Yesaya 40
40
LAMORO 40–66
TIANO KO'ORUA
TEKADUDUIADO TONGKU ANU A LARO PONTADIA
Lele tolaa
40:1-11
1Tarero iramo, tarero iramo bawaa-Ku,
kanandiomo pau-Do Ue Alamu,
2pokorodoomo aroano Yerusale
ka pebooliakonomo ndi onae,
nine tepe'ataano tompaanomo,
nine salano puuliomo,
hangano montarimaomo pohuku inso a ngkae-Do i Ue
meluka mpendua hangano halano.
3 #
Mat. 3:3; Mrk. 1:3; Yoh. 1:23 #
Luk. 3:4-6
Hinao suara anu meboo-booli,
”Patindaomo i pada one pesalaa-Do i Ue,
pokoleoomo a mpada malua
sala langkai pesalaa-Do Ue Alato!
4Sompo lembono asalakono hinowui,
sompo torukuno ka pongku pinokomerete;
wita anu mepongku asalakono pinokogagi wita anu merete,
wita anu mebanga gagi melembo,
5asalakono maramba-Do i Ue ta pinokomengkaa
ka luwuno mia ira mengkitao mperonga-ronga;
mentee ntu'u, Dopauomo i Ue.”
6 #
Yak. 1:10-11; 1Pet. 1:24-25 Hinao suara anu mepau, ”Peboolimo!”
Sangkiku, ”Hapake anu asalakono kupebooliako?”
”Luwuno mia kana ewo
ka luwuno momoikono kana bunga a mpada.
7Ewo gagi mokari,
bunga gagi moleu,
tewala Ondae i Ue mepuuriakono penaa-Do.
Menteeano tongku atuu kana ewo.
8Ewo gagi mokari,
bunga gagi moleu,
sine pau-Do Ue Alato
kongko mpiha ranta nahina tampulaano.”
9Hei Sioni, omue mowawa lele moiko,
pewuatakomo a ntorukuno anu mantande!
Hei Yerusale, omue mowawa lele moiko,
pokolangkaio suaramu temeroku,
pokolangkaiomo suaramu, si doito!
Pauako iramo kotano Yehuda,
”Kitao, Ondaemo atuu Ue Alamu!”
10 #
Yes. 62:11; Meng. 22:12 Kitao, Ondae Ue Ala hawe saru roso
ka saru kae-Do Dopokomengkaao pabawa-Do.
Kitao, ondae anu megagi tambono pe'i'isei-Do kongko saru Ondae,
ondae anu hinawe-Do mpelempa i aro-Do.
11 #
Yoh. 10:11
Kana asa mia puu pompakambi Dopakambi ira bawaano pinotuwu-Do
ka Dopumpuako ira kae-Do;
ana bimba Do'awi ira,
ineno bimba Dotaate ira.
Isema mengkenaako Ira i Ue?
40:12-31
12Isema monsa'uako pelengkaeno uwoi ntahi
ka langi isongkaakono otuweno,
awu wita isa'uakono ponsa'u,
luwuno torukuno itimbaakono neraca,
ke luwuno pongku mompake pontimba?
13 #
Rom. 11:34; 1Kor. 2:16 Isema anu polio sumongkao Penaa-Do i Ue
ke moweeako Ira pontiso gagi puu pompatudu-Do?
14Ndi sema Ondae i Ue Dopo'ema patudu ka Dopohawe pompewowolo?
Isema anu paguru Ira i Ue ka Dopolempao moleoa?
Ke isema paguruako Ira ponto'ori
ka moweeako Ira pontiso ka Dopoweweu mompake pompewowolo?
15Menteeano, luwuno tongku onaemo kana asa iti uwoi a laro pontambu
ka pinongkena kana asa labano pampawu a neraca.
Menteeano luwuno togo nahi torea inso a mobeano awu motutu.
16Libano nahi sompo pekeu ponahu
ka kondehorano a ntobu nahi sompo tiano pesomba tinunu.
17Luwuno tongku kana nahina i aro-Do,
ondae Dotudu ira mooa ka nahina pengkonaano.
18 #
Tin. 17:29
Gagi, saru isema komiu mpongkenaako Ira Ue Ala
ka hapa anu komiu pokompengkenaako Ira?
19Saru tinahake? Puu mpolabu anu weweuo,
ka anu pande mo'angga wulaa umapiiakono wulaa,
ka moweweu hadio rante salaka tiano.
20Mia anu mompotade tinaha keu,
mobiniki keu anu nahi ronga mowuru,
mo'ungke puu mpo'angga anu pande ntu'u
ka ipontadeo tinaha anu nahi ta telelu.
21Nahi mento'orioke? Nahi merongeoke?
Nahi mempinauakoke inso amba-ambano?
Nahi mento'orioke kana'umpe ininaa empehino tolino?
22Ondaemo anu mo'ia i wawono longkuno tolino
anu palilino kana kosume;
Ondaemo anu wileo langi kana sawu
ka pasao kana kema ka ipino'iangai!
23Ondaemo weweu ira anu langkai potorodo gagi nahina
ka anu mokogagi ira puu mpobitara tolino nahina pengkonaano!
24Da saraipo domempinaho,
da saraipo domerinawo,
da saraipo sampa pinokompehakado mehaka a laro wita,
Ondae tumampu'u mepuuri ndi ondae, ranta ka domemokari
ka ipeneeakono angi mokora kana seami.
25Saru isema komiu mpongkenaa-Kune,
kana ntu'u Ongkue mesongka saru onae?
pau Anu Tedoa Mempori.
26Po'aroomo matamu i langi
ka kitaomo: Isema anu mokogagio luwuno anano wula atuu
ka wawa ira luwuno sorodadudo mpeluarako,
saru moboio luwuno needo?
Hangano Ondae tedoa pabawa ka tedoa moroso,
nahina maupo te'asa anu nahi hawe.
27Tembio ka upepau kanatuu, hei Yako,
ka mepau kanandio, hei Isaraeli,
”Tuwuku tewuni inso ndi Ondae i Ue,
ka tiaku nahi Doperioo Ue Alaku?”
28Nahi uto'orioke,
ka nahi urongeoke?
Ondae i Ue atuu Ue Ala
nahina tampulaa-Do
anu mokogagio tolino inso i tompano hawe i tompano;
Ondae nahi Domokendo ka nahi Domolema,
nahi pinokonto'ori pompewowolo-Do.
29Anu mokendo Dopoweeakono roso
ka tumiangio rosono anu nahi pokompelelu.
30Luwuno mia mongura gagi tedoa mpopemokendo,
luwuno ana ntama kontuwuado ntebangku tetidu,
31sine mia anu sumisikori Ira i Ue mohawe roso wo'ohu:
ondae kana rajawali anu meneeako
rosono panino;
ondae mpelulu ka nahi domegagi molema,
ondae mpelempa ka nahi domegagi mokendo.
Currently Selected:
Yesaya 40: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
