu linalodo!
Lembono ta terawo,
wita motu'i ta tampula,
kana anu pinau-Do i Ue.
9Poweeakonomo panino i Moabi,
ka ipenee meliahako;
luwuno kotano ta gagi boni-boni,
nahina mbo'u palili i larono.
10Tetotonaaomo mia anu nahi weweuo anggaa-Do i Ue,
ka tetotonaaomo mia anu nahi eheakono ponai-Do inso a mpo'uwua rea!
11Moabi tuwu sanaa mompu'u da imongura,
onae tuwu rodo kana anggoro a wawo potonduano.
Onae nahi tinawa inso a ngkusi anu asa a ngkusi anu susua,
nahi hori mewinso a pontadia;
onaemo pu'uno namino kongko mpiha ndi onae,
ka woono nahi bali.
12Onaemo pu'uno, menteeano, tempono ta hawe, kanandiomo pau-Do i Ue, Aku tumena ira ndi onae puu mpo'angga anu ira mentawao, me'uwu ira kusino, ka mempeha ira take'ano. 13Moabi ta gagi mokoko'ii hangano pinesombai Kamosi, kana suku Isaraeli gagi mokoko'ii hangano Beteli, pinerorohido.
14Nde kana'umpe ka imemosia mpotae:
Omami sorodadu,
mia memoroso ka mosia a laro mpeteaa!
15Anu ta rumawo-rawoo Moabi ka luwuno kotano melako iramo mpetea,
luwuno mia mongura anu tebiniki mpetii iramo a mponsumbelea,
kanandiomo pau-Do Mokole anu nee-Do Ueno luwuakoano.
16Masolaano Moabi umpedaomo,
urasa'ono tamo ronga hawe.
17Sabangiomo, hei luwuno anu kongko a mpetengi-tengino,
hei luwuno anu mento'orio neeno!
Potaemo: Mentee ntu'u, tepuduomo pabawa anu iwawono ntu'u,
tuko pompelangkai atuu!
18Petiimo inso a marambamu ka pentoromo a wawo wita mokari,
hei ana beine i Diboni anu tehineomo impo'ia!
Hangano anu ta rumawo-rawoo Moabi lumakoomo sumapoiko,
rumopuo luwuno kotamu anu mebente.
19Pentademo a wiwi nsala ka paresaomo,
hei palilino Aro'eri!
Pesikenomo a mia anu mpolai ka anu tepotola,
potaemo: Hapa anu gagiomo?
20Moabi pinokoko'iiomo, hangano onae rinawo-rawo!
Ponsabangimo ka peboolimo,
pauomo a ngkoro Amoni:
Mentee ntu'u, Moabi terawo-rawoomo!
21Pohukua me'aluomo i wita mantandeano, a luwuno kotano Holoni, Yahasi, Mepa'ati, 22Diboni, Nebo, Beti-Dibalataimi, 23Kiriatami, Beti-Gamuli, Beti-Meoni, 24Kirioti, Bosora, ka luwuno kota i wita Moabi anu olai ka umpeda.
25Tepuduomo tandu rosono Moabi,
ka tokia pabawano tepehaomo!
Kanandiomo pau-Do i Ue.
26Weweuomo ka imolangu, hangano onae mompelangka-langkai ndi Ondae i Ue! Moabi ta melundi-lundi a laro kolua-luano, ka onae mbo'u gagi pengingisiado mia. 27Kombake hieno Isaraeli gagi mia tinawa ndi omiu? Nde hinawe i olodo mia mponakoke onae, onaemo ka ubitu-bitu ulu, sompo upepau mongkona onae?
28Binta iramo kota ka po'iamo a pongku watu,
hei palilino Moabi!
Gagimo kana manu-manu marapatii anu meseno
a rere ngangano aa.
29Kimerongeomo mongkona pompe'anu-anuno, Moabi,
anu tedoa mompe'anu-anu:
pompelangka-langkaino, pompe'anu-anuno, konangi-nangino, ka
pompe'uru-uruno.
30Kuto'orio tedoa pompelangka-langakino,
kanandiomo pau-Do i Ue,
pepauno nahi mentee,
peleluno mbo'u nahi mentee.
31Onaemo pu'uno, aku monsabangi tiano Moabi,
mebooli tiano luwuno Moabi,
ka meraali mongkona to Kire-Heresi!
32Aku mengeseiko,
laluaopo sekono mengeseio i Yaeseri,
hei keu anggorono i Sibima!
Luwuno sampa motutumu melele hawe a ntahi,
meluehi hawe i Yaeseri.
Anu momperawo-rawo tedontaomo
dumunsio hasili tempo motu'i-tu'i
ka opuano wua anggoromu.
33Po'undea ka pebooli mawongko tampulaomo
inso a lere wua ngkeu kaanga ka wita Moabi.
Kupoko'olaiomo anggoro inso a pomporo'ia;
nahina mbo'u anu monsesa saru mebooli mawongko,
pebooli mawongko nahi teronge mbo'u.
34Peboolino Hesiboni hawe i Eleale ka Yahasi; mia merongeo suarano inso i Soari hawe i Horonaimi ka Egelati-Selisia; hangano uwoino koro Nimirimi mbo'u mo'are.
35Pau-Do i Ue: Aku pingko ira to Moabi, anu mpopesombaako pesomba tinunu a mpo'ianga pompesombaia ka mpopesombaako pesomba mana mo'ahi a mpinesombaido. 36Onaemo pu'uno, aroaku mompemahakiakono Moabi kana siloli, aroaku mompemahakiako ira to Kire-Heresi kana siloli; hangano, arataa anu pinumpudo tampulaomo. 37Mentee ntu'u, sompo ulu kineru londa ka sompo danggo pinolei, a sompo kae hinawe pesorekia ka a sompo tonga pinokona sawu po'inombo. 38I wawono sompo mbumbungeno Moabi ka a luwuno tanalapa butu hinao po'inombo, hangano Kupehaomo Moabi kana parewa inso a wita pulu, ranta nahina mia anu ineheakono, kanandiomo pau-Do i Ue. 39Onae terawo-rawoomo ntu'u! Moabi meraaliki! Iwunio ntu'u rupano hangano mokoko'ii! Moabi gagiomo pengingisia ka mongkokongiriado luwuno anu kongko a mpetengi-tengino.
40Hangano kanandiomo pau-Do i Ue:
Menteeano, onae menee mompalari kana manu-manu rajawali
ka wileo panino i wawono Moabi.
41Luwuno kota pinongko'ala,
luwuno bente pekorahakoa rinontu.
Aroado pongkiarino Moabi i tempo atuu
ta kana aroano beine anu mahaki me'ana.
42Moabi ta ropu kana tongku,
hangano onae mompelangka-langkai ndi Ondae i Ue.
43Doitoa, aa pompete'umala, ka oho
sumikoriko, hei palilino Moabi!
Kanandiomo pau-Do i Ue.
44Anu molai inso a doitoa
ta tedonta a laro aa pompete'umala,
ka anu mewuatako inso a laro aa
ta tepongko'ala a laro oho.
Mentee ntu'u, luwuno atuu Kupotiio ndi Moabi
a nta'u hukuado,
kanandiomo pau-Do i Ue.
45A mpe'engoano Hesiboni
anu mempolai mpenaa-naa, pingko rosodo;
sine api meluarako inso i Hesiboni,
langano api inso a langkanaeno i Sihoni,
anu kumaano ka ipingko nipi-nipino Moabi
ka taku uludo anu mporisui.
46Masolakomo, hei Moabi,
omue mate, hei Pinesombaino Kamosi!
Hangano, luwuno ana ntamamiu mewinawa iramo mentinawa
ka luwuno anamiu beine gagi mia tinawa.
47Sine, lembuino Aku momuleo teweweuno Moabi,
kanandiomo pau-Do i Ue.”
Hawemo i ndi'ai pau pohuku ndi Moabi.
Currently Selected:
Yeremia 48: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
