Yesaya 8

Anano nabi beine gagi petondoni

8:1-4

1Mepau Iramo i Ue ndi ongkue, ”Alaomo asa watu poburia langkai ka i wawono buriakonomo binuri biasa: Mahera-Salala Hasa-Base.” 2Ka ku'amba mompoboi orua sakosii anu pine'ala-ala, onaemo sando mpesomba Uria ka i Sakaria anano i Yeberekia. 3Ka ku'amba mewowaliakono beineku, asa nabi beine; onae mentia ka me'anaakono asa ana ntama. Ka Do'amba mepau i Ue ndi ongkue, ”Neeakonomo: i Mahera-Salala Hasa-Base, 4hangano se'eluno napi pokopauo nana'ote atuu ’Ine! Ama!’ pompolino Damasi ka pinomuruno Samaria ta winawa i arono mokoledo to Asuri.”

Ponsapoido to Asuri i Yehuda

8:5-10

5Ondae i Ue mepau mbo'u ndi ongkue,

6”Hangano tongku andio nahi domentarimao

uwoi Siloahi anu waa me'ara-arai,

ka memotewe aroa ndi Resini ka anano i Remalia, 7onaemo pu'uno, menteeano, Ondae i Ue Ira weweuo uwoi korono

anu mokora ka langkai,

– mokole Asuri ka luwuno marambano –

lulua ndi ondae.

Uwoi andio ta lulua lumaloio luwuno pangkorono

ka waa lumaloio luwuno wiwino,

8saru merumpa mewinso i Yehuda,

sumampuo ka mowo hawe a we'u.

Tewileno panino ta tumutuwio luwuno witamu.”

Sine Ondae Ue Ala kumongkomi kita!

9To'oriomo, hei luwuno tongku, ka tededengkemo,

impekokoongakonomo, oo, luwuno siuno tolino,

impepatindamo mpetea, ka tededengkemo,

impepatindamo mpetea, ka tededengkemo!

10Impotudaomo akala, manasa nahi ta gagi!

Impo'alamo tepo'asaa mpau, manasa nahi ta pinokoweweu!

Hangano Ondae Ue Ala kumongkomi kami!

Somborino i Yesaya gagi pepopoto'ori

8:11-22

11Hangano kanandiomo pau-Do i Ue ndi ongkue tempono kae-Do pabawai aku, ka Dopopoto'oriakune ka si kutondao peleludo tongku andio,

12 # 1Pet. 3:14-15 ”Si mpotae tepo'asaa

luwuno anu pinaudo tongku andio tepo'asaa,

hapa anu dinoitoakodo siimo imedoitoakono ka siimo impondende.

13Sine Ondae Ueno luwuakoano, Ondaemo anu asalakono ime'akuio gagi Anu Mempori;

ndi Ondaemo imedoito ka ndi Ondaemo impondende.

14 # 1Pet. 2:8 Ondae Ira gagi po'ianga mempori, sine watu tetengkua mbo'u

ka watu tetiduado

orua suku Isaraeli atuu,

saru gagi oho ka dampado palilino Yerusale.

15Hadio i olodo ta tetidu,

tebangku ka mobela langkai,

tekadu ka tinawa.”

16Naaomo sakosii andio ka tondoniomo pompaguru andio i olodo ana guruku. 17#Ibr. 2:13Ka aku sumikori Ira i Ue anu wunio rupa-Do te'aro a inuleno i Yako; aku momperorohi ndi Ondae. 18Menteeano, ongkue ka nana'ote anu Doweeakunemo i Ue onaemo petondoni ka pepopoto'ori i olodo to Isaraeli inso ndi Ondae Ueno luwuakoano anu mo'ia a ntorukuno Sioni.

19Ka tewala mia mpotae ndi omue, ”Po'emamo pontiso a onitu ka luwuno penaa anu mompau nahi manasa ta gagi anu metanga-tanga ka momuti-muti,” ka sangkiomo, ”Kombake asa tongku tekona mo'ema pontiso a mpinesombaino? Nde asalakonoke ira mpo'ema pontiso a mia mate tiano mia tuwu 20ka ipohawe pompaguru ka pe'oliwi?” Isema anu nahi sangki menunu saru pau kanatuu, ndi onae nahi pesabaako towea. 21Mia ira wela ntelalo i wita atuu, memongkokolaro ka memokoninggo, ka tempono mokoninggo, ira ntekuda ka mentotonaao mokoledo ka Ue Alado. Mia ira mpentombu i langi 22ka mpengkita i tolino, mengkaa butu ma'isoa ka wongi-wongia, rawu-rawu anu mompokoma'iso, ka ira mentinadi a laro wongi-wongia.

Hinaa-Do Mokole manangai

8:23–9:6

23 # Mat. 4:15-16 Sine nahi ta hina mbo'u rawu-rawu a wita anu te'asi atuu. Tewala i ndi'ipua nahi Dotuduo i Ue wita Sebulo ka wita Napatali, lembuino Ira mokontekosio pesalaa lumako a ntahi, wita i asatowano koro Yarade, witado tongku susua.

Currently Selected:

Yesaya 8: XMZ

Highlight

Copy

Compare