Yesaya 27

Isaraeli ta kinadudui

27:1-13

1 # Ayb. 40:20; Pud. 74:14; 104:26 I tempo atuu Ondae i Ue Ira weweuo pohuku

mompake ponai-Do anu montaso, langkai ka moroso

a Lewiata, ule anu molore,

a Lewiata, ule anu monggelo-nggelo,

ka Ira mepateo ule naga anu a ntahi.

2I tempo atuu ta hina lere anggoro anu tekosi,

”Penanimo mongkona onae!

3Ongkue, Ue, anu dumagaio;

sompo tempo Kusisiwuio.

Kasihina anu sumosanggolio,

meene wongi Kudagaio;

4nahi tensila tekuda-Ku.

Tewala mohawe Aku ewo ka rui ndi onae,

Aku mompari-pari mepate ira,

Aku tumunu ira ka ipingko,

5sangkadio tewala mpo'ungke ira pekaduduia ndi Ongkue

ka mpo'ungke manangai saru Ongkue, oo mpo'ungke sintuwu saru Ongkue!”

6A oleo anu ta hawe, i Yako ta mehaka,

Isaraeli ta gagi hadio ka mentumba

ka wawontolino ibuketiakono hasilino.

7Nde Doropu ira i Ue bawaa-Do

kana Doropuo mia anu rumopu ira?

Ke Dopepate irake bawaa-Do

kana Dopepateo mia anu mepate ira?

8Saru tumambao ka sumaari ira, mekara-kara Komiumo saru ondae.

Dotadiako iramo pepuurino angi-Do anu mokora i tempono angi i sabaano oleo.

9Onaemo pu'uno, kanandiomo ta pinahihi salano i Yako

ka ndiomo wuano tewala ipoko'olaio halano:

Ira weweuo luwuno watu pontunua pesomba

kana watu kapuru anu rinawo-rawo,

ranta nahina mbo'u karu pelahumoaa ka meda pontunua dupa

anu mo'ia mentade.

10Hangano kota anu mebente atuu gagi boni-boni,

asa po'ianga anu pinokomooa

ka bininta kana pada one;

ana nsapi ta mongkaa ewo

ka melungku i ra'ai

mokopingko ira sampano keu.

11Tewala mokariomo sampa-sampano, asalakono ta pinudu;

ira me'aiwa beine ka mempakeo gagi keu ponahu.

Hangano, onaemo andio asa tongku anu nahi molino pinewowolodo,

onaemo pu'uno, onae nahi Dopehohawao anu mokogagio

ka nahi Dopehohawao anu weweuo.

12I tempo atuu Ondae i Ue Ira monsesa mompu'u i Koro Eparata hawe i Koro Masiri, ka omiu komiu mepinumpu nte'o'asa, hei to Isaraeli! 13I tempo atuu ta pinuuri tawuwua langkai, ka ira mehawe ondae anu ntetadi i wita Asiuri saru ondae anu mentinadi i wita Masiri ka dompenggolontu mpesomba ndi Ondae i Ue a ntorukuno anu mempori, i Yerusale.

Currently Selected:

Yesaya 27: XMZ

Highlight

Copy

Compare