Puu Mpobitara 9

Abimele gagi mokole i Sikeme

9:1-6

1I Abimele anano i Yeruba'ala lumako i Sikeme ia mpe'etuno ineno ka ipauako ira ka ia luwuno tongku te'inso ia ineno, 2”Tabea miu imempauako ira luwuno mia i kota Sikeme: ’Isua ke anu lalu moikomiu, pitu pulu mia anu parenta komiu, onaemo luwuno anano i Yeruba'ala, ke anu asa mia?’ Impewowoloo, motae ongkue pe'asa reamiu.” 3Itempono dompohaweakono pepaekompono ineno luwuno pau atuu gagi moikoado luwuno mia i kota Sikeme, aroado mia atuu inehedomo ndi Abimele, hangano dompotae, ”Onae pepaekompoto!” 4Ka i'amba dompoweeakono pitu pulu lempe doi salaka inso ia raha mpesomba Ba'ala-Beriti, ka i'amba i Abimele montambo mia tesosaelo ka mia mporisui ka domentondao. 5Lumakoomo ia rahano amano i Opara, ka ipepate ira pitu pulu pepaekompono, luwuno anano i Yeruba'ala, i wawono asa watu. Sine i Yota, tompasusuno i Yeruba'ala kongko tuwu, hangano mewuni.

6Tepumpu iramo luwudo palili i kota Sikeme ka Beti-Milo; melako ira mempotoroo i Abimele gagi mokole umpeda ia ngkeu tarabanti, tugu i Sikeme.

Pasinggirino i Yota a mokole

9:7-21

7Mansano luwuno atuu pinauako i Yota, lumakoomo ia torukuno Gerisimi ka ipentade i punsuno, ka ipebooli tedoa meroku ndi ondae, ”Imeronge aku, omiu palili Sikeme, Ondae Ue Ala ta rumonge komiu! 8Asa tempo hadio keu melako ira me'urapio anu ta gagi mokoledo. Dompotae a ngkeu saitu: Gagimo mokole ndi omami! 9Sine sumangki keu saitu atuu ndi ondae: Nde kana'umpe ke ka aku menaa-naa moluarako lanaku anu pinake mompelangkai ndi Ondae Ue Ala ka mia, ka butu mekawe-kawe iwawono keu? 10Ka i'amba mpotae ira keu atuudo ia keu ara: Aiwa, gagi mokolemami! 11Sine sumangki keu ara atuu ndi ondae: Nde kana'umpe ke ka aku menaa-naa moluarako anu mesiu ka luwuno wua anu moiko, ka butu mekawe-kawe iwawono keu? 12Dompotae luwuno keu atuu ia ngkeu anggoro: Aiwa, gagi mokolemami! 13Sine sangkino keu anggoro atuu ndi ondae: Nde kana'umpe ke ka aku menaa-naa moluarako uwoi wua anggoroku, anu inehe-Do Ue Ala ka mia, ka butu mekawe-kawe iwawono keu? 14Ka dompotae luwuno keu atuu ia ewo rui: Aiwa, gagi mokolemami! 15Sangkino ewo rui a luwuno keu atuu: Ba lano inehemiu ntu'u mempotoro aku gagi mokolemiu, ime'aiwa mpo'ia i totoku. Sine ba naahi, po'ineeomo api ka ipeluarako te'inso ia ewo rui ka itunuo luwu keu arasi Libano.

16Gaagi, mentee ke mpetenunu komiu ka moleo aroa mempotoroo i Abimele gagi mokole? Mentee ke moikoomo wineweu miu ndi Yeruba'ala ka pe'etuno ka imensuloo menunu pe'aroano? 17Nde komba amaku ke anu me'iwali kumorahako komiu ka tuma'o penaano anu ka ipotola komiu inso a ngkaedo to Midia? 18Sine, kanandio mpe'ewa komiu a mpe'etudo amaku ka impepate ira anado, pitu pulu mia, i wawono asa watu. Tendeano imempotoroo i Abimele, anano ata beine, gagi mokole i Sikeme, hangano onae pepaekompomiu. 19Gagi oleo andio ba mpetenunu komiu ka moleo aroa miu ndi Yeruba'ala ka pe'etuno, po'ineeomo imemawongko hangano i Abimele ka po'ineeomo imawongko hangano omiu. 20Ba nahi, po'ineeomo ipeluarako api inso ndi Abimele ka itunu ira luwu mia i kota Sikeme ka Beti-Milo, ka po'ineeomo ipeluarako api inso i kota Sikeme ka Beti-Milo tumunuo i Abimele.” 21Ka i'amba molai i Yota lumako i Be'ere, ka ipo'ia i ra'ai hangano doito ndi Abimele, pepaekompono atuu.

Pe'ewai ndi Abimele

9:22-49

22Mansano otolu nta'u ipeparenta i Abimele ia nto Isaraeli, 23Ondae Ue Ala sumingkao pe'ewa i olodo i Abimele ka palili kota Sikeme, ranta mpalili i kota Sikeme atuu nami dompetenunu ndi Abimele. 24Nde kanandiomo lambahado a pitu pulu anano i Yeruba'ala tembalo ka reado pinopokonaiako ndi Abimele, pepaekompodo anu mepate iramo ka a mpalili kota Sikeme anu mokowalio mepate ira luwuno pepaekompono atuu. 25Palili kota Sikeme atuu mpontena mia tumowokio i punsuno mentorukuno ka ipomuru ira luwuno mia anu lumalo ira a nsala atuu. Mongkona atuu pinohaweako ndi Abimele.

26Kontongaano atuu haweomo i Ga'ala anano i Ebedi ka pepaekompono, mpelimba i kota Sikeme. Palili i kota Sikeme dompe'ala-alao. 27Melako iramo ia lere mpopumpu wua anggorodo, domelandao kai tepuro'i, ka do'amba mpogawe. Melako ira a raha mpelahumoaado, mpongkaa ka mpo'inu saru mentotonaao i Abimele. 28Motaeomo i Ga'ala anano i Ebedi, ”Isema ke i Abimele ka isema ke ontae to Sikeme, ranta ka to gagi atano? Nde nahi komba anano i Yeruba'ala atuu ka i Sebula, sarungkaruno, hori ira gagi atado to Hemori, amano to Sikeme. Tembio ke ka kita gagi atano? 29Ba mansa mia ia kota andio a ngkaeku, asalakono aku mepateo i Abimele.” Onaemo kai ewaio i Abimele, ipotae, ”Pokorosoo sorodadumu! Aiwamo!” 30Tempono i Sebula, topoparenta kota atuu, rumongeo pauno i Ga'ala anano i Ebedi, tedoa tekuda. 31Onae montena mia lumako ndi Abimele i Aruma ka ipe'oliwi, ”I Ga'ala anano i Ebedi ka luwuno pepaekompono mehawe iramo i Sikeme ka imento'oriokoa motae ondae bula ira palili kota atuu umewaiko. 32Onaemo, pelungkamo tempono da woongi, omue ka palili anu merongaakomu, ka pontowokimo ia mpada. 33Tisomo mo'oru, itempono saba mata oleo, asalakono kau sapoiomo kota atuu. Kontongaano onae saru palili anu merongaakono mpeluarako me'aropiko, weweuomo ndi onae kana anu pinokoweweumu.”

34Lumakoomo i Abimele saru luwuno palilino tempono wongi ka dompotowoki opaa ntia puu mpetea ndi Sikeme. 35Tempono i Ga'ala anano i Ebedi meluarako ka mentade i arono pewowa kota, meluarako mbo'u i Abimele ka palili anu merongaakono atuu inso a pontowokia. 36Mansano i Ga'ala kumitao palili atuu, motaeomo ndi Sebula, ”Kitao, hadio mia mpontindulu inso a punsu mentorukuno,” Sumangki i Sebula ndi onae, ”Atuu eo-eono mentorukuno, anu potaemu mia.” 37Motae mbo'u i Ga'ala, ”Kitao hadio mia mpontindulu te'inso ia torukuno Taburu Eresi, ka asa bawaa puu mpetea aiwa inso a nsala Keu Tarabanti Me'onenimi.” 38Sumangki i Sebula ndi onae, ”Kanandio, isua wiwimu anu motae: ’Isema i Abimele atuu, ranta kato megagi atano?’ Komba mia andiodo ke anu pinokongkodeimu? Lakomo, kau pe'iwaliako ira.” 39Ka i'amba i Ga'ala metewawa i arodo palili kota Sikeme, mpeteakono i Abimele. 40Sine i Abimele lumuluo, ka ipolai inso i arono. Hadio mia anu memate tumambole hawe a pewowano kota. 41I Abimele mo'ia i Aruma, sine i Sebula sumaario i Ga'ala ka pepaekompono, ranta ka nahi dompokompo'ia i Sikeme. 42Tisomono mia ia kota atuu melako i lere. Mansano atuu pinauako i Abimele, 43iwawa ira palilino, itia ira otolu ntia puu mpetea, ka dompontowoki i lere. Mansano kumita ira mia atuu mpeluarako inso i kota, lumakoomo sumapoio ka ipepate ira. 44I Abimele ka puu mpetea anu merongaakono mensapoio ka mpentorokio pewowano kota, sine orua puu mpetea mehano mesapoi ka mepate ira luwu mia anu mekongko a mpada. 45Aasa oleo i Abimele sumapoio kota atuu. Irontuo kota atuu ka ipepate ira mia i larono. Ka i'amba rumongka-rongkao kota atuu ka irawosiakono ohia.

46Rumongeo mongkona atuu, mpewinso iramo luwuno palili kota Menara-Sikeme ia aa i totono pelahumoa Ele-Beriti. 47Pinauako i Abimele, motae luwuno palili kota Menara-Sikeme mpepumpu iramo i ra'ai. 48Ka i'amba i Abimele ka luwuno palili anu merongaakono mporake a torukuno Salamona. I Abimele mo'ala uase, ka ipole ira sampa keu. Itandeo ka ipo'ahao, ka ipotaeako ira palilino anu merongaakono, ”Impomparipari meweweuo kana anu kinitamiu kuweweuomo!” 49Ka do'amba palili atuu pada pompole sampa keu ka domentondao i Abimele. Domenaao i wawo aa ka domentunuo aa atuu i wawo uludo mia atuu. Kanandiomo luwuno palili Menara-Sikeme domemate, bara'ura asa nsowu tama ka beine.

Mateno i Abimele

9:50-57

50Ka i'amba i Abimele lumako i Tebesi; ikaduo ka irontuo. 51Sine hinao asa menara moroso i tongano kota, ka luwuno palili kota atuu, tama ka beine, mpolai ira i tu'ai. Domentondoo pewowa anu i bungkuno ka dompewuatako i wawono menara atuu. 52Haweomo i Abimele ia menara atuu. Isapoio, ka mokompewinso rumangkuhio tondono menara atuu ta sumongkoo. 53Sine aasa beine modontai asa watu pogilia ia uluno i Abimele kai tepeha taku uluno. 54Mompari-pari moboio tetenaano anu mo'ini sangka peteano ka ipotae, ”Butao ponaimu ka upepate aku, kasihina paudo mia mongkona ongkue, ’Aasa beine mepateo’.” Ka i'amba tetenaano tumoboo ranta ka imate. 55Mansado mengkitao to Isaraeli motae mateomo i Abimele, melako iramo pada mpekule a mpo'iangaado. 56Kanandiomo Ondae Ue Ala mbaloo wineweuno i Abimele anu mosa'o ndi amano, onaemo pompepatea pitu pulu pepaekompono. 57Ka mbo'u luwuakoano wineweudo to Sikeme anu mosa'o dopokokonaako ira Ondae Ue Ala ndi ondae. Kanandiomo petotonaano i Yota anano i Yeruba'ala kumonai ira.

Currently Selected:

Puu Mpobitara 9: XMZ

Highlight

Compare

Copy