Yeremia 24
24
Pongkita mongkona orua karandi wua ara
24:1-10
1 #
2Mok. 24:12-16; 2Taw. 36:10 Ondae i Ue mopokitao ndi ongkue, mentee ntu'u, orua karandi wua ara ninaa i arono Raha-Do i Ue. Mongkona atuu gagi umarino i Nebukanesa, mokole i Babeli, wawa ira a pontadia i Yekonia ana ntamano i Yoyakimi, mokoledo to Yehuda, saru luwuno mia pinemota'udo to Yehuda, puu mpo'angga, saru anu pande mo'angga labu inso i Yerusale ka wawa ira i Babeli. 2Karandi anu asa me'ihi wua ara anu moiko ntu'u kana wua ara amba wuano, sine karandi anu susua me'ihi wua ara anu mosa'o, anu nahi pinokongkaa hangano mosa'o. 3Ka i'amba mepau Iramo i Ue ndi ongkue, ”Hapake anu kinitamu, Yeremia?” Sangkiku, ”Wua ara! Wua ara anu moiko tedoa moiko, ka wua ara anu mosa'o tedoa mosa'o, anu nahi pinokongkaa hangano mosa'o.”
4Ka i'amba haweomo pau-Do i Ue ndi ongkue, 5”Kanandiomo pau-Do i Ue, Ue Alado to Isaraeli: Mengkena kana wua ara anu moiko andio, kanatuumo a moikoado to Yehuda anu Kutadi ira inso a mpo'ianga andio a pontadia, i witado to Kasidimi. 6Aku mo'aroo mata-Ku ndi ondae a moikoado, ka Aku wawa ira mpekule i wita andio. Aku wangu ira, komba kumale-kale ira. Aku paho ira, komba buta ira. 7Aku moweeako ira aroa ka domento'ori Aku, nine Ongkuemo Ue. Ondae ira megagi bawaa-Ku ka Ongkue gagi Ue Alado, hangano ira mpepokule ndi Ongkue a tompaano aroado.
8Sine, kanandiomo pau-Do i Ue: Mentee ntu'u, kana wua ara mosa'o atuu anu nahi pinokongkaa hangano mosa'o, kanatuumo Aku weweuo i Sedekia, mokoledo to Yehuda, saru luwuno mia pinemota'uno, ka luwuno toreano palilino Yerusale anu da mpo'ia i wita andio ka anu rodo i wita Masiri. 9Aku weweu ira gagi asa anu mongkokongirido luwuno poparentaa i tolino, gagi mokoko'iia ka pasinggiria, gagi tetewehia ka totonaa a luwuno po'ianga ba isua Kusiarawo ira. 10Aku mompotii ponai, mokoninggoa ka haki lele i olodo, ranta ka domepingko pinokotampula inso i wita anu Kuweeako iramo ndi ondae ka uempu'udo.”
Currently Selected:
Yeremia 24: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
