Yeremia 25
25
Pinau mongkona tadiado to Yehuda i Babeli
25:1-14
1 #
2Mok. 24:1; 2Taw. 36:5-7; Dan. 1:1-2 Pau anu hawe ndi Yeremia mongkona luwuno to Yehuda a nta'u ko'opaa poparentaano i Yoyakimi ana ntamano i Yosia, mokoledo to Yehuda, onaemo a nta'u amba-ambano poparentaano i Nebukanesa, mokole i Babeli. 2Pau atuu ipohaweo i Yeremia a luwuno suku Yehuda ka a luwuno palilino Yerusale, ipotae, 3”Mompu'u ta'u kohopulu ka otolu poparentaano i Yosia anano i Amoni, mokoledo to Yehuda, hawe oleo andio, gagi rua pulu ka otolu nta'umo tehineno, pau-Do i Ue hawe ndi ongkue ka kongkoku mpiha mohaweo ndi omiu, sine omiu nahi mebehe mperorongeakono. 4Ondae i Ue kongko-Do mpiha tumena ira ndi omiu luwuno tetenaa-Do, luwuno nabi, sine omiu nahi mebehe mperorongeakono ka mpekokoongakono. 5Dompotae: Intepidimo singge mia inso a mpelelumiu anu mosa'o ka inso a luwuno wineweumiu anu mosa'o, ka impo'ia mpiha i wita anu Doweeakomiumo i Ue ka a uempu'umiu inso i ndi'ipua hawe nahina tampulaano. 6Si mpetonda a mpinesombai susua saru mpesomba ka mpenggolontu mpesombaio. Si mpokontesingkaakono wineweuno kaemiu tekuda-Ku, ka si Kupompotiiakomiu masolaa. 7Sine nahi imperorongea-Kune, kanadiomo pau-Do i Ue, ranta ka impokotesingkaakono wineweuno kaemiu tekuda-Ku gagi urasa'omiu.
8Onaemo pu'uno kanandiomo pau-Do Ueno luwuakoano: Hangano nahi imperorongeakono luwuno pau-Ku, 9menteeano, Aku tumena ira luwu suku tongku i utara, kanandiomo pau-Do i Ue, ka lumeluo mbo'u i Nebukanesa, mokole i Babeli, tetenaa-Ku atuu; Aku wawa ira me'ewaio wita andio, palilino ka umewai ira tongku petengi-tengino andio, anu Aku rumopuo ka weweuo gagi asa anu mompokodoito, pomansu pasinggiri ka terawono anu nahina tampulaano. 10#Yer. 7:34; 16:9; Meng. 18:22-23Aku mokotampulao inso i olodo suara mawongkoa ka po'undea, suarano umbungkoroi tama ka umbungkoroi beine, unino watu pogili saru mbo'u wantano pelita. 11#2Taw. 36:21; Yer. 29:10; Dan. 9:2Luwuno wita andio ta gagi rawono ka boni-boni. Luwuno tongku andio ira megagi atano mokole i Babeli pitu pulu nta'u tehineno. 12Umarino sompo pitu pulu nta'u atuu, kanandiomo pau-Do i Ue, Aku moweweu pombaloa ndi mokole i Babeli ka tongku atuu hangano salado, saru mbo'u witado to Kasidimi, saru weweuo gagi po'ianga anu boni-boni anu nahina tampulaano. 13Aku motiiakono wita andio luwuno anu pinau-Ku mongkona onae, luwuno anu teburi a wunta andio kana'umpe anu ipauomo i Yeremia mongkona luwuno tongku atuu 14Hangano, ondae mbo'u ira megagi atado hadio tongku ka luwuno mokole anu langkai. Aku humuku ira menunu saru poweweudo ka wineweuno kaedo.”
Piala tekuda-Do i Ue a luwuno tongku
25:15-38
15Kanandiomo pau-Do i Ue, Ue Alado to Isaraeli, ndi ongkue, ”Alaomo inso a ngkae-Ku piala me'ihi anggoro mokulano tekuda andio ka ihino popo'inuako iramo luwuno tongku anu kutenaakomu ndi ondae. 16Ira me'inuo ka do'amba kobangku-bangku ka nami domponto'ori hangano ponai anu Aku motiio i olodo. 17Ku'alaomo piala atuu inso a ngkae-Do i Ue, ka i'amba ihino kupopo'inuako ira luwuno tongku anu Dotena aku i Ue ndi ondae: 18ndi Yerusale ka luwuno kotano Yehuda, saru luwuno mokole ka luwuno mia pinemota'u, ka ipinokogagi luwuno atuu terawo-rawo, boni-boni ka pomansu pasinggiri, saru totonaa ka teweweuno a oleo andio; 19ndi Pirao, mokole i Masiri, saru luwuno pegawai ka mia pinemota'uno, saru luwuno palilino, 20ka luwuno mia hawe inso a mperupa-rupa tongku; a luwuno mokole i wita Usi; a luwuno mokole i wita Pelisiti, onaemo Asikeloni, Gasa, Ekeroni ka ondae anu da mentuwu i Asidodi; 21ndi Edomi, Moabi ka inuleno i Amoni; 22a luwuno mokole i Tirusi, luwuno mokole i Sidoni ka a luwuno mokole i wita i wiwi ntahi i asatowano tahi; 23ndi Dedani, Tema, Busi ka luwuno mia anu kumeruo wuu a wiwi uluno; 24a luwuno mokoledo to Ara ka luwuno mokole anu mehawe inso a mperupa-rupa tongku anu mpo'ia i pada one; 25a luwuno mokole i Simiri, luwuno mokole i Elami, ka luwuno mokole i Madai; 26a luwuno mokole i utara, anu umpeda ka olai, nte'o'asa, ka a luwuno poparentaa ntolino anu kongko i wawontolino. Mokole Sesaki mbo'u ta uminuo umarino ondae.
27Umarino atuu asalakono ka upauako ira: Kanandiomo pau-Do Ueno luwuakoano, Ue Alado to Isaraeli: Impo'inumo ranta molangu ka mengkolua-lua! Tebangkumo ka si pewangu mbo'u, hangano ponai anu Aku motiio i olomiu! 28Sine tewala nahi domebehe mentarimao piala atuu inso a ngkaemu ka dome'inuo ihino, asalakono ka upauako ira: Kanandiomo pau-Do Ueno luwuakoano: Asalakono ime'inuo! 29Hangano menteeano a ngkota anu nineeako montonda nee-Ku, Aku mompu'u motiio masolaa. Nde komiu mentolake inso a mpohuku? Nahi komiu mentola inso a mpohuku, hangano Aku mompotii ponai a luwuno palilino tolino, kanandiomo pau-Do Ueno luwuakoano. 30Omuemu isa'a, pauomo luwuno pau anu ta gagi andio ndi ondae. Pauako iramo:
Ondae i Ue Ira mengaoli kana singa inso a mantandeano
ka moporongeo suara-Do inso a mpo'ianga-Do anu mempori;
Ira mengaoli meroku a mpo'ianga pompakambia-Do,
asa pohio, kana pohiodo anu mposesa wua anggoro, a luwuno palilino tolino.
31Suara magaga ta hawe i tompano tolino,
hangano Ondae i Ue hinao tinuntu-Do a luwuno tongku.
Dopekara-karakono luwuno anu tuwu;
Mia mosa'o gauno Ira meweengakono a mponai,
kanandiomo pau-Do i Ue.
32Kanandiomo pau-Do Ueno luwuakoano:
Menteeano, masolaa ta lumele
inso a tongku hawe a tongku,
asa angi mokora anu mongkokongiri ta me'a'e
inso a luwuno tompano tolino.
33A oleo atuu mia anu mempinepate hangano Ondae i Ue ta matumbole inso i tompano tolino hawe i tompano susuano. Nahi ira mensinabangi, ke mepinumpu ke kinaburu. Ondae ira megagi kana ta'i a wita.
34Ponsabangimo ka peboolimo, hei luwuno puu mpopakambi!
Pelundi-lundimo a laro pampawu, hei luwuno petewawa bawaano bembe bimba!
Hangano haweakoomo tempomiu ka imensinumbele ka mensiniarawo,
ka komiu mentedonta ntesiarawo kana bolusa masuli olino.
35A luwuno puu mpopakambi nahi ta hina mbo'u tolaa, ka a luwuno petewawa bawaano bembe bimba nahi ta hina mbo'u tolaa.
36Rongeo! Luwuno puu mpopakambi mpebooli,
luwuno petewawa bawaano bembe bimba mposabangi!
Hangano Dopokotampulao i Ue pada pakambiado.
37Boni-boniomo tonga mpada anu manangai,
hangano tekuda-Do i Ue anu tensila atuu.
38Kana singa Ondae bintao tonga ewo-Do,
hangano witado gagiomo boni-boni,
hangano ponai anu mompokonsii,
hangano tekuda-Do anu tensila atuu.”
Currently Selected:
Yeremia 25: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
