YAKOBU 2
2
Si pompesusua mia
2:1-13
1Luwuno pepaekompoku, kana mia anu mompe'ala-ala ndi Ondae i Yesu Kerisituu, Ueto anu maramba, pompe'ala-ala atuu si mpoweweuako anu moiko pompesusua mia. 2Hangano, tewala hinao asa mia mewinso a tepumpuamiu mesinsi wulaa ka mesangka tekosi ka ihawe mbo'u asa mia mongkokolaro i tu'ai metahu sangka, 3ka impelangkaio mia anu mesangka tekosi atuu ka impotaeakono, ”Tabea miu ipentoro a mpo'ianga anu moiko andio!” Sine a mia anu mongkokolaro atuu impotae, ”Pentade i ra'ai!” ke, ”Pentoro a horo andio umpeda pelandaano karuku!”, 4kombake mpompesusua komiumo i laro aroamiu ka mpoweweu kana puu mpobitara me'empehiako pinewowolo anu mosa'o?
5Imerongeomo, hei pepaekompo luwu-luwu anu pinehohawaku! Kombake Ondae Ue Ala biniki ira mia anu pinemongkokolarono wawontolino andio ka domegagi kaea a pompe'ala-ala ka dompe'umbuo Poparentaa anu Dodandiako iramo ba isema anu mehohawa Ira? 6Sine imempokongkodei iramo mia memongkokolaro. Kombake tendeano mia mengkaea anu mempokonsii komiu ka anu rumende komiu a mpebitaraa? 7Komba ondaeke anu mpepaukiakono nee anu maramba, anu hangano Ondae ka imegagi mia-Do Ue Ala? 8#Ima. 19:18 Sine, tewala impeleluakono songka anu lalu i wawono anu teburi a Wunta Mempori, ”Pehohawaomo pe'asa miamu kana koroimu,” moiko wineweumiu. 9Sine, tewala pompesusua komiu mia, mpoweweu komiu hala, ka hangano songka atuu gagi mengkaa, nine mpolimpai komiu songka. 10Hangano ba isema tumondao luwuno songka atuu, sine nahi perioo asa ntia inso ndi onae, salaomo a luwuno. 11#Pel. 20:13-14; Win. 5:17-18 Hangano Ondae anu pauo, ”Si ponsosabo,” Dopauo mbo'u, ”Si pompepate,” Gaagi tewala komba ponsosabo komiu sine pompepate, ka megagi komiu mbo'u anu polimpai songka. 12Impepaumo ka mpelelu kana mia anu ta binitara ira songka anu mompokomaradeka mia. 13Hangano pebitaraa anu nahina pompehohawa ta gagi a mia anu nahi pompehohawa. Sine ta monangi pompehohawa a mpebitaraa.
Pompe'ala-ala nahina wineweu menteeano mate
2:14-26
14Hapake tuduno, luwuno pepaekompoku, tewala asa mia motae, nine onae hinao pompe'ala-alano, kahinaano nahina wineweuno? Polioke pompe'ala-ala atuu kumaduduio? 15Tewala aasa pepaekompo tama ke pepaekompo beine nahina sangkano ka nahi sompo kaangano sompo oleo, 16ka asa mia inso i olomiu motae, ”Ilakomo temoiko, pokonaomo hawu mokula ka ipongkaamo ranta mowohi!”, sine nahi poweeakono hapa anu kinereno koroino, hapake tuduno atuu? 17Kanandio koa mbo'u teweweuno pompe'ala-ala: Tewala pompe'ala-ala atuu nahi tinondaako wineweu, ka pompe'ala-ala atuu menteeano mate.
18Sine bara'ura hinao mia motae, ”Ndi omue hinao pompe'ala-ala ka ndi ongkue hinao wineweu,” aku sumangkio, ”Popokitaakune pompe'ala-alamu atuu nahi tinondaako wineweu, ka aku mopokitaakomu pompe'ala-alaku inso a luwuno wineweuku.” 19Upe'ala-alao, nine butu koa asa-asa-Do Ue Ala? Moiko atuu! Sine maupo onitu dompe'ala-alao koa mbo'u mongkona atuu ka mpondidi-ndidi ira. 20Hei mia anu monge-monge, behekoke mangakuakono kanandio-andio, nine pompe'ala-ala nahina wineweu onaemo pompe'ala-ala anu mooa? 21#Teg. 22:1-14 Kombake i Burahima, amato, pinokomentee hangano luwuno wineweuno, tempono ipesombaakono i Saki, anano, a wawo meda pontunua pesomba? 22Imengkitao, nine pompe'ala-ala mo'angga meronga saru luwuno wineweu ka hangano luwuno wineweu atuu pompe'ala-ala gagi soompo ntu'u. 23#Teg. 15:6; 2Taw. 20:7; Yes. 41:8 Hangano mesala kanandio inihiiomo pauno Wunta Mempori anu motae, ”Ka i'amba mompe'ala-alaomo i Burahima ndi Ondae Ue Ala, ka Ondae Ue Ala mototoiakono mongkona atuu gagi menteea.” Onaemo pu'uno i Burahima ka inineeako, ”Sambe'e-Do Ue Ala.” 24Gaagi imengkitao, nine mia pinokomentee hangano luwuno wineweuno ka komba butu hangano pompe'ala-ala. 25#Yos. 2:1-21 Ka kombake kanandio koa mbo'u i Rahabu, mia belesu atuu, pinokomentee hangano luwuno wineweuno, tempono iwuni ira mia anu tinena atuu i laro rahano, ka i'amba tumulungi ira metolahako telalo a nsala susua? 26Hangano kana koroi nahina penaano, maate, kanandio koa mbo'u pompe'ala-ala nahina wineweu, maate.
Currently Selected:
YAKOBU 2: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
