Puu Mpobitara 4
4
I Debora ka i Bara
4:1-24
1Mansano mate i Ehu, to Isaraeli mpoweweu iramo mbo'u anu mosa'o i aro-Do i Ue. 2Ka Ondae i Ue meweengako ira a ngkaeno i Yabi, mokole to Kana'a, anu meparenta i Hasoro. Tadulako sorodadudo, onaemo i Sisera, anu mo'ia i Haroseti-Hagoimi. 3Mpebooli iramo to Isaraeli ndi Ondae i Ue, hangano hinao osio etu kareta labuno i Sisera ka ipokonsii ira to Isaraeli rua pulu nta'u tehineno. 4I tempo atuu i Debora kombiano i Lapido gagi nabi beine, moparenta gagi puu mpobitara a nto Isaraeli. 5Onae wela mentoro a toto ngkeu kuruma Debora i olono Rama ka Beteli a mentorukuno Eparai, ka to Isaraeli wela ira mehawe mpo'ema moleoa. 6Metenaomo moboio i Bara anano i Abinoa inso i Kadesi i wita Napatali, ka ipotaeakono, ”Nde Ondae i Ue, Ue Alado to Isaraeli, meparenta kanandio: Imelakomo i torukuno Tabori wawa ira hopulu nsowu mia inuleno i Napatali ka inuleno i Sebulo merongaakomu, 7ka Aku weweuo i Sisera, tadulako sorodadudo to Yabi, saru luwuno kareta ka sorodaduno lumako umaropiko, i Korono Kisoni, ka Aku meweengakono ia ngkaemu.” 8Sumangki i Bara ndi Debora, ”Tewala lumakoko ongkue mbo'u aku lumako, sine ba nahi ulako ongkue mbo'u nahi aku lumako.” 9Motae i Debora, ”Moiko, aku metonda! Butumokoa, nahi komohawe pompelangkai ia pelempaamu andio, nde Ondae i Ue ta mewengakono i Sisera ia ngkaeno asa beine.” Mentadeomo i Debora merongaakono i Bara lumako i Kedesi. 10Ipumpu ira i Bara tongku Sebulo ka tongku Napatali melako i Kedesi. Hopulu nsowu mia anu tumondao. Kanatuu koa mbo'u i Debora lumako saru onae.
11 #
Mpo. 1:16
Sine i Heberi, to Keni atuu, lumako tensia inso ia tongku Keni, inso ia luwuno anano i Hoba oleono i Musa. Ka wela melimba-limba mowangu kema hawe ia ngkeu tarabanti i Sa'ananima umpeda i Kedesi.
12Mansano pinaleleako i Sisera, motae i Bara anano i Abinoa lumako i torukuno Tabo, 13ipumpuo luwuno karetano, hadiono osio etu kereta labu, ka luwuno sorodadu perongano, inso i Harose-Hagoimi tetutu i Korono Kisoni. 14Motaeomo i Debora ndi Bara, ”Pepatindamo, oleo andio Ondae i Ue mewengakono i Sisera ia ngkaemu. Ondae i Ue melempa i aromu.” Metiiomo i Bara inso ia Torukuno Tabori ka hopulu nsowu mia tumondao. 15Ondae i Ue mokotensiarawoo i Sisera ka luwuno karetano ka luwuno sorodaduno hangano mata ponai i arono i Bara. I Sisera metii inso ia karetano molai. 16Ilulu ira i Bara kareta ka sorodaduno atuu hawe i Harose-Hagoi, ka luwuno sorodaduno i Sisera memateako hangano mata mponai; nahina anu tuwu mau te'asa mia. 17Sine i Sisera melulu molai hawe a ngkemano i Yaeli, kombiano i Hebe, to Keni. Nde mesambe'e ira i Yabe, mokole Hasoro ka pe'etuno i Hebe, to Keni. 18Meluarako i Yaeli tepohaweakono i Sisera, ka ipotae, ”Itetoro ueku, ipewinso. Sii doito!” Tetoro i Sisera a ngkemano beine atuu ka itutuwiakono hawu. 19Motae ia beine atuu, ”Powee aku uwoi tedei, mokoranga aku.” Ka i'amba beine atuu umungkahio ponaapa susu, ka ipoweeakono ka ipo'inu ka ikolimbuo mbo'u. 20Ipotae mbo'u a beine atuu, ”Pentade i arono pewowano kema, ka ba hinao mia hawe mesikeno ndi omue: Hinao mia ke ndi'ai? Sangkio: Nahina.” 21Sine i Yaeli kombiano i Hebe, mo'ala pandorano kema ka palu-palu, ka i'umpedaakono meningka-ningka. Ipandorao ia nipi-nipino i Sisera lompahi hawe a wita, kontongaano moturi roodo hangano mokendo, ka mateomo i Sisera. 22Tempono atuu haweomo i Bara anu lumuluo i Sisera. Melurakoomo i Yaeli ka ipotaeakono, ”Aiwa, ka kutisoakomu mia anu inungkemu atuu.” Ka i'amba mewinsoomo i Bara i larono ka ikitao i Sisera mate kombole-mbole saru pandora ia nipi-nipino. 23Kanandiomo i oleo atuu Ondae i Ue Ala numangio i Yabi, mokole to Kana'a i arodo to Isaraeli. 24Pabawado to Isaraeli komoro-morosono dumansoo i Yabi, mokole to Kana'a ranta ka dompepateo i Yabi, mokole to Kana'a atuu.
Currently Selected:
Puu Mpobitara 4: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021