Yeremia 44
44
Pinauno i Yeremia mongkona anu ta gagi i Masiri
44:1-30
1Pau anu hawe ndi Yeremia tiado luwuno to Yehuda anu mpo'ia i wita Masiri, i Migidoli, i Tahapanahesi, i Memipisi ka i wita Patirosi, 2”Kanandiomo pau-Do Ueno luwuakoano, Ue Alado to Isaraeli: Impembasaiomo luwuno masolaa anu Kupotiiomo i Yerusale ka luwuno kotano Yehuda. Mentee ntu'u, luwuno atuu kanandio-andio gagiomo terawo-rawo ka nahina maupo te'asa mia mo'ia i ra'ai, 3hangano mpoweweu iramo anu mosa'o. Ondae mpokotesingkao tekuda-Ku hangano melako mpotunu pesomba ka mpesomba a luwuno pinesombai susua anu nahi domento'orio, omue ke uempu'umu. 4Nahi otu-otu Kutena ira ndi omiu luwuno tetenaa-Ku, luwuno nabi, ka domempauo: Si mpoweweu anu mokoburu anu Ku'o'aliaakono andio! 5Sine, nahi dobehe merongeo ka nahi dompo'aroo biri ka dompewolili inso a mpoweweudo anu mosa'o ka nahi dompotunu mbo'u pesomba tiado pinesombai susua. 6Onaemo pu'uno, mokulano tekuda-Ku ka mosa'ono aroa-Ku te'uwuomo ka sumongkoo luwuno kotano Yehuda ka luwuno sala i Yerusale, ranta ka igagi terawo-rawo ka po'ianga anu londa kana kanandio-andio. 7Kanandio-andio, kanandiomo pau-Do i Ue, Ue Alano luwuakoano, Ue Alado to Isaraeli: Tembio ka impoweweu masolaa langkai a ngkoroimiu ranta mokotampulao tama, beine, nana'ote ka nana'ote da sarai ihina inso i Yehuda nahina toreano tiano koroimu? 8Tembio ka impokotesingkao tekuda-Ku hangano wineweuno kaemiu, saru mpotunu pesomba a luwuno pinesombai susua i wita Masiri anu pinewinsokimiu komiu mpo'ia gagi mia hawe i ra'ai? Tembio ka imebehe gagi pontotonaa ka mokoko'iia i olodo luwuno tongku i tolino? 9Nde imengkolupeomoke mosa'ono poweweudo uempu'umiu, mosa'ono poweweudo mokole i Yehuda, mosa'ono poweweudo mia pinemota'udo, mosa'ono poweweumu ka luwuno beinemu, anu wineweu i wita Yehuda ka a luwuno sala i Yerusale? 10Nahi dompe'urumako hawe oleo andio. Nahi domedoito ka nahi domentondao songka-Ku saru pompakosi-Ku anu Kuweeakomiumo ka ndi uempu'umiu. 11Onaemo pu'uno, kanandiomo pau-Do Ueno luwuakoano, Ue Alado to Isaraeli: Menteeano, Aku mo'aroo rupa-Ku ndi omiu gagi masolaamiu, ka mokotampulao luwuno to Yehuda. 12Aku umala ira to Yehuda anu da mentuwu anu montoo lumako i wita Masiri ta mo'ia gagi mia hawe i ra'ai. Luwudo ira memate i wita Masiri. Ondae ira ntebangku hangano ponai ka mate hangano mokoninggo; inso anu kodei hawe anu langkai ta mate hangano ponai ka mokoninggoa. Ondae ira megagi pontutundali, mongkokongiria, pontotonaa, ka mokoko'iia. 13Aku humuku ira anu mpo'ia i wita Masiri, mengkena kana Kuhukuomo Yerusale, onaemo saru ponai, mokoninggoa, ka haki lele. 14Inso a nto Yehuda anu da mentuwu, anu melako iramo i wita Masiri ira mpo'ia gagi mia hawe i ra'ai, nahina maupo te'asa mia anu tepotola ta mekule i wita Yehuda, po'ianga anu tedoa domentekewoio ira mpo'ia mbo'u i ra'ai. Mentee ntu'u, nahi ira mpekule mbo'u, sangkadio ba'opia mia mpolai.”
15Ka i'amba luwuno tama, anu tumo'orio nine kombiado mpontunu pesomba a luwuno pinesombai susua, ka luwuno beine anu kongko i ra'ai, asa tepumpua langkai, maupo luwuno mia anu mo'ia i wita Masiri ka Patirosi mesangki ndi Yeremia, kanandio, 16”Mongkona hapa anu pinaumu a nee-Do i Ue ndi omami atuu, nahi kami merongeko. 17Sine, kami meweweuo mpiha luwuno anu pinaumami: mpontunu pesomba a mpinesombai beine i suruga ka mpompesombaako pesomba tinawa ndi onae kana anu kimeweweuomo, omami ka uempu'umami, luwuno mokolemami ka luwuno mia pinemota'umami a luwuno kotano Yehuda ka a luwuno sala i Yerusale. I tempo atuu hadio kaangamami, meme'ura ka nahi kipompemarasai. 18Sine mompu'u kimpenaa-naa mpontunu pesomba ka mpompesombaako pesomba tinawa a mpinesombai beine i suruga, omami memakuraako luwuakoano ka omami piningkoako ponai ka mokoninggoa.” 19Ka i'amba beine atuudo mentiangio, ”Lano mpontunu kami pesomba ka mpompesombaako pesomba tinawa a mpinesombai beine i suruga. Nde nahi domento'orio tamamamike nine mpoweweu kami kukisi pesomba mengkena tadeno saru tinahano ka mpopesombaako pesomba tinawa ndi onae?”
20Motaeomo i Yeremia a luwuno palili atuu, a ntama ka beine saru luwuno mia anu mpompowee iramo sangkido ndi onae, kanandio, 21”Pesomba anu tinunumiu ka uempu'umiu, luwuno mokolemiu ka luwuno mia pinemota'umiu, saru palili i wita andio a luwuno kotano Yehuda ka a luwuno sala i Yerusale, kombake luwuno atuu anu tendeano Dopewowoloo i Ue ka anu kinita-Do? 22Ondae i Ue nahi Dopokompeteao mbo'u kumitao luwuno wineweumiu anu mosa'o ka hapa anu mokoburu wineweumiu. Hanganomo onae witamiu gagi terawo-rawo, mongkokongiria ka pontotonaa ranta nahina palili, kana kanandio-andio.” 23Omiu mpontunu komiumo pesomba ka ntehala ndi Ondae i Ue, nahi imperorongeakono pau-Do i Ue ka nahi mentondao songka-Do, pompoakosi-Do ka atora-Do. Onaemo pu'uno ka i'alu komiu masolaa andio, kana tempo kanandio-andio.
24Ka i'amba i Yeremia motae mbo'u a luwuno palili ka luwuno beine atuu, ”Rongeomo pau-Do i Ue, hei luwuno to Yehuda anu kongko i wita Masiri. 25Kanandiomo pau-Do Ueno luwuakoano, Ue Alado to Isaraeli: Omiu ka luwuno beinemiu! Saru wineweuno kaemiu ime'ihiiomo pinauno ngangamiu, kanandio: ’Omami manasa me'ihiio pontanga anu pinaumami kami mpotunu pesomba ka mpopesombaako pesomba tinawa a mpinesombai beine i suruga.’ Moikoomo! Pakosio ka ihiiomo koa pontangamiu! 26Onaemo pu'uno, rongeomo pau-Do i Ue, hei luwuno to Yehuda anu mpo'ia i wita Masiri: Menteeano, mesumpa Akumo a nee-Ku anu langkai, pau-Do i Ue, nee-Ku nahi ta mebooliakono mbo'u maupo te'asa to Yehuda a luwuno wita Masiri, ka dompotae, ’A Nee-Do Ue Ala anu tuwu!’ 27Menteeano Ongkue mepatinda mompotii masolaa ndi ondae ka komba moikoado. Sompo to Yehuda anu kongko i wita Masiri ta piningkoako ponai ka mokoninggoa hawe ka domeropu. 28Ondae anu ntepotola inso a mponai ira mpekule inso i wita Masiri melako i wita Yehuda tedei iramo koa. Luwuno to Yehuda anu da mentuwu anu melako iramo i wita Masiri ira mpo'ia gagi mia hawe i ra'ai ta tumo'orio pinauno isema anu gagi, pinau-Ku ke pinaudo. 29Ndiomo petondoni ndi omiu, kanandiomo pau-Do i Ue, nine Aku humuku komiu a mpo'ianga andio, ka imento'orio nine luwuno pinau-Ku ndi omiu mentee ntu'u ta gagi tiano masolaamiu. 30#2Mok. 25:1-7Kanandiomo pau-Do i Ue: Menteeano, Kupeweengakono i Pirao Hopira, mokole i Masiri, a ngkaedo iwalino ka a ngkaeno mia anu momporaakono penaano, mengkena kana Kupeweengakonomo i Sedekia, mokole i Yehuda, a ngkaeno i Nebukanesa, mokole i Babeli, iwalino anu momporaakono penaano.”
Currently Selected:
Yeremia 44: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
