Yesaya 9
9
1 #
Luk. 1:79
Tongku anu melempa a laro wongi-wongia
mongkitaomo mewine anu langkai;
ondae anu mpo'ia a wita wongi-wongia,
ndi ondae mewine mewantaomo.
2Hangano Omiu maroa pebooli,
ka mawongkoa anu langkai;
memawongko iramo i aro-Miu,
kana mawongkodo tempo sumowi,
kana mia mengkokora-kora tempono mpetia-tia pinomuru.
3Hangano pasanga anu dumansoo
ka ponsela a wawo oweano
saru tukono anu mompokonsii
Ipuduomo kana a oleo tenangiano Midia.
4Hangano sompo sapatuno sorodadu anu mongkopa-kopa
ka sompo lemba meloe anu medoloako rea
ta gagi pompaani api.
5Hangano asa nana'ote hinaomo tiato,
asa ana ntama mewineeako kitamo;
luwuno poparentaa kongko a wawo oweano,
ka neeno domempauo mia: Puu Pompatudu kinohali-haliako, Ue Ala Anu Moroso, Ama anu Nahina Tampulaano, Mokole Sintuwu.
6 #
Luk. 1:32-33
Langkai pabawano,
ka rodoa nahi ta hina otuano
a wawo ngkadera poparentaano i Daudi ka a laro poparentaano,
hangano i'empehiakono ka mokorosoakono
moleoa ka menteea
mompu'u kanandio-andio ranta nahina tampulaano.
Rosono pongkekewoi-Do Ueno luwuakoano Ira weweuo mongkona andio.
Tekuda-Do i Ue ndi Eparai
9:7–10:4
7Doluarakonomo i Ue pau-Do ndi Yako,
ka pau-Do atuu umaluo Isaraeli.
8Luwuno tongku atuu, i Eparai ka palilino Samaria, mento'orio,
sine saru pompelangka-langkaido dompotae,
9”Rere watu tela tebangku,
towali mpontadeo inso a watu anu pinolei;
keu ara mentinuehi,
tome'euakono keu arasi.”
10Onaemo ka Dotena ira i Ue tadulako sorodaduno i Resini umewai ira,
ka lumelu ira iwalido:
11To Arami inso i sabaano oleo, ka to Pelisiti inso i sumooano oleo,
Isaraeli domenteleakono nganga anu malua.
Maupo gagiomo luwuno andio, tekuda-Do i Ue napi morini,
ka kae-Do da tetaangako.
12Sine tongku atuu nahi dompepokule ndi Ondae anu tumunduhi ira,
ka nahi dome'ungke Ira Ueno luwuakoano.
13Onaemo ka Dotebasio i Ue inso i Isaraeli ulu ka iki,
watano ka sampano merongaako a oleo anu mengkena.
14Mia memota'u ka mia pinemota'u, onaemo atuu ulu,
ka nabi anu mpopaguruako pegaupi, onaemo atuu iki.
15Hangano luwuno petewawado tongku andio onaemo pompokotesaa,
ka mia anu mepinarenta gagi tesiarawo.
16Onaemo pu'uno, Ondae i Ue nahi Dopehohawa ira mangalitaudo,
ka nahi Dopehohawa ira nana'ote nahina amado ka tuwu beinedo,
hangano luwudo mpebungkui Aku ka mpoweweu mosa'o,
ka sompo nganga mpepau anu nahi moiko.
Maupo gagiomo luwuno atuu, tekuda-Do napi morini,
ka kae-Do da tetaangako.
17Mentee ntu'u, gau mosa'o melanga kana api
anu kumaano pingko ewo ka rui,
ka i'amba sumongkoo tonga ewo a ntobu
ranta pebotono ahu membombo i wawono.
18Hangano tekuda-Do Ueno luwuakoano,
mo'aiomo wita atuu,
ka tongku atuu gagi panino api;
maupo te'asa mia nahi pehohawao pepaekompono.
19Ondae mpongkaa i koanado, sine da mokoninggo,
ondae mpongkaa i manggalido, sine nahi domemowohi,
sompo mia kumaano bauno pe'etuno onaeno;
20I Manase kumaano i Eperai, ka i Eparai kumaano i Manase,
ka ondae meronga-ronga umewaio Yehuda.
Maupo gagiomo luwuno andio, tekuda-Do napi morini,
ka kae-Do da tetaangako.
Currently Selected:
Yesaya 9: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
