YAKOBU 3
3
Hala hangano elo
3:1-12
1Pepaekompoku luwu-luwu, si tehadio mia i olomiu ineheno gagi guru; hangano tomento'orio, nine gagi guru kita mebinitara montonda ponsa'u anu lalu mobea. 2Hangano luwuto mensala hadio rupa; ba isema nahina salano a mpepauno, onaemo mia soompo ntu'u, anu mokompeteao koa mbo'u asa ngkoroino. 3Tompokonao sama a ngangano ngara, onaemo ka itondao po'eheto, hangano mesala kanandio ka tompokopabawaio mbo'u asa ngkoroino. 4Ka kitaomo luwuno kapala, maupo tedoa langkai ka ileluo angi mokora, sine ipokowolilio koa ulino anu kodei ntu'u montonda po'eheno anu umuli. 5Kanandio koa mbo'u elo, maupo aasa parewano koroi anu kodei, sine mokompehamba-mabaako mongkona luwuno anu langkai.
Kitao, maupo kana'umpe kodeino api, ipokosongkoo tobu langkai.
6Elo mbo'u onemo api; onae kana aasa wawontolino mosa'oa ka mo'ala po'ianga i olodo parewa ngkoroito kana aasa anu mokonsosa'aio asa ngkoroi ka molangao pelempano tumuwuto, sekono onae ipolangao api naraka. 7Luwuno rupano kondehora mo'ila, manu-manu, saru luwuno kondehora melele ka luwuno kondehora a ntahi mempinokomonea koa ka dompokomonea iramo mia, 8sine nahina maupo te'asa mia anu pabawa mokomoneao elo; onae aasa anu lambaha, anu nahi pinokompabawai, ka buke rasu anu mompepate. 9#Teg. 1:26 Saru elo tome'unde-unde Ira i Ue, Amato; ka saru elo tomentotonaao mia anu pinokogagi montonda rupa-Do Ue Ala, 10inso a nganga anu aasa meluarako ronso ka totonaa. Mongkona andio, pepaekompoku luwu-luwu, nahi moiko igagi kanandio. 11Hinaoke anu moluarako uwoi motewe ka uwoi mopa'i inso a mata uwoi anu aasa? 12Pepaekompoku luwu-luwu, hinaoke keu ara mokompewuaako wua saitu ka hinaoke keu anggoro mokompewuaako wua ara? Kanandio koa mbo'u mata uwoi mopa'i nahi pokompoluarako uwoi motewe.
Ponto'ori mentee anu inso i wawono
3:13-18
13Isema i olomiu anu pande mosongka ka molino pinewowolono? Moikoomo ipokomengkaao wineweuno a gau ntumuwu anu moiko hangano ponto'ori mentee anu hiina inso a mpe'urumako. 14Tewala mponaa-naa komiu aroa kohili ka me'o'aluakono koroimiu liomiu, si pompelangla-langkai ka si mpegaupi umewaio menteea! 15Atuu komba ponto'ori mentee anu inso iwawono, sine inso i wawontolino, inso a mpo'eheno aroano mia, inso a onitu nsa'o. 16Hangano ba isua hinao kohili ka me'o'aluakono koroino onaeno i tu'ai hinao marisua ka mperupa-rupa wineweu mosa'o. 17Sine ponto'ori mentee anu inso i wawono onaemo amba-ambano molino, ka i'amba mompokosintuwu, molusa-lusa ipepau, umehe metonda, buke pe'aroa ka luwuno anu moiko, nahi po'ala-alaako ka nahi po'onde-onde. 18Ka wua anu inso a menteea rinawo a sintuwu tiado mia anu mpompokosintuwu.
Currently Selected:
YAKOBU 3: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
