Puu Mpobitara 10
10
I Tola
10:1-2
1Umarino i Abimele, mewanguomo i Tola anano i Pua anano i Dodo, asa mia Isakari, ta tumolosi ira to Isaraeli. Onae mo'ia i Samiri, a mentorukuno Eparai. 2Onae moparenta gagi puu mpobitara a nto Isaraeli rua pulu ka otolu nta'u tehineno. Ka i'amba mateomo, ka ikinaburu i Samiri.
I Yairi
10:3-5
3Umarino onae, mewanguomo i Yairi, to Gilea. Onae moparenta gagi puu mpobitara a nto Isaraeli rua pulu nta'u tehineno. 4Anano tolu pulu ana ntama, anu mompesawiki tolu pulu kalide laki, ka kotado tolu pulu, ranta kanandio domeneeakono Hawo-Yairi, i wita Gilea. 5Ka i'amba mateomo i Yairi kinaburu i Kamo.
Inuledo to Amoni bobarasai ira to Isaraeli
10:6-18
6To Isaraeli mpoweweu iramo mbo'u anu mosa'o ia pongkita-Do i Ue. Mpesomba ira ia Baala ka ia Asitore, a luwuno anu pinesombaido to Arami, anu pinesombaido to Sidoni, anu pinesombaido to Moabi, anu pinesombaido inuledo to Amoni ka anu pinesombaido to Pilisiti. Domebinta ira i Ue ka nami dompesombai Ira. 7Onaemo ka Dotedoa tekuda i Ue ia nto Isaraeli, ka Dopeweengako ira a ngkaedo to Pelisiti ka inuledo to Amoni. 8A ta'u koa mbo'u atuu dompe'ata ira ka dobobarasai ira to Isaraeli. Hopulu ka oalu nta'u dompe'ata ira luwuno to Isaraeli anu mpo'ia i asatowano koro Yarade, i witado to Amori i Gilea. 9Inuledo to Amoni domensakio koro Yarade ira mensapoio tongku Yehuda, tongku Benami ka inuledo i Eparai, ranta to Isaraeli tedado ira tepakada.
10Mpebooli iramo to Isaraeli ndi Ondae I Ue, ”Mpoweweu kamimo hala ndi Omiu, nde kimebintaomo Ue Ala mami ka mpesomba ndi Baala.” 11Sine Pau-Do i Ue a nto Isaraeli, ”Nde komba Ongkue ke anu tumolosikomiu te'inso a ngkaedo to Masiri, to Amori, inuledo to Amoni, to Pilisiti, 12to Sidoni, to Amale ka to Maoni anu bobarasai komiu, itempono kai mpebooli ndi Ongkue? 13Sine imebinta Akumo ka impesomba a anu pinesombai susua. Onaemo, ka nahi Aku tumolosikomiu mbo'u. 14Imelakomo mpebooli ia luwuno anu pinesombai susua anu bininikimiumo atuu, po'ineomo ka ondae anu tumolosi komiu itempono imentedungku.” 15Sine dompotae to Isaraeli ndi Ondae i Ue, ”Mpoweweu kamimo hala. Iweweuomo ndi omami hapa anu moiko a pongkita-Miu. Tendeano, itulungi kamimo kanandio-andio.” 16Ka do'amba imeliahakono luwuno anu pinesombaido mia hawe atuu ka dowali mpesomba ndi Ondae i Ue, ranta kanami dopokotahao i Ue aroa-Do kumitao masukarado to Isaraeli.
17Itempono atuu inuledo to Amoni mewinawa ira ka dompekema i Gilea, kontongaado to Isaraeli mpepumpu ka mpekema i Misipa. 18Luwuno petewawa palili i Gilea, pada mpepau, ”Isema ke mia anu ta mompu'u sumapoi ira inuledo to Amoni atuu? Onaemo anu ta gagi petewawado luwuno palili i Gilea.”
Currently Selected:
Puu Mpobitara 10: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
