Puu Mpobitara 3
3
Tongku anu pino'inee mo'ia i Kana'a
3:1-6
1Ndiomo luwuno tongku anu pino'inee-Do i Ue mpo'ia, mesala ndi ondae Do'arahako ira to Isaraeli atuu luwuno anu nahi pembasaio peteaa i Kana'a, 2ka luwuno inuledo to Isaraeli anu nahi pembasaio peteaa anu laloomo, mempinaguru ira mpetea: 3olima ira mokole kota to Pilisiti, luwudo to Kana'a, to Sido ka to Hewi, anu mpo'ia a mentorukuno Libano, inso i torukuno Baala-Heremoni hawe ia nsala anu tetutu i Hama. 4Mekongko ira mpiha, ka mesala ndi ondae, to Isaraeli inarahako ka iteto'ori ke domerongeokoa parenta anu Doweeako ira i Ue ia ue mpu'udo mesala ndi Musa.
5Kanandiomo to Isaraeli atuu mpo'ia ia olodo to Kana'a, to Heti, to Amori, to Perisi, to Hewi ka to Yebusi. 6To Isaraeli mpo'ala ira ana beinedo gagi kombiado ka dompeweengakono ana beinedo ia ana ntamado mia atuu, ka dompesomba a lahumoado.
I Otinieli
3:7-11
7To Isaraeli mpoweweu anu mosa'o i aro-Do i Ue, domengkolupe Ira i Ue, Ue Alado, ka mpesomba ia luwuno Bala ka luwuno Asera. 8Onae pu'uno ka itensila tekuda-Do i Ue a nto Isaraeli, onae ka Do'asa ira a nto Kusani-Risataimi, mokole Arami-Mesopotamia. Ka to Isaraeli mpetuundu ira ndi Kusani-Risataimi oalu nta'u tehineno. 9Ka do'amba mpebooli to Isaraeli ndi Ondae i Ue, onaemo pu'uno Ondae i Ue moweeako ira asa mia pontolosi a nto Isaraeli anu motola ira, onaemo i Otinieli, anano i Kenasi, uaino i Kalebi. 10Penaa-Do i Ue pabawaio ka igagi petewawado to Isaraeli. Lumakoomo metea, ka Ondae i Ue mewengakono i Kusani-Risataimi, mokoledo to Arami, onaemo ka inangio i Kusani-Risataimi. 11Rodoomo wita atuu pato pulu nta'u tehineno. Ka i'amba mate i Otinieli anano i Kenasi.
I Ehu
3:12-30
12Sine to Isaraeli da mpoweweu ira mbo'u anu mosa'o i aro-Do i Ue. Ondae i Ue weweuo i Egelo, mokole to Moabi, pabawai ira to Isaraeli, nde mpoweweu ira anu mosa'o i aro-Do i Ue. 13#Mpo. 1:16; Win. 34:3Mokole andio popandei ira inuleno Amoni ka inuleno Amale gagi pe'asano. Melako iramo sumapoi ira ka dontenangi to Isaraeli. Kota Keu Kuruma dompentorokio. 14Hopulu ka oalu nta'u tehineno to Isaraeli mpetenunu ndi Egelo, mokole to Moabi. 15Ka do'amba to Isaraeli mpebooli ndi Ondae i Ue, ka Ondae i Ue moweeako ira asa mia pontolosi onaemo i Ehu, anano i Gera, to Benami, onae mia manggali. I Ehu gagi mia i olono to Isaraeli mo'oliwi peki'ue ndi Egelo mokole to Moabi. 16Ka i Ehu moweweu ponai montaso mompombali, anu ondauno asa hiku, iwunio a laro lembano, ia puu mpa'ano anu koana. 17Ka i'amba mewengakono peki'ue ndi Egelo, mokole to Moabi. I Egelo asa mia anu tedoa mewalo. 18Umarino i Ehu meweengakono peki'ue atuu, itena ira mia mpowawa peki'ue atuu ka dompekule. 19#Yos. 4:20-24Sine, onae menaa-naa ia watu-watu anu pina'o, umpeda i Giliga, ka i'amba mekule a mokole. Motaeomo, ”Hinao pe'oliwi rahasia anu kuwawaa komiu, o mokole.” Motae i Egelo, ”Siipo'ari!” Luwudo mia anu mpentade i tu'ai mpeluarako. 20Mewinsoomo i Ehu tepohaweakono, tekonai mentoro asa-asano ia bolongko pe'angi-angiano. Motaeomo i Ehu, ”Hinao pau-Do Ue Ala anu winawaku ndi omiu, o mokole.” Ka i'amba mentadeomo te'inso ia pentoroano. 21Ka i'amba kae manggalino i Ehu butao ponaino te'inso ia puu pa'a koanano ka ipetoboakono ia kompono mokole. 22Gaagi sekonopo tangkeno ponai mewinso saru matano. Taba kompono tumutuwio mata ponaino, nde ponai atuu nahi butao inso ia kompono mokole. Ka i'amba meluarako ia pewowa i bungkuno. 23Kanatuumo i Ehu, hawe ia tambino. Tondono bolongko anu i wawono ikunsio inso i bungkuno. 24Da iaopo ipeluarako mehawe iramo atano mokole kumitao, sine bolongko anu i wawono kinunsi. Ka dompotae, ”Bara'ura tekonai lumako te'eme i bungkuno pe'angi-angiano!” 25Domensisikorio ranta ka domebulalingo, sine ondae mokole nahi dohori umungkahio tondono bolongko anu iwawono atuu. Ka do'amba mpo'ala kunsi, dome'ungkahio tondo, domengkitaomo uedo mate tepombole ia horo. 26Itempono nahi dompopari-pari, i Ehu molai, telalo ia watu pina'o, molai lumako i Seira. 27Mansano hawe i ra'ai a mentorukuno Eparai ipuurio tawuwua, ka do'amba mpentii to Isaraeli saru onae inso a mentorukuno atuu, ka onae i arono. 28Motaeomo ndi ondae, ”Imentonda aku, nde Ondae i Ue Dopewengakonomo iwalimiu to Moabi atuu ia ngkaemiu.” Mpetii iramo mentondao, domerontuo pesakiakoa i koro Yarade, tetutu i Moabi. Nahina maupo te'asa mia dompo'ineeo mesakiako. 29Itempo atuu mia pinepatedo bara'ura ta tehopulu nsowu mia te'inso i Moabi, luwudo mia anu moroso ntu'u; maupo te'asa mia nahina tepotola. 30Oleo atuu to Isaraeli domenangi ira to Moabi, rodoomo wita atuu, halu pulu nta'u tehineno.
I Samaga
3:31
31Umarino onae, petewawa lembuino i Samaga anano i Anata; Ipepate ira nomo etu to Pelisiti mompake tuko pontamba sapi. Kanatuumo ikadudui ira to Isaraeli.
Currently Selected:
Puu Mpobitara 3: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
